УИХ-ын 2021 оны намрын ээлжит чуулган энэ сарын 18-нд хаалтаа хийсэн. Монгол Улсын Үндсэн хуульд оруулсан нэмэлт, өөрчлөлтөөр УИХ-ын ээлжит чуулган ажлын 75-с доошгүй өдөр чуулахаар заасан. Үүний дагуу УИХ-ын намрын чуулган хуралдаж, 243 асуудал хэлэлцэн шийдвэрлэсэн байна. Энэ хугацаанд дарга, сайд нар гаргасан шийдвэр, ажлаа танилцуулахдаа санаа болон санамсаргүй байдлаар монголчуудын амьдрал бодит байдалд нийцэхгүй үг унагаж олон нийтийн сүлжээгээр хэсэгтээ дооглуулж, шүүмжлүүлдэг билээ. Ялангуяа жил бүрийн өдий үед утаа, түлээний асуудал хамгийн өргөн хүрээнд анхаарлын төвд байдаг билээ. Тиймээс зарим сайд, дарга нар хийх ажлаа буруу ярьж, иргэдэд буруу ойлголт өгч, салбарынхныхаа нэр хүндийг унагаж, хэдхэн хоногийн өмнө үүрэгт ажлаасаа чөлөөлөгдөөд буй. Харин цар тахал гарснаас хойш нийгэм эдийн засаг, хил гааль бараа бүтээгдэхүүний үнийн хөөрөгдөл, хомсдол, иргэдийн амьжиргааны талаар УИХ-ын гишүүд, дарга нар ихэвчлэн ярьдаг болж.

     Бид энэ удаад Эрчим хүчний сайд Н.Тавинбэх, Зам, тээврийн сайд Л.Халтар, Байгаль орчин, аялал жуулчлалын сайд асан Н.Уртнасан, Нийслэлийн агаар, орчны бохирдлын асуудал хариуцсан төслийн уидрдагч асан Д.Ихбаяр, УИХ-ын гишүүн Ц.Цэрэнпунцаг, “Таван толгой түлш” ХХК-ийн захирал М.Ганбаатар, Соёлын сайд Ч.Номин нарын хэлсэн марзан үгсийг онцолж байна.

Эрчим хүчний сайд Н.ТАВИНБЭХ: Шахмал түлшний чанарыг гаднын оронд шинжлүүлье

     Өнөө жил утаа их байна, энэ нь шахмал түлштэй холбоотой гэх шүүмжлэл гараад байгаа билээ. Харьяа яам, холбогдох байгууллагуудын удирдлага, төлөөлөл өнөөдөр шахмал түлшний цэгүүд, айлуудаар явж, нөхцөл байдалтай танилцсан юм. Энэ үеэр Эрчим хүчний сайд Н.Тавинбэх “Энэ жил утаа нэмэгдсэн нь хэн ч харахад тодорхой байгаа. Утаа нэмэгдсэн шалтгааныг тогтоохоор ажиллаж байна. Шахмал түлшний чанар муу байна гэж иргэд шүүмжилж буй. Сайжруулсан шахмал түлшний чанар Монгол Улсын стандартыг хангаж байгаа эсэхийг өнөөдөр эрх бүхий лабораториуд бүгд туршилтын дүнгээрээ баталгаажуулсан. Үүнээс өөрөөр бидэнд сайжруулсан шахмал түлшний чанарыг тодорхойлох боломж бидэнд алга. Тиймээс гадаад улсын лабораторид өгч шинжлүүлнэ” гэсэн юм. Үүнээс болж иргэд түлшнийхээ чанарыг мэдэхгүй улс гэж байдаг л юм байхдаа гэж бухимдаж байсан билээ.

Зам, тээврийн сайд Л.ХАЛТАР: Хоёр чингэлэг ачаа орж ирж байгаа

      Хилийн боомт дахь гацааг арилгах ажлын хүрээнд Гадаад харилцааны дэд сайд арванхоёрдугаар сард Замын-Үүдэд очиж ажилласан билээ. Энэ үеэр сайд мэдээлэл өгөхдөө “Цаашдаа хавраас барилгын материалын тээвэр эхлэхээр өдөртөө хоёр удаа буюу 100 чингэлгээр бараа татан авах боломж байна уу гэдгийг ярилцана. Ямар ч байсан өнөөдөр Хятадын талаас хоёр чингэлэг орж ирж байна” гэсэн юм. Тэгвэл энэхүү асуудалтай холбоотойгоор цахим орчинд хөгжилтэй ч гэх үү, хөгтэй ч гэх үү постууд хөвөрч байсан юм.

Байгаль орчин, аялал жуулчлалын сайд асан Н.УРТНАСАН: Дрон нисгэж, утаа их гаргаж байгаа айлуудыг шалгана

     Долоо хоногийн өмнө БОАЖ-ын сайд асан Н.Уртнасан шахмал түлшний цэг, айлуудаар явж, утааны нөхцөл байдалтай танилцсан билээ. Энэ тухайгаа ярихдаа "Улаанбаатар хотын утааны голомт болоод буй газруудад дрон нисгэн, утаа үүсгэж буй айлуудад очиж шахмал түлш түлж байна уу, түүхий нүүрс түлж байна уу гэдгийг шалгана. Утааны эх үүсвэр бодит нөхцөл шалтгааныг зөв тогтоохгүйгээр утаа бууруулах талаар яриад аль нэг талаас янз бүрийн эх үүсвэрээр буруу мэдээлэл цацах нь зохимжгүй гэж үзэж байна” гэсэн нь үүрэгт ажлаасаа чөлөөлөгдөхөд хүргэсэн байж магадгүй юм.

УИХ-ын гишүүн Ц.ЦЭРЭНПУНЦАГ: “Богд Зонхов” төсөл агаарын бохирдлыг бууруулна