УИХ дахь МАН-ын бүлэг өнөөдөр Цар тахлын тухай хуулийг сунгах эсэх асуудлаар хуралдаж, хуралдааны шийдвэрээ танилцуулав. Энэ талаар МАН-ын бүлгийн дарга Д.Тогтохсүрэн мэдээлсэн юм. Тэрбээр

          “Цар тахлын тухай хуулийг өмнө нь хоёр ч удаа сунгасан. Харин өнөөдрийн МАН-ын бүлгийн хурлаас Цар тахлын тухай хууль хуулийг дахин зургаан сараар сунгах зүйтэй гэсэн шийдвэр гаргасан. Цар тахал үргэлжилсэн хэвээр байна. Шинэ төрлийн хувилбар гарч ирээд зарим газар аюултай түвшинд ч хүрч болзошгүй байна. Манай экспорт хаагдаж, эдийн засагт хүндрэл учирч болзошгүй байна. Иймд маш хурдан зохицуулалт хийх шаардлага үүснэ. Дээрх хоёр асуудлаар Цар тахлын тухай хуулийг зургаан сараар сунгах нь зүйтэй гэж үзэж байгаа юм. Зөвхөн энэ Цар тахлын тухай хуулийг сунгах тухай асуудлыг энэ ондоо багтааж, Засгийн газар, УИХ-аар хуралдаж шийднэ.

          Цар тахлын тухай хуулинд иргэд рүү чиглэсэн олон заалт бий. Засгийн газраас тухай бүрт нь нөхцөл байдлаас шалтгаалж хэрэгжүүлнэ. Цар тахлын тухай хууль сунгагдвал Монголбанкны чиг үүрэг дэх ипотекийн зээлийн хугацааг нь сунгах, төлөлтийг нь хойшлуулах боломжтой байх гэж бодож байгаа” гэв.