Монгол Улсын Ерөнхий сайд Л.Оюун-Эрдэнэ “Оюутолгой” төслийн асуудлаар сэтгүүлчдэд мэдээлэл өглөө. Тэрбээр

“Монгол Улсын Засгийн газрын 92 дугаар тогтоол гарч, түр хороо байгуулагдаж , “Оюутолгой” төсөлд Монгол Улсын эрх ашгийг хангуулах Ажлын хэсэг гарч, жил гаруйн хугацаанд ажиллаж байна.

           Өнөөдөр Ерөнхий сайдын нэр дээр “Рио Тинто” болон “Туркоиз Хилл” компанийн удирдлагаас албан бичиг ирлээ. Албан бичгийг хүлээж аваад УИХ-аас байгуулагдсан түр хорооны гишүүдтэй уулзалт хийж, төлөөллийнх нь хамт энэхүү товч мэдээллийг хийхээр боллоо.

           Захидалд тухайн компанийн ТУЗ-ийн гишүүд хуралдаж таван арга хэмжээг авахаар болсон талаар бичсэн байна. Үүнд:

• “Оюутолгой” төслийн Монгол Улсын Засгийн газрын эзэмшлийг нь 34 хувь ногдох 2.3 тэрбум ам.долларын өрийг 100 хувь тэглэж байна. Ингэснээр өмнө нь тооцож байсан 22 тэрбум ам.долларын өр цаашид үүсэхгүй. Нэг талаараа 34 хувийг нь Монголын ард түмэн үнэгүй авч байгаа гэсэн үг.
• Далд уурхайн бүтээн байгуулалтын санхүүжилтийн төлөвлөгөө буюу нэмэлт төлөвлөгөөг энэ захидлыг илгээсэн өдрөөс дуусгавар болгож байгаагаа мэдэгдэж байна.
• “Оюутолгой”-н далд уурхайн бүтээн байгуулалтын санхүүжилт буюу өмнө зарцуулагдсан мөнгөн дүнд хөндлөнгийн аудит оруулах, хөндлөнгийн аудитын дүнд үндэслэж, зөрүү буюу Монголын газар нутагт зарцуулаагүй нөхцөл байдал үүсвэл бид энэ асуудлыг хариуцахад бэлэн байна гэж захидалд бичжээ.
• Гүний уурхай ашиглалтад ороогүй удсан. 2023 оны I хагас буюу 4-5 сард ашиглалтад оруулахаар тооцож байгаа. Энэ хүртэл буюу цаашид гарах зардлыг хөрөнгө оруулагч тал 100 хувь хариуцна.
• Мөн “Оюутолгой” ХХК-ийн засаглалыг сайжруулах, Монгол Улсын эрчим хүчний нэгдсэн сүлжээнээс цахилгаанаар хангах гэрээ байгуулахтай холбоотой таван санал дурдсан байна.

Дээрх шийдвэрүүдийг гаргахад амаргүй байснаа илэрхийлээд энэ нь цаашдын хамтын ажиллагааны итгэлцэл болно гэдгээ илэрхийлсэн” гэв.