-III тунгийн асуудал бол зөвхөн эрүүл мэндийн асуудал биш-

Монгол Улсын Ерөнхий сайд Л.Оюун-Эрдэнэ вакцинжуулах цэгт ажиллаж байна. 

         Энэ үеэрээ тэрбээр “Манай улсын хувьд цаг алдалгүй вакцинжуулж чадсанаар өнөөг хүртэл хатуу хөл хорио тогтоогоогүй байгаа. Улмаар хичээлийн шинэ жилээ ч нээж чадлаа. Эрүүл мэндийн яамнаас долоо хоногт халдварын тохиолдол 20 хувиар буурч байгаа гэсэн мэдээллийг надад өгсөн. Эмнэлгийн ачаалал тодорхой хэмжээнд багасаж байна. Тиймээс бид эхний хоёр тунгийн вакцины үр дүндээ тулгуурлан бүүстер буюу III тунг хийлгэх нь туйлын чухал асуудал болж байгаа юм. Ингэснээр бид үе шаттайгаар нээж байгаа эдийн засгаа цаашид илүү сайн нээж чадна.

          Бид шат дараатайгаар халдварын дэглэмийг бууруулж байгаа. Хэрэв энэ дэглэм буурсан шар түвшин рүү орж чадвал “Double standard” гэж нэрлээд байгаа нийгмийн бухимдал алга болно. Яагаад вэ гэхлээр, заримыг нь нээж, заримыг нь хаагаад байгаа учраас л бухимдал үүсэж байгаа. Тийм учраас энэ асуудал бүүстер тун туйлын чухал байна. Харамсалтай нь коронавирусийн эсрэг вакцины III тунгийн хамрагдалтад залуус идэвхгүй байна.

          Монгол Улсын нийт иргэддээ дахин хандаж хэлэхэд бүүстер буюу III тунгийн асуудал бол зөвхөн эрүүл мэндийн асуудал биш. Энэ бол эдийн засаг, нийгмийн харилцааны туйлын чухал зүйл юм” гэв.