УИХ-ын гишүүнээр сонгогдсон Ц.Идэрбат, Э.Батшугар нар тангаргаа өргөж байна

2021-10-21, 246

Нөхөн сонгуулийн дүнг аравдугаар сарын 18-нд УИХ болон Ерөнхийлөгчид өргөн барьсан. Сонгуулийн ерөнхий хорооны дүнг УИХ хүлээн авсны дараа чуулганаар шинэ гишүүдээ тангараг өргүүлэх хуулийн зохицуулалттай.

Тэгвэл өнөөдөр УИХ-ын гишүүнээр сонгогдсон Ц.Идэрбат, Э.Батшугар нар парламентын гишүүний тангаргаа өргөж байна. УИХ-ын 18, 28 дугаар тойргийн нөхөн сонгуулийн дүнг Сонгуулийн ерөнхий хорооны дарга П.Дэлгэрнаран танилцуулж байна.

Сонгуулийн ерөнхий хороо УИХ-ын сонгуулийн 18 дугаар тойргийн нөхөн сонгуульд Монгол Ардын Намаас нэр дэвшиж, хамгийн олон буюу 17264 санал авсан Цагаанхүүгийн Идэрбат, 28 дугаар тойргийн нөхөн сонгуульд мөн намаас нэр дэвшиж, хамгийн олон буюу 28537 санал авсан Энхбаярын Батшугар нарыг УИХ-ын гишүүнээр сонгогдсонд тооцох тухай тогтоол гаргажээ.

Нөхөн сонгуулийг зохион байгуулахад аймаг, нийслэл, сум, дүүргийн 21 сонгуулийн хороо, 148 хэсгийн хороонд нийт 1307 төрийн албан хаагч, мэдээллийн технологийн 183 даамал, халдвар хамгааллын дэглэм, батлагдсан журмыг мөрдүүлэх чиглэлээр онцгой байдлын болон эрүүл мэндийн байгууллагын нийт 559 албан хаагч, сонгогчдын нэрийн жагсаалт үйлдэх, давхардлыг арилгах, нягтлан шалгахтай холбоотойгоор иргэний бүртгэлийн 253 итгэмжлэгдсэн ажилтан ажилласан байна.

Түүнчлэн санал авах байрны аюулгүй байдлыг хангах, гэмт хэрэг, зөрчлөөс урьдчилан сэргийлэх, нийтийн хэв журам хамгаалах, олон нийтийн аюулгүй байдлыг хангах чиглэлээр цагдаагийн 720 албан хаагч, нийт 3,022 төрийн албан хаагч ажиллажээ.

Сонгуулийн ерөнхий хорооны даргын илтгэлтэй холбогдуулан гишүүд асуулт асууж, хариулт авч байна.

УИХ-ын гишүүнээр сонгогдсон Ц.Идэрбат, Э.Батшугар нар тангаргаа өргөж байна