Монгол Улсын Засгийн газрын ээлжит хуралдаан өнөөдөр болж, шийдвэрээ танилцуулж байна. Засгийн газрын хуралдаанаас гарсан шийдвэрийг Боловсрол, шинжлэх ухааны сайд Л.Энх-Амгалан танилцууллаа.

Тэрбээр “Засгийн газрын ээлжит хуралдаанаар их, дээд сургуулиудыг орон нутагт сургалт, эрдэм шинжилгээ, үйлдвэрлэлийн цогцолбор болгон хөгжүүлэх тогтоолыг албажуулан гаргалаа. Их, дээд сургуулиудыг орон нутагт хөгжүүлэх нь нийслэлийн түгжрэлийг бууруулахаас гадна орон нутгийн хөгжилд нөлөөлнө. Өнөөдрийн байдлаар  Монгол Улсын 88 их, дээд сургуульд 158 мянга гаруй оюутан суралцаж байгаа. Их, дээд сургуульд суралцаж буй 158 мянган оюутны 143 мянга нь буюу 92 хувь нь Улаанбаатар хотод суралцаж байгаа бол үлдсэн цөөхөн хувь нь орон нутгийн найман их, дээд сургуульд суралцаж байгаа юм.

          Засгийн газрын өнөөдрийн хуралдаанаар Эрдэнэт хот, Дархан-Уул, Өмнөговь аймагт сургалд, судалгаа, үйлдвэрлэлийн МУИС, ШУТИС, ХААИС-ийг байгуулах шийдвэр гарлаа. Ингэснээр орон нутагт ч Улаанбаатарт сурч болох боловсролыг хоцрогдолгүй эзэмших боломж бүрдэнэ. Одоогийн байдлаар Дархан-Уул аймаг, Эрдэнэт хотын их, дээд сургуульд 3500 орчим оюутан суралцаж байгаа. Нийт ачааллынхаа гуравны нэгээр ажиллаж байгаа юм. Үүнд Өмнөговь аймагт байгуулах сургуулийг нэмэгдүүлж, Эрдэнэт хот, Дархан-Уул, Өмнөговь аймагт нийт 15 мянган оюутан сурах боломжийг хангана. Ингэхдээ шинэ газар сургууль байгуулах бус, орон нутгийн сургуульд их засвар хийж, өргөтгөн цогцолбор сургууль байгуулна. Их засвар, өргөтгөлийн ажлын зардлыг 2022 оны төсөв тусгаж, 2022 оны нэгдүгээр сарын 1-нээс хэрэгжүүлж эхэлнэ. Дархан-Уул, Эрдэнэт, Өмнөговь аймагт хөдөө, аж ахуй, уул уурхайн сургууль байгуулагдахаар Улаанбаатар хотод давхацсан сургууль байхгүй болно.

          Орон нутагт их, дээд сургуулийн багш нар бага байдаг. Тиймээс орон нутаг руу сайн дураараа явж ажиллах болон сургууль нь орон нутагт шилжин ажиллаж байгаа багш нарт хөдөөгийн нэмэгдэл цалин олгож, ипотекийн 30 хувийн зээлд хамрагдах боломж олгоно гэж харж байгаа” хэмээсэн юм.