Н.АЛТАНХУЯГ: Ковидын эмийг дур мэдэж уугаад үхэх нь үхээд, эдгэрэх нь эдгэчихлээ

2021-10-14, 761

УИХ-ын чуулганы нэгдсэн хуралдаанаар Азийн дэд бүтцийн хөрөнгө оруулалтын банк хоорондын зээлийн хэлэлцээр /ковид 19-ийн эсрэг вакцинжуулалтын арга хэмжээ/ -ийн төслийг соёрхон батлах тухай хуулийн төслийг хэлэлцэж байна. Хэлэлцэж буй асуудалтай холбогдуулан УИХ-ын гишүүд асуулт асууж байна.

УИХ-ЫН ГИШҮҮН Н.АЛТАНХУЯГ: Ковидын нөхцөл байдал хэцүү байгааг ойлгож байна. Гэхдээ бид нарыг нэг жилийн хугацаанд авсан зээл маань тэрбум гаруй ам.доллар болж байгаа шүү. Яахав зээлийн хүү бага, хөнгөлөлттэй нөхцөлтэй гэж байгаа хэдий ч авч байгаа мөнгөө ариг гамтай хэрэглэмээр байна. Ямар вакциныг хэдий хэмжээгээр ямар үнээр худалдаж авах шийдвэрийг хэн гаргаж байгаа вэ. Вакцины бодлогоо тодорхой болгомоор байна. Одоо ирээдүйд хэдий хэмжээний вакцин нэмж авахаар төлөвлөж байгаа вэ. Түүнд хэдий хэмжээний хөрөнгө төлөвлөж байгаа вэ. Вакцин худалдан авах мөнгө байгаа юу эсвэл дахин зээл авах уу. Дээр нь энэ ковидол хэрэглэж байгаа эмээ тодорхой болгомоор байна. Хэдэн эмийн компанийн лоббид орж, боломж олгоод ард иргэдийнхээ амийг гаргуунд нь гаргамааргүй байна. Тан ууна гээд байгаа. Манайд тийм тан үйлдвэрлэх боломж байхгүй. Ковидын эмийг дур мэдэж уугаад үхэх нь үхээд, эдгэрэх нь эдгэчихлээ.

ЭРҮҮЛ МЭНДИЙН САЙД С.ЭНХБОЛД: Вакцины төлөлтийг Эрүүл мэндийн яам мэргэжлийн байгууллагатай хамтран гаргадаг. Бид зорилтот бүлэг буюу 18 дээш насны хоёр сая гаруй хүн вакцин хийнэ гэж төлөвлөгөө гаргасан. Өнөөдрийн байдлаар 7.3 сая тун вакцины татан авалтыг хийсэн. Вероселл вакцины дөрвөн сая тунг таван авсан. Олон улсын оношилгоо эмчилгээний удирдамжийн дагуу эм хэрэглэж байгаа. Бид арбидол гэдэг эмийг өвөрмөц эмчилгээнээс хассанаас биш өргөн хэрэглээнээс хасаагүй.

Н.АЛТАНХУЯГ: Ковидын эмийг дур мэдэж уугаад үхэх нь үхээд, эдгэрэх нь эдгэчихлээ