Нийслэлийн Онцгой комиссын ээлжит хуралдааны үеэр Нийслэлийн эрүүл мэндийн газрын дарга Б.Бямбадорж иргэдийн хөдөлгөөн цар тахлын өмнөх үеэс ч идэвхтэй байгааг онцлов. Тэрбээр “Халдварын эсрэг хариу арга хэмжээний хүрээнд бид нийтээрээ халдвараас хэрхэн урьдчилан сэргийлэх вэ гэдэгт анхаарах ёстой. Дэлхий дахинаа энэ өвчинтэй хэрхэн зохицож амьдрах талаар төлөвлөгөө гарч буй.

Бидний хийсэн судалгаагаар, өнөөдөр иргэд эмийн сан болон хүнсний дэлгүүр рүү чиглэсэн хөдөлгөөн коронавирусийн халдвар тархахаас өмнөх үеэс 125 хувиар нэмэгдсэн үзүүлэлт гарсан. Мөн автобусны буудал, нийтийн тээврийн зорчих хөдөлгөөн 63 хувиар, барааны дэлгүүр болон ресторан зэргээр үйлчлүүлэх хөдөлгөөн 34 хувиар тус бүр нэмэгдсэн байна. Энэ бол цар тахлын үед байх ёстой үзүүлэлт биш бөгөөд иргэдийн хөдөлгөөн энгийн үеэс ч идэвхтэй байгаа юм” гэв.