Засгийн газраас гаргасан зарим шийдвэрийг ЗГХЭГ-ын дарга Ц.Нямдорж, Эрчим хүчний сайд Н.Тавинбэх Уул уурхай, хөнгөн үйлдвэрийн сайд Г.Ёндон нар танилцууллаа. Энэ үеэр Ц.Нямдорж “Засгийн газрын хуралдааны шахмал түлш болон шатахууны талаарх асуудлыг хэлэлцсэн. Үүний дүнд өнөөгийн нөхцөл байдлыг ойрын хугацаанд хэвийн түвшинд оруулна. Салбар дундын хоорондын зохицуулалтын ажил учраас надаар ахлуулсан ажлын хэсэг гарна. Бүрэлдэхүүнд нь холбогдох сайд нар, нийслэлийн удирдлагууд оролцоно. Шахмал түлш, шатахуун, коронавирусийн халдварт өвчин гээд олон асуудал улстөрийн хурцадмал үед бий болж байна. Үүнийг дагасан таагүй үйл ажиллагаанууд болж байгаа. Цар тахлын нөхцөл дэлхий нийтээр хүнд байна. Үүнд Засгийн газар, Эрүүл мэндийн яам, Улсын онцгой комисс холбогдох арга хэмжээнүүдийг авч ажиллаж байна. Дэлхий нийтэд цар тахлаас гадна Орос, Америк, Хятад зэрэг улс орнуудын дунд ил далд хэлбэрээр тэмцэл өрнөж, бараа бүтээгдэхүүний үнэ нэмэгдэж байна” гэлээ.