Монгол Улсын Засгийн газар шатахууны асуудлаар ээлжит бус хурал зарлажээ.

Одоогийн байдлаар зарим шатахуун түгээх станц АИ-92 болон АИ-95 автобензиныг олгож байгаа ч гишүүнчлэлийн карт болон талонд үндэслэн олгож байгаагаас урт дараалал үүсээд байгаа юм.

          Өчигдөр Засгийн газрын ээлжит хуралдаан болж, 10 гаруй асуудлыг хэлэлцэж, танилцуулсан. Засгийн газрын гаргасан шийдвэрийн талаар ЗГХМОНХГ-ын ажилтан О.Бямбагэрэл “Даваа гарагт Ерөнхий сайд Л.Оюун-Эрдэнэ Гашуунсухайтын хилийн боомтод ажилласан. Тиймээс Засгийн газрын хуралдаанаар Гашуунсухайт боомт дахь асуудлыг шийдвэрлэхээр болсон. Тодруулбал, тус боомтод нэмэлтээр PCR төхөөрөмж бүхий лаборатори байгуулна.Тус зардлыг Засгийн газрын нөөц сангаас гаргана.

          Мөн шатахууны хомсдолтой холбоотой асуудлыг УУХҮ-ийн сайд танилцуулсан. Үүнтэй холбоотойгоор шатахууны нөөц хомсдоход нөлөөлсөн байж болзошгүй албан тушаалтанд хариуцлага тооцохыг Ерөнхий сайд үүрэг болгосон" гэсэн.

          Мөн Уул уурхай, хүнд үйлдвэрлэлийн сайд Г.Ёндон  "Роснефть" компаниас сар бүр 28 мянган тонн бензин авах ёстой. Гэвч тэд 17 мянган тонныг нийлүүлэх боломжтой гэсэн тул БНХАУ-аас 43 мянган тонн шатахуун авах захиалга өгсөн. ОХУ-аас 17 мянган тонн шатахуун ирнэ гэж тооцсон ч энэ сард 7500 тонныг нийлүүлсэн. Үлдэгдлийг ирэх сарын 1-н хүртэл нийлүүлэх боломжгүй гэсэн юм. Мөн БНХАУ-ын талаас Хөх хотын боловсруулах үйлдвэрээс манай улсад бензин нийлүүлэх боломжгүй гэсэн. Тиймээс найм хоногийн турш шатахууныг хязгаартай худалдах боллоо.

          Бээжинд суугаа Элчин сайд нот бичиг өгч, холбогдох хүмүүстэй уулзаж байна. Тус улсад сүүлийн хоёр хоног амралтын өдрүүд байв. Зам тээврийн яам, ГХЯ энэ асуудлыг шийдэхээр ажиллаж байна. Хөх хотоос Жинин боомтод саатаж, Замын-Үүдээр дамжин шатахуун ачсан галт тэрэг орж ирнэ. Тээврийг аль болох хурдан хийхээр ажиллаж байна. Учир нь хоёр галт тэрэгнээс нөгөө рүү нь ачна, агуулахад буулгасны дараа аж ахуйн нэгжүүд авах гээд олон шат дамжлага бий. Манай арми, ОБЕГ өөрийн нөөцтэй. Бүх хэрэглэгчид жигд хүртээхийн тулд бид хязгаарлалт тавьж байна. Ерөнхий сайд даалгасны дагуу бид буруутай гэж үзсэн албан тушаалтанд арга хэмжээ авна. Мэдээллээ боловсруулаагүй юу, ажилдаа хайнга хандсан уу гэдгийг тогтооно” гэсэн юм.