Ерөнхий сайд Л.Оюун-Эрдэнэ шатахууны хомсдол үүссэнтэй холбоотойгоор шатахуун импортлогчидтой өнөөдөр буюу есдүгээр сарын 21-ний өдрийн 11:00 цагаас хаалттай уулзсан. Тэгвэл үүнтэй холбоотойгоор Уул уурхай, хүнд үйлдвэрийн сайд Г.Ёндон мэдэгдэл хийлээ.

Тэрбээр "Монгол Улс сарын 38-40 мянган тонн АИ-92 автобензин хэрэглэдэг. Сард хэрэглэх нийт АИ-92 автобензины 95 хувийг нь ОХУ, 5-10 хувийг БНХАУ-аас нийлүүлдэг. Монгол Улс ОХУ-аас авах импортын шатахууны хэмжээг гэрээгээр зохицуулдаг. Үүнд хамгийн багадаа ОХУ-аас Монгол Улсад 28 мянган тонн шатахууныг өгөх ёстой гэж тусгасан. Гэвч наймдугаар сарын сүүлчээс “Гэрээнд тусгасан хэмжээний шатахуун нийлүүлж чадахгүй. 17 мянган тонн шатахуун нийлүүлэх боломжтой” гэсэн.

          Тийм учраас бид хэрэгцээгээ хангахын тулд БНХАУ-тай Монгол Улсын таван ах ахуйн нэгж гэрээ хийсэн. Өнөөдрийн байдлаар сар гаруй хугацаанд хэрэглэх автобензины нөөцийг авахаар БНХАУ-д мөнгийг нь төлж, вагоны кодоо авсан байгаа.

          Гэтэл ОХУ-аас аравдугаар сарын 1-нийг хүртэл шатахуун нийлүүлэхгүй боломжгүй болсон. Мөн БНХАУ-ын төмөр замын компанийн дотоод ачаа тээврийн ачаалал их байгаа учир Монгол Улсаас захиалсан шатахууныг ирэх аравдугаар сард нийлүүлэхээ мэдэгдсэн. Иймд нөхцөл байдалдаа тохируулж аж ахуйн нэгжүүдэд автобензины хязгаарлалт хийсэн. Дараагийн импортын шатахуун ирэх 5-7 хоногт ирнэ. Импортын шатахууны эхний вагон ирэх хүртэл нөөцөлсөн шатахууныг задлахгүй. Эхний вагон ирэх хүртэл хязгаарлалт үргэлжилнэ” хэмээсэн юм.