Монгол Улсын Засгийн газрын ээлжит хуралдаан өнөөдөр буюу наймдугаар сарын 18-ны өдөр болсон. Ээлжит хуралдаанаас гаргасан шийдвэрийг Харилцаа холбоо, мэдээллийн технологийн газрын дарга Б.Болор-Эрдэнэ танилцуулсан юм.

"E-Mongoliа 2"-ыг 2021 оны аравдугаар сарын 1-нд ашиглалтад оруулах аж. "E-Mongoliа 2"-т  шинээр таван зүйл нэмж байгаа юм байна.

Үүнд: 

1. Монгол Улсын иргэн дунджаар 5-12 бичиг баримттай бөгөөд бүх бичиг баримтыг холбосон
2. Хиймэл оюун ухаан ашиглан өөрт нь зориулсан үйлчилгээг санал болгоно
3. Хэрэглэхэд илүү хялбар, ойлгомжтой болно
4. ААН-үүдэд зориулсан шинэ үйлчилгээ нэмнэ
5. Авлига хүнд сурталтай үйлчилгээг эхэлж цахимжуулах юм. 

Харилцаа холбоо, мэдээллийн технологийн газрын дарга Б.Болор-Эрдэнэ  “Жолооны үнэмлэхээ мартаж гараад машинаа бариад явж байтал цагдаа зогсоогоод хурууны хээгээр нь таныг мөн гэдгийг баталчихаад байхад үнэмлэхгүй явж байна гэж торгодог. Тийм учраас энэ асуудлуудыг шийдэх юм. Мөн виз бөглөхөд гадаад паспортынхоо бүх мэдээллийг оруулдаг. Тэр бүх мэдээллийг гаргаж өгнө. Ингэснээр лавлагаа тодорхойлолт авах нь багасаж, иргэд олон бичиг баримт аваад явах шаардлагагүй болно.

          Шинээр гэр бүлтэй эсвэл нялх хүүхэдтэй болох, байр, машин авахтай холбоотой үйлчилгээг оруулна. Эрүүл мэнд, боловсрол, нийгмийн хамгааллын үйлчилгээг хамгийн түрүүнд оруулна. Мэдээж хэрэг "E-Mongolia 1"-ийг сайжруулах шаардлагатай. Тиймээс тухайн аппликэйшн болон вэбийг ашиглахад хялбар болгоно. Хурууны хээгээр, нүүрээр таних функцуудыг оруулахаар ажиллаж байна. Ажил бүтээхэд туслах багц үйлчилгээ нэмэлтээр орж байгаа. 

          Иргэдийн ойлгодог хэллэгээр үйлчилгээг гаргаж өгөх боломж бүрдсэн. ААН, бизнес эрхлэгчдийн зүгээс хамгийн их гомдол гаргадаг зүйл нь компани байгуулах. Компанийн нэрээ хайхаас эхлээд гэрчилгээгээ хүргүүлээд авах хэмжээнд хүртэл энэ үйлчилгээг нэвтрүүлнэ. Ачаа тээвэрлэлтийн С зөвшөөрлийн асуудлыг цахимжуулна. "E-Mongoliа 2”-ын хөгжүүлэлтийг 200-300 сая төгрөгт багтааж хийнэ" гэсэн юм.