Монгол Улсын Ерөнхий сайд Л.Оюун-Эрдэнэ БНСУ-д ажлын айлчлал хийж буй. Тэрбээр өнөөдөр БНСУ-ын Ерөнхий сайд Ким Бү Гём-тэй ажлын уулзалт хийжээ. Уулзалтын үеэр хоёр орны Ерөнхий сайд хамтын ажиллагаагаа стратегийн түншлэлийн түвшинд хүргэх, өндөр түвшинд харилцан айлчлалын давтамжаа нэмэгдүүлэх, эдийн засгийн хамтын ажиллагаа, худалдаа, хөрөнгө оруулалтыг шинэ түвшинд гаргах тухай ярилцаж, томоохон төсөл хөтөлбөрийн талаар санал солилцлоо.

    Мөн Ерөнхий сайд Л.Оюун-Эрдэнэ тус улсын хичээл сургуулийн үйл ажиллагааг хэрхэн зохицуулж, эмчилгээнд ямар эм хэрэглэж, эдийн засгийн цаашдын төлөв байдлыг хэрхэн харж буй зэрэг цар тахлын үед БНСУ-ын Засгийн газраас авч хэрэгжүүлж буй бодлого, арга хэмжээний талаар сонирхож мэдээлэл авсан байна. БНСУ дахь дельта вирусын тархалт, вакцины дархлаажуулалтын үр нөлөө, эмийн хэрэглээний талаар ч ярилцаж амжижээ.

Хоёр тал олон улс, бүс нутгийн тавцанд хамтын ажиллагааг гүнзгийрүүлж, ялангуяа Зүүн хойд Азийн бүс нутгийн энх тайван, аюулгүй байдлыг хангах чиглэлд үргэлжлүүлэн хамтран ажиллахаар тохиролцсон байна.