Засгийн газар өнгөрсөн баасан гарагт болсон ээлжит бус хуралдаанаар Авлигын индексийг бууруулах ажлын баг байгуулсан. Ийнхүү Ерөнхий сайд Л.Оюун-Эрдэнэ “Транспэрэнси интернэшнл Монгол” байгууллагын төлөөллийг өнөөдөр хүлээн авч уулзан санал солилцлоо. Одоогийн байдлаар Монгол Улс Авлигын төсөөллийн индексээр 111 дүгээр байранд жагсаж байгаа бөгөөд Ерөнхий сайд энэ жагсаалтыг хоёр жилийн хугацаанд хоёр оронтой тоонд оруулах зорилт тавьж байгаагаа онцолжээ. Харин “Транспэрэнси Интернэшнл” байгууллагын зүгээс хоёр жилийн хугацаанд авилгын индексийн жагсаалтыг хоёр оронтой тоонд оруулна гэдэг амаргүй, хүнд зорилт гэдгийг тэмдэглэв. Мөн Ерөнхий сайд Л.Оюун-Эрдэнэ “Aвлигын гэмт хэргийг бий болгож байгаа суурь хүчин зүйлс буюу хууль эрх зүйн орчныг сайжруулах, цахим шилжилтийг эрчимжүүлнэ” гэв. Түүнчлэн “Авлигатай тэмцэхэд хэвлэл мэдээлэл, олон нийтийн дэмжлэг хэрэгтэй” гэлээ.

  Тус уулзалтын үеэр Эрүүгийн болон уул уурхай, улс төрийн намын тухай хуульд өөрчлөлт оруулах, “Шүгэл үлээгч”-ийн тухай хууль боловсруулах зэрэг эрх зүйн орчныг сайжруулах, иргэдийн авлигын эсрэг боловсролд анхаарах зэрэг асуудлаар санал солилцжээ.