Монгол Улсын их хурал Хөдөлмөрийн тухай хуулийн шинэчилсэн найруулгын төслийг эцэслэн баталлаа. Тус хуулийн төслийн ажлын хэсгийн ахлагчаар УИХ-ын гишүүн Ц.Мөнх-Оргил ажилласан юм. Шинээр баталсан Хөдөлмөрийн тухай хууль 11 бүлэг 166 зүйлтэй бөгөөд 2022 оны нэгдүгээр сарын 1-нээс хүчин төгөлдөр хэрэгжинэ.

      Хуулийн төсөл батлагдсаны дараа ажлын хэсгийн гишүүд мэдээлэл хийлээ. Энэ үеэр УИХ-ын гишүүн М.Оюунцэцэг “2009 оннос хойш гурван парламент, таван Засгийн газрын босгыг давж чадахгүй байсан Хөдөлмөрийн тухай хууль өнөөдөр батлагдлаа. Энэ хуулийн гол зорилго бол Монголын үндэснийн хөдөлмөрийн зах зээл дээр хөрвөх чадвартай боловсон хүчин бэлтгэх, ажилтан, ажил олгогч, нийгмийн түншлэлүүдийн хөдөлмөрийн зохистой харилцааг бий болгох юм. Энэ хууль манай улсын болон олон улсын хөдөлмөрийн зах зээлийн чиг хандлагатай уялдсан, тал талын зохистой харилцааг бүрдүүлсэн цогц хууль боллоо” гэв. 

       

     Мөн хуулийн төслийн ажлын хэсгийн ахлагч Ц.Мөнх-Оргил гишүүн “Хууль батлагдлаа. Одооноос зургаан сарын хугацаанд Монгол Улсын Засгийн газар, Үйлдвэрчний эвлэл, МҮХАҮТ-тэй хамтарч хуулийг сурталчлах, хэрэглэх зааврыг нь таниулах хэрэгтэй. Энэ хуулийг баталснаар Монгол Улсад Хөдөлмөрийн харилцаа шинэ шатанд гарна” гэлээ.

 

      УИХ-ын гишүүн Б.Баярсайхан “Хөдөлмөрийн тухай хуульд анх удаа байгууллага бүр хүүхэд хамгааллын бодлоготой байх тухай зүйл, заалт орууллаа. Монголд Жилд 25 мянган хүүхэд гэртээ гэмтэж бэртэж, хүчирхийлэлд өртөж байна гэсэн тоо баримт бий. Иймээс байгууллагууд эцэг эхчүүдийг ажлын бус цагаар ажиллуулдаггүй байх, тэднийг гэр бүлдээ гаргах цагтай байлгах хариуцлагатай эцэг, эх байх боломжийг нь олгох зүйл, заалт оруулсан. Мөн ажлын байрны бэлгийн дарамтын тухай зүйл, заалтыг нарийвчлан орууллаа. Ажлын орчин гэсэн хэсэгт ажлын орчин гэдэгт зөвхөн ажлын байр бус, томилолт болон ажилдаа ирэх, тарах үед ажлын машинаар явж буй цаг хугацаа, мөн спортын тэмцээн, аялал зугаалгаар явж буй цаг хугацаа зэргийг хамруулна гэж тусгасан. Мөн 0-3 хүртэлх насны хүүхэдтэй ч ажлаа хийж байгаа ээжийг амралтаар болон ажлын бус цагаар ажиллуулах, хөдөө орон нутаг, гадны улс руу томилолтод явуулахыг хориглосон. Залуу гэр бүлээ дэмжиж, дөнгөж төрсөн хүүхдийн аавуудад 10 хоногийн цалинтай чөлөө олгох зэргийг хуульчиллаа” хэмээв.

        Түүнчлэн шинэчлэн баталсан Хөдөлмөрийн тухай хууль нь өмнөх хуульд заасан ажил олгогч, ажилтан хоёрын харилцаанаас өргөн хүрээтэй болжээ. Тухайлбал, ажил олгогч мянгат малчин туслах малчинтайгаа гэрээ байгуулах, хөрөнгөө хэрхэн даатгах тухай нарийвчлан заажээ. Мөн тус хуульд хөгжлийн бэрхшээлтэй иргэний хөдөлмөрийн харилцаа, ажлын байрны бэлгийн дарамтын талаар нарийвчилсан зүйл, заалтууд оржээ.  

Б.Бадамзул