Засгийн газрын ээлжит хуралдаан өнөөдөр болж буй. Уг хуралдаанд Улаанбаатар хотын талаар хэд хэдэн чухал асуудал хэлэлцэн, шийдвэрлэжээ. Тухайлбал, Нийслэлийн эрх зүйн байдлын тухай хууль, хотын төвлөрлийг задалж, түгжрэлийг бууруулах, Гандан орчимд аялал жуучлал хөгжүүлэх зэрэг асуудлыг шийдвэрлэсэн байна.

Энэ талаар хотын захирагч Д.Сумъяабазар “Өнөөдөр засгийн газрын хуралдаанаар түүхэн гэж болох шийдвэрүүд гарч байна. Харин нийслэл Улаанбаатар хоттой холбоотой гурван чухал асуудал хэлэлцсэнээс Нийслэлийн эрх зүйн байдлын тухай хуулийн төслийг онцолмоор байна. Уг хуулинд 1994 онд өөрчлөлт орсон байдаг. Үүнээс хойш үндсэндээ 27 жил огт шинэчлэлт хийгдээгүй.  Долоон бүлэг 51 зүйлээс бүрдсэн энэ хууль бол манай хотын иргэдийн  нийгэм, эдийн засгийн амьдралд ахиц авчирч, өөрчлөлт өгнө гэж үзэж байгаа. Нэг талаас эдийн засгийн бие даасан байдлыг бий болгох, нөгөө талаас эрх зүйн шинэ зохицуулалтыг хийе гэсэн бодлоготой байна. Монгол Улсын Засгийн газар нийслэлийн тухай асуудлыг бодлогынхоо эхэнд тавин ажиллаж буйг онцлох хэрэгтэй. Энэ гурван жилийн хугацаанд бид яаж ажиллахаас хамаарч хотын өнгө төрх сайжирна” гэв.

Мөн “Уламжлалт хэв маягийг хадгалсан аялал жуулчлалын бүс бий болгоход Гандан хийдийг түшиглэнэ. Тухайн орчмыг автомашингүй бүс болгох юм. Өнөөдрийн байдлаар 55.8 га газарт гэр хорооллын айл өрхүүд бий. Эдгээр айл өрхтэй тохиролцоно” хэмээн ярилаа.