Өнөөдөр Ардчилсан намаас цаг үеийн асуудлаар мэдээлэл хийлээ.

Энэ үеэр тус намын ерөнхий нарийн бичгийн дарга Ч.Өнөрбаяр “Энэ сарын 25-нд Монгол Улсын шинээр сонгогдсон Ерөнхийлөгч тангараг өргөнө. Энэ өдөр цэргийн ёслолын парад явуулна гэдэг бол энэ цаг үед байж болохгүй юм. Халх голын дайнд 274 иргэнээ алдчихаад гашуудаж, хүндэтгэл үзүүлж байсан. Тэгвэл өнөөдөр цар тахлаас болоод монголчууд 636 иргэнээ алдсан байна. Ийм хүнд цаг үед шинээр сонгогдсон Ерөнхийлөгч тангараг өргөж таарахгүй. Зургадугаар сарын 25-ыг үндэсний эмгэнэлийн өдөр болгож зарлах ёстой гэж би хувьдаа харж байгаа.

Цар тахлаас болж амь насаа алдсан иргэдээсээ уучлалт гуйх ёстой. Монголын төр засаг шагнал, шийтгэл гэдэг хоёрхон зүйлийг мэддэг боллоо. Тухайлбал, нэг тэрбум төгрөгөөр 100 жилийн ойн медаль хийж тараах тухай ярьж байна. Яагаад энэ мөнгөөр амьсгалын аппарат нэмж авч болохгүй байгаа юм.

Манай улсад ердөө 900 ширхэг амьсгалын аппарат байгаа. Өнгөрсөн хоёр жилийн хугацаанд Засгийн газар яагаад бэлдээгүй юм бэ” гэв.

Мөн тэрбээр “Цар тахлын улмаас нас барсан иргэдэд нөхөн төлбөр өгөх ёстой. 10 тэрбум төгрөгөөр наадам зохион байгуулна гэж яриад л байгаа юм. Гэтэл коронавирусээр нас барсан иргэдийн ар гэрт 10 сая төгрөгийн нөхөн олговор өгөхөд 4.3 тэрбум болно. Шагнал гардуулах асуудалд амархан мөнгө босгож чаддаг юм байна. Наадам хийхэд ч мөнгө гаргачихдаг юм байна. Тэгвэл яагаад иргэддээ нөхөн төлбөр өгч чадахгүй байгаа юм. Ард иргэдээ бодох хэрэгтэй байна” гэсэн юм.