Орон нутгийн сонгууль хаяанд ирсэн энэ үед бид иргэдээ төлөөлөх учиртай аймаг, нийслэлийн ИТХ-ын төлөөлөгчдийн авлига, албан тушаалын хэрэгт холбогдсон хийгээд тендер завшсан баримтуудыг цувралаар хүргэж байгаа билээ. Тэгвэл энэ удаа Баянхонгор аймгийн ИТХ-ын төлөөлөгчдийг онцолж байна. 2020 оны орон нутгийн ээлжит сонгуулиар Баянхонгор аймгийн ИТХ-д 28 тойргоос 41 төлөөлөгч сонгогдон ажиллаж байгаа юм. Тэднээс авлигын хэрэгт холбогдсон, мөн тендер завшдаг дараах төлөөлөгч нарыг онцолж байна.

АВЛИГЫН ХЭРЭГТ ХОЛБОГДСОН Ц.ОТГОНБАЯР

Баянхонгор аймгийн ИТХ-ын төлөөлөгч Цагааны Отгонбаяр нь 2016-2020 онд аймгийнхаа ИТХ-ын даргаар ажиллаж байсан. Тухайн үедээ аймгийн Засаг дарга Г.Батжаргал тэргүүтэй албан тушаалтнуудтай хамтран эрх мэдлээ урвуулж, “Эко грийн ланд” ХХК-ийн удирдлагаас 100 сая төгрөгийн хахууль авсан хэрэгт холбогджээ. Эл компани нь тус аймгийн Баян-Өндөр сумын нутаг Хөшөөт гэх газарт нөхөн сэргээлт хийх тендерт шалгарахын тулд хахууль өгсөн аж.

Ц.Отгонбаяр, Г.Батжаргал тэргүүтэй зургаан хүнд холбогдох албан тушаал, авлигын гэх хэргийг Баянхонгор аймаг дахь Сум дундын эрүүгийн хэргийн анхан шатны шүүх 2023 оны аравдугаар сард хэлэлцээд, гэм буруутайд тооцсон. Улмаар шүүхээс Ц.Отгонбаярыг хахууль авсан гэм буруутайд тооцож, төрийн албанд ажиллах эрхийг дөрвөн жил хасаж, 20 сая төгрөгөөр торгосон байдаг. Мөн тэдний авсан 100 сая төгрөгийг гаргуулж, улсын орлогод хураахаар шийдвэрлэсэн. Гэтэл Ц.Отгонбаяр Давж заалдах шатны шүүхэд хандсанаар анхан шатны шүүхийн шийдвэр хүчингүй болсон байна.

Энэ талаар Ц.Отгонбаяр өнгөрсөн дөрөвдүгээр сард “ИТХ-ын дарга авлига авах боломж байхгүй. Ийм хэргээр намайг шалгаж, анхан шатны шүүхээс авлига, албан тушаалын хэрэгт холбогдсон гэх шийдвэр гарсан. Үүнийг миний бие хүлээн зөвшөөрөхгүй, нэг талыг барьсан шийдвэр хэмээн Давж заалдах шатны шүүхэд хандсан. Ийн Давж заалдах шатны шүүхээс анхан шатны шүүхийн шийдвэрийг хуульд нийцээгүй гэж хүчингүй болгосон” хэмээн мэдэгдсэн.

Түүнчлэн дээрх хоёр албан тушаалтан газар зохион байгуулалтын нэмэлт төлөвлөгөөнд тусгаагүй газрыг таксины болон худалдаа үйлчилгээний зориулалтаар хууль зөрчин олгосон, мөн ашигт малтмал олборлох зөвшөөрөл өгсөн зэрэг хэд хэдэн авлигын үйлдэлд холбогдож байжээ.  

Ц.Отгонбаяр нь өдгөө аймгийн ИТХ-ын төлөөлөгч хийхийн зэрэгцээ “Баянхонгор үйлдвэржилт хөгжлийн корпораци” ХХК-ийн төлөөлөн удирдах зөвлөлийн даргын албан тушаалыг хашдаг, “давхар” дээлтэй. Тэрбээр аймгийнхаа ИТХ-ын даргаар 2016 оны долдугаар сард томилогдсон бөгөөд “Баянхонгор үйлдвэржилт хөгжлийн корпораци” ХХК нь тус оны аравдугаар сард ИТХ-ын тогтоолоор байгуулагдсан байдаг. Тус компани нь бичил бизнес эрхлэгч нарт шинээр бизнес эрхлэхэд туслах, тэдний үйл ажиллагааг өргөжүүлэх, гадаад зах зээлд гаргах  бодлогыг баримтлах, хөнгөлөлттэй зээл олгох зорилготой аж.

ТЕНДЕР ТҮҮДЭГ ТӨЛӨӨЛӨГЧ Д.САЙНЖАРГАЛ

Дараагийн танилцуулах хүн бол Баянхонгор аймгийн ИТХ-ын төлөөлөгч Далайгийн Сайнжаргал. Тэрбээр нэгдүгээр сургууль, Батлан хамгаалахад туслах нийгэмлэгийн авто курс төгссөн, “Гал-Ой” хувиараа эрхлэх аж ахуйд жолооч, 2005 оноос одоог хүртэл “Гал хонгор” ХХК-ийн захирлын албыг хашиж буй.

Тэгвэл “Гал хонгор” ХХК нь өнгөрсөн зургаан жилийн хугацаанд 4.35 тэрбум төгрөгийн тендерт шалгарсан байна. Тэдгээрийг танилцуулъя.

• 2020 он Баянзүрх дүүргийн ЭМТ-н салбар 1-р амбулаторийн 1-р давхарт засвар хийж Эрүүл мэндийг дэмжих төв болгох 250 сая
• 2018 он Баянхонгор, Өлзийт сумын ЗДТГ-ын  барилга 850 сая
• 2018 он Баянхонгор, Баянхонгор сумын 280 ортой цэцэрлэгийн барилга, 2.05 тэрбум
• 2022 он Өмнөговь аймагт Иргэдийн орон сууцны нөхцөл сайжруулах, хангамжийг нэмэгдүүлэх зорилгоор "Шинэ мянган айл" орон сууцны хөтөлбөрийг хэрэгжүүлэх 1.2 тэрбум төгрөгийн тендерт тус тус шалгарч байжээ.

Мөн тус компани нь "Хаш гоёо" ХХК-тай хамтран  Баянхонгор аймгийн Шинэ суурьшлын бүсэд 140 айлын хаус хороолол байгуулахаар өнгөрсөн 2023 оны арванхоёрдугаар  сард аймгийн удирдлагуудтай Санамж бичиг байгуулж, энэ оноос ажлыг эхлүүлэхээр болжээ.

Тэрбээр 2023 оны хөрөнгө орлогын мэдүүлэгтээ өөрийн орлого 32 сая, гэр бүлийн орлого 18 сая, 606 сая төгрөгөөр үнэлэгдэх нийтийн хоёр орон сууц, үйлчилгээний хоёр барилга, 220  сая төгрөгийн “Lexus 570” маркийн автомашинтай. 1000 ам метр буюу 15 сая төгрөгөөр үнэлэгдэх нэг газартай, 20 сая төгрөгийн үнэт эдлэлтэй гэж мэдүүлжээ.

ТЕНДЕР ТҮҮДЭГ ТӨЛӨӨЛӨГЧ Ж.ХОСБАЯР

Баянхонгор аймгийн ИТХ-ын төлөөлөгч Жаргалбаатарын Хосбаяр нь гадаад худалдааны чиглэлээр үйл ажиллагаа явуулдаг “Гичгэнэ Хяр” ХХК-тай. Тэгвэл тус компани нь 2019 оноос хойш 3.4 тэрбум төгрөгийн өртөг бүхий 11 тендерт шалгарсан байна. Тодруулбал,

• 2018 он Архангай, Цэнхэр сумын сургуулийн засвар 80 сая
• 2019 он “Архангайд үйлдвэрлэв” худалдааны төвийн тохижилт 50 сая
• 2019 он Архангай, Өндөр-Улаан сум, Хануй багийн төвийн барилга 100 сая
• 2019 он Усан сангийн брилгын их засвар, Усны машин цэнэглэх өргөх станц шинээр барих 27 сая
• 2020 он Эрдэнэт үйлдвэрийн түлшний нэмэлт бүтээгдэхүүн 33.7 сая
• 2021 он МУБИС-ийн БоСС-ийн агааржуулалтын иж бүрэн систем засварын ажил 80 сая
• 2022 он Төрийн үйлчилгээний автомашинуудын хэвийн үйл ажиллагааг хангах хүрээнд Өмнөговь аймгийн Цогт-Овоо сумын Цагдаагийн хэсгийн автомашиныг шинэчлэх 80 сая
• 2023 он Нийтийн биеийн тамирыг дэмжин хөгжүүлэх зорилгоор Өмнөговь аймгийн Хүрмэн сумын төвд цэнгэлдэх хүрээлэнгийн барилгыг барьж ашиглалтад оруулах 1.5 тэрбум
• 2024 он Төрийн банкны Баянхонгор аймгийн Галуут тооцооны төвийн засварын ажил гүйцэтгэх 83.4 сая
• 2024 он Хан-Уул дүүргийн наймдугаар хороо 209 дүгээр цэцэрлэгийн гадна тохижилтын ажил 200 сая
• 2024 он Өмнөговь аймгийн Буянт хотхон УТҮГ-ын Хүүхдийн ордныг засварлах 1.2 тэрбум төгрөгийн төсөвт өртөгтэй тендерт тус тус шалгарчээ.

Дээрх баримтуудаас Баянхонгор аймгийн иргэн та сонгосон ИТХ-ын төлөөлөгч нар нь өнгөрсөн хугацаанд иргэдийг төлөөлөх үүргээ хэрхэн биелүүлсэн талаар дүгнэлтээ хийж, дүнгээ тавина биз ээ.