Мянгуужингийн үлгэрээр орсон Дарханы замаа анхаараач ээ, Л.Халтар сайд аа

2021-06-02, 1000

Дархан-Уул, Улаанбаатар чиглэлд дөрвөн эгнээ дэлхийн жишигт нийцүүлсэн автозам барина гэснээс хойш даруй гурван жилийн хугацаа өнгөрчээ. Азийн хөгжлийн банкны санхүүжилтээр 2018 онд эхлүүлсэн 204.11 км автозамыг хоёрхон жилийн дотор барьж, 2020 онд ашиглалтад өгөхөөр төлөвлөсөн боловч уг зам өнөөдрийг хүртэл ашиглалтад ороогүй хэвээр байна. Дарханы дөрвөн эгнээ замын хоёр эгнээг нь Азийн хөгжлийн банкны санхүүжилтээр, нөгөө хоёр эгнээг нь Европын сэргээн босголт хөгжлийн банкны санхүүжилтээр барьж байгаа. Азийн хөгжлийн банкны санхүүжилтээр хийгдсэн ажлын хувьд I багц 90 орчим, III багц 60 гаруй, V багц 70 гаруй хувийн гүйцэтгэлтэй яваа гэх мэдээлэл бий. Харин Европын сэргээн босголтын банкны зээлээр мөн адил таван багц ажил хийхээр төлөвлөсөн. Сонгон шалгаруулалт хийгдээд ажил эхэлсэн гэдэг мэдээлэл бий.

Сайд дарга нар ээлж дараалан зам дээр очиж танилцдаг ч тодорхой шийдэлд хүрсэн нь ховор. Саяхан Ерөнхий сайд Л.Оюун-Эрдэнэ замын ажилтай танилцаж, 2022 он гэхэд тус автозамыг бүрэн хүлээлгэж өгөх үүрэг чиглэл өгөөд ирсэн.

Угтаа бол дахиад жил гаруй хугацаанд Дарханыхан энхэл донхол, шороо, тоостой замаар зорчих нь. Замын ажлыг үргэлжлүүлэхээр жил болгоны хавар сүр дуулиатай зарладаг ч эд бүтээн байгуулалт эхлэх үед нь хаанаас ч юм бүү мэд ямар нэг саад гараад ирэх нь олонтаа.

Сүүлийн хоёр жил гэхэд цар тахлын нөлөөгөөр гаднаас ажиллах хүч ирэх боломжгүй болж, хугацаанд нь эхлүүлэх байсан авто замын төсөл саатсан. Уг нь энэ замын ажлыг Тавантолгой-Зүүнбаян чиглэлийн төмөр зам дээр ажилласан цэргийн алба хаагчид хийсэн бол ердөө 14-хөн хоногийн дотор хийж дуусгах тооцоо гарсан гэдэг. Гэтэл дотоодын нөөц бололцоогоо ашиглахаас илүүтэй гадныхныг царай алдаж, бүтээн байгуулалтын ажлыг олон жил гацаанд оруулж буй.

Гурван Засгийн газрын нүүрийг үзсэн тус замын ажлыг 2022 оны арванхоёрдугаар сар гэхэд ашиглалтад оруулах бол Зам тээврийн сайдын толгойтой ярина гээд Ерөнхий сайд Л.Оюун-Эрдэнэ лүндэн буулгачихсан. Үнэхээр Ерөнхий сайд нар хэлсэндээ хүрч хариуцлага тооцдог бол Дарханы зам хэдийнэ ашиглалтад орчихсон дурайж байх байлаа. Зам тээврийн хөгжлийн сайд асан Б.Энх-Амгаланд ч Ерөнхий сайд асан У.Хүрэлсүх яг ийм хариуцлага үүрүүлж байсан санагдана.

Азийн хөгжлийн банкны санхүүжилтээ эхлүүлсэн I, III, V багцууд долдугаар сарын 1-н гэхэд бүрэн дуусахаар төлөвлөсөн гэдгийг албаныхан мэдээллээд байгаа. Энэ урсгалын зам таван см зузаан асфальтан хучилттай байсан бол 10 см-ийн зузаантай болгож түвшинг нь ижил болгохоор зорьж байгаа гэх. Учир нь, гэвэл Европын сэргээн босголтын хөгжлийн банкны санхүүжилттэй нөгөө хоёр урсгал нь 10 см зузаан асфальттай болох юм гэнэ.

Азийн хөгжлийн банкны II, IV багцтай холбоотой асуудал ЗТХЯ, Засгийн газар, Азийн хөгжлийн банк дээр асуудалтай байгаа аж. Учир нь, өмнө нь нэг ч ажил гүйцэтгээгүй, туршлагагүй, тоног төхөөрөмжгүй компанид тендер өгчихсөн байсан гэх яриа ч бий. Дархан-Улаанбаатар чиглэлийн авто замтай холбоотой олон хүн амь нас, эрүүл мэнд хохирсон удаатай. Иймд У.Хүрэлсүх даргынхаа сонгуулийн ажлаас хөндийрч Дарханы замын ажлаа эрчимжүүлнэ үү Л.Халтар сайдаа.

Мянгуужингийн үлгэрээр орсон Дарханы замаа анхаараач ээ, Л.Халтар сайд аа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид