Онгоцонд сууснаа, бүр эх орондоо ирснээ ч санахгүй болтлоо “өвчин” нь хүндэрч, хүнд шатандаа орсон гишүүн төрийн эрх барилцаж, Говь-Алтайчуудыг төлөөлж, УИХ-ын хойморт заларч буй. Бүүр УИХ-ын чуулгандаа оролцож, асуулт асууж, санал хэлж, хууль батлах товчлуур дээр баруун, зүүн гараараа ээлжлэн дараад таахалзаж явсан, тэр эрхэм. Цар тахлын үед бүтэн хоёр жилийн хугацаанд хүсэлт гаргаад ч эх орондоо ирж чадахгүй байгаа элэг нэгт монголчуудынхаа урдуур оочер дайрч, оготно, зурам шиг нуугдаж ирснийгээ хээв нэг дарж, “Би ачаа тээврийн онгоцоор ирээгүй” хэмээн мэлзсэн нь үнэнд гүйцэгдэж, тэрбээр ачаа тээврийн онгоцоор ирсэн нь ил болсон. Иргэдийн итгэлийг хөсөрдүүлж, ард түмнээ үл хүндэтгэсэн албан тушаалтан, УИХ-ын гишүүндээ ёс зүйн хариуцлага тооцсон уу, УИХ-ын дарга аа.

Эргэн сануулбал, нэгдүгээр сарын 5-6-нд шилжих шөнө Сөүл-Улаанбаатарын нислэгээр ирсэн 38 хүнтэй УИХ-ын гишүүн Ш.Раднаасэд мөр зэрэгцэн, дөрөө харшуулан эх орондоо ирсэн байдаг. Гэхдээ тэрбээр үүнийг няцааж, “БНСУ руу эрүүл мэндийн шалтгаанаар яваад, шинэ оны өмнө тусгай үүргийн нислэгээр эх орондоо ирсэн. Миний тусгаарлалтын хугацаа хэдийн дуусаад, УИХ-ын чуулгандаа оролцож байгаа. Гэхдээ эх орондоо хэзээ ирснээ санахгүй байна. Ямартай ч арваннэгдүгээр сарын сүүлч бил үү, арванхоёрдугаар сарын эхээр ирсэн” хэмээн төөрч будилсан хариултыг өгөөд зогсож байлаа.

      Бүх нийтийн бэлэн байдлын зэрэгт шилжсэн тухайн үед олон нийтийг төөрөгдүүлсэн илт худал мэдээлэл түгээвэл Зөрчлийн тухай хуулийн дагуу хариуцлага хүлээх зохицуулалттай. “Тусгай үүргийн нислэгээр хүн авч ирээгүй” гэх, “Тусгаарлалтын хугацаа дуусаж, чуулганы хуралдаанд суусан” гэж байгаа нь худал мэдээлэл түгээсэн хэрэг биш үү. Энгийн иргэд шийтгүүлээд, эрх мэдэлтнүүд бултаж үлддэг баймааргүй байна.

     Ш.Раднаасэдийн тухайд хууль тогтоох дээд байгууллагад хоёр дахь удаагаа сонгогдоод байгаа. Олны анхааралд өртөж, хэл ам тариад  байдаггүй ч хуулийн цоорхой ашиглан цаагуураа чимээгүй “хор” найруулчихдаг хэмээн намынх нь нөхөд ярьдаг. Тэрбээр УИХ-ын гишүүнээр хоёр удаа сонгогдсон ч намдаа төдийгүй тойргийнхоо сонгогчдод тийм ч түшигтэй улстөрч байсангүй. Тэр бүү хэл, Говь-Алтай аймаг Ш.Раднаасэдийг гишүүнээр ажиллаж байх хугацаанд өрсөлдөх чадвараараа сүүл мушгиж байсан удаатай. УИХ-ын гишүүнээр сонгогдохоосоо өмнө тэрбээр Мэргэжлийн хяналтын ерөнхий газар дарга, МАН-ын Ерөнхий нарийн бичгийн даргын зөвлөх, ХЭГ-ын дарга, АТГ-ын хэлтсийн дарга, ЗГХЭГ-т шинжээч, референт, Ерөнхийлөгчийн Тамгын газар хуулийн бодлогын зөвлөхөөр ажиллаж байсан юм.