МАН МӨНГӨӨР БАЯН, МОНГОЛ ХООСОН ХӨРГӨГЧ, ХАЛДВАРТАЙ ИРГЭНЭЭР БАЯН

Б. Цогтбаяр:
Улс төр- Тэрслүү үг

2021-05-02, 3285

Монгол ардын намынхан 100 гэдэг тоонд ухаангүй дурлачихсан явна. Магадгүй, цар тахлаар нас барагсад 100, халдвар тээгчид 100 мянга болсон цагт л МАН сая нэг анзаарч, арга хэмжээ авах бололтой юм. Тэд тэгтлээ л 100 гэх тоонд ухаанаа алдаж, ерөөс 100 насныхаа төрсөн өдрөөс өөр юуг ч анзаарах сөхөөгүй явна.

МАН-ынхны 100 насны төрсөн өдөр нижгэр болж байна аа. Найрын ширээний ардаас босох завгүй байгаа У.Хүрэлсүх ч иж бүрэн сийлбэртэй, дотроо “100 жил” гэсэн тамгатай, их гарын мөнгөн аяга, хавтсаар нь бух ч цохиж унагаж болмоор зузаан ном, хийгээгүй ажлуудаа хийсэн болгож эмхэтгэсэн сэтгүүл, ээмэгтэй адил энгийн хэрэглээ болтлоо зүүгдэх болсон одон тэмдэг сэлтийг төрсөн өдрийн бэлэг болгон намынхандаа тарааж, улсын мөнгөөр баярхаж байгаа гэлцэнэ.

Бас болоогүй, найрын ширээний хойморт төрд зүтгэж байгаа нэртэй 10, 20 жил суудал бөглөсөн, энэ хугацааныхаа талд нь цүнх барьж, үлдсэнд нь хор найруулалцаж, хэтэвчээ зузаалсан нөхөд, “Нам бол бүхнийг тэтгэгч бурхан” гэж итгэгчид, төрийн сангуудаар тэжээгдэж, том жийп унаж, тансаг хаусанд амьдардаг “хамаарал бүхий этгээд” гэх нэртэй хэсэг бүлгийнхэн, улстөрчдийг цалинжуулж, хууль бичүүлж, бас цоолуулдаг бизнесийн луухгарууд сууцгааж, “Та ч бас 100 наслаг” гэцгээж буй дуулдана.

Мөн найранд гаднаас Н.Энхбаяр, Т.Доржханд тэргүүтэй зочид ч алд цэнхэр хадаг дэлгээд орсон сурагтай. Нэмэгдээд С.Эрдэнэ хүртэл найрын ширээний хойморт тэдэнтэй зэрэгцэж суух урилгатай гэгдээд л яваа. Дээд шүүх өчигдөр тэр урилга дээр нь тамга дарчихсан юм чинь магадгүй, өнөөдөр явж орох биз ээ.

Төрсөн өдөрт нь зад найрлаж, бэлгийг нь авч, хоолыг нь идэж, хундага харшуулан сархадыг нь хүртчихсэн хойно тэд “Аяганы хариу өдөртөө” гэдэг уламжлалт хуульд захирагдаж л таарна гэдгийг У.Хүрэлсүх нарийн тооцжээ. Тиймдээ ч Ерөнхийлөгчийн циклтэй давхацсан намынхаа 100 жилийн ойг ихэд нижгэр, элбэг хангалуун, бярдаж тэмдэглэж байгаа биз ээ. Мэдээж, найр дуусахад түүний гарт төрийн тэргүүний титэм атгаастай байна шүү дээ.

Гэхдээ дээдэс нь найрлаж, доодос нь туйлдаж байх цаг одоо биш. Жишихэд, орныхоо хөлөөс уяатай хэдэн хүүхэд нь ханиадандаа халуурч, хоосон ходоодоо хоржигнуулан, өлмөн цөлмөн нүдээр өрөвдөлтэй нь аргагүй ширтэж суухад эцэг нь хэдэн бүтэлгүй нөхдөө тойруулчихаад их гарын мөнгөн аяганд сархад сөгнөж, жавжаараа тос урсган, тарган хонины хавирга огтлонгоо “Төрсөн өдөр сайхан болж байна аа” хэмээн мар мар инээж суугаатай яг ижилхэн дүр зураг л төсөөлөгдөөд байгаа юм, МАН-ын дарга тэргүүтэн. Ерөөс юуны ялгаа байх вэ. Хэрвээ их зохиолч Д.Нацагдорж өнөө цагт аж төрж байсан бол “МАН-ынхны таргалсан, ард түмний турсан яг тэнцэнэ” гэх байсан биз ээ.

Улсыг нь аюулт тахал нөмөрч, ард түмэн нь хөл хорионд тарчилж, өнөөдрийг үмх талх мэрж, маргаашийг хавирганы толгой хүлхэж өнгөрөөх болтлоо туйлдчихаад байхад эрх баригч намын дарга нь улсын төсөвт 10 тэрбум төгрөг өөрсдөдөө зориулж суулгаад, түүгээрээ намынхныгаа мөнгөн аягажуулах аян өрнүүлж, хэвлэж болох бүхэн дээр 100 гэх тоо хэвлэн тарааж, өргөн нэвтрүүлгийн телевизүүдээр өөрсдийгөө магтаж, алдаагаа мартагнуулах гэсэн контентууд цацуулж суугаа нь ноцтой асуудал. Эрх баригч нам нь ойн баяраа ингэж нижгэр, элбэг хангалуун тэмдэглэж чадах хэмжээний баян улс Монгол мөн үү.

Өнөөдрийн Монголын бодит байдлыг харвал хоосон хөргөгч, халдвартай иргэнээрээ л манай улс баян байна.

Одоо бодоход ард түмэн бид их гэнэн юм. У.Хүрэлсүх гэнэт л хариуцлагын сэлмээрээ өөрийнхөө болон танхимынхныхаа толгойг “тасласан” шалтгааныг эх, үр хоёрыг өрөвдсөндөө л гэж бодож суусан. Гэтэл тэр намынхаа 100 жилийн ойг тэмдэглэх нэрээр төсвийн мөнгөөр Ерөнхийлөгчийн сонгуулийн сурталчилгаа явуулж, Ерөнхийлөгч болох хүслээ гүйцэлдүүлэхээр яарсандаа эх, үрээр шалтаглан Ерөнхий сайдын суудлаа өгсөн нь өдөр ирэх тусам илэрхий болж байна.

Хэрвээ бид илүү ухаантай байсан сан бол У.Хүрэлсүх Засгаас явахдаа сэтгүүлч Д.Сарангэрэлээр ойн баярын ном, сэтгүүлийнхээ мэндчилгээний үгийг бичүүлэх гэж, эдийн засагч Ч.Хүрэлбаатараар мөнгөн аяга, ном, сэтгүүлийнхээ тоо ширхэг, тооцоо мөнгийг нь бодуулах гэж, аж ахуйч туршлагатай Я.Содбаатарыг хэвлэлийн үйлдвэр, дарханы газар луу гүйлгэх гэж дагуулаад явж байгааг нь тэр үед нь л мэдэх байж. Хэрвээ тэр үед мэдсэн бол хариуцлагыг огцруулж тооцохгүй байсан юм. “Цар тахал бүрэн аюулгүй болж, иргэн бүр вакцинтай болсны дараа л хариуцлагаа хүлээ” гэж шаардах байсан юм. Гэвч одоо найр ид дундаа өрнөж буй учраас ард түмэн бид мянга орилоод, түмэнтээ халаглаад нэмэргүй л болов уу. МАН дэндүү баян байна, монголчууд дэндүү ядруу, өлсгөлөн байна даа.

МАН МӨНГӨӨР БАЯН, МОНГОЛ ХООСОН ХӨРГӨГЧ, ХАЛДВАРТАЙ ИРГЭНЭЭР БАЯН

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 8

Сэтгэгдэл үлдээсэн: 2021-05-02 10:32:09

иргэн: Үр хүүхэд нь л үйлийн үрийг нь үүрэх байхдаа.
Сэтгэгдэл үлдээсэн: 2021-04-29 23:44:42

Иргэн: МАН хөдөө орон нутагт гишүүддээ мөнгөн аяга 100к бэлнээр тараасан
Сэтгэгдэл үлдээсэн: 2021-04-29 13:29:53

zochin: Olon hun EK d ner devsheed ylj.ylagdaj bailaa.Ene Huuk shig ulaich.tur zahirgaa.erenhiilegchee.ard tumnee ogt bodohgui zutgej bga huniig haraagui sonsoogui.SU chin yasan ih mungetei.Tsets.shuuh.UIH bugd 1 taldaa garch.estoi muuhai bn Ard tumen dungee zuv taviasai .Battulga baih albagui.Enhbat.Altanhuyag.Depato Jargalsaihan.T.Ganbold bugdtei n erseldeed garch ireerei.
Сэтгэгдэл үлдээсэн: 2021-04-29 12:09:55

Иргэн: Идсэн мөнгөө намын баяраар цайруулж ард түмнээ хэтэрхий доромжилж бгаа юм биш ү хан-уулын иргэд доржхандыг сонгосондоо харамсаж бна итгэл эвдлээ бялдууч новш
Сэтгэгдэл үлдээсэн: 2021-04-29 10:40:42

иргэн Нараа: Эцэг өвгөдийн минь 70 жилийн түүхтэй намыг хүлээж авсан нөхөд 30 жилд хулгайч луйварчдын үүр уурхай болгоно гэж зүүдэлсэнгүй явлаа даа.Ядаж байхад сөрөг хүчин АН нь нийлчихдэг нь ч юу вэ дээ. Тэнгэр бурхан ялгаж салгаад байр байранд нь тавиад өгөх байлгүй дээ.Юу тарина үрийг нь амсдаг хорвоо шүү дээ.
Сэтгэгдэл үлдээсэн: 2021-04-29 09:07:39

Иргэн: М.Энхболд шаазан хул тараадаг байсан. У,Хүрэлсүх мөнгөн аяга тараадаг болсон. Алтан аяга өгнө гэж горьдон МАНгар МАНгасаа сонгоод байж дээ. Хар машин, өөртөө зориулсан хуулиар 100 хувь гарч ирнээ. Мандтугай. МАНгар МАНгас.
Сэтгэгдэл үлдээсэн: 2021-04-28 15:10:58

жэнко: Хүүк ерөнхийлөгч болж Содбаатар тамгын дарга Сарангэрэл их хатан болохнээ
Сэтгэгдэл үлдээсэн: 2021-04-28 09:42:12

Отгоо: Намдаа биш хүндээ байгаа юм энэ ардын намынхан намаа цэвэрлэж аваасай

Шинэ мэдээ

Нийтлэлчид