Халдварт цар тахлын үед хөдөлгөөн хязгаарлаж, хүн амаа хамгаалах гэж байгаа бол, хотын даргын ажлыг “булааж”, өмнөөс нь ажил хийсэн болж харагдах гэж байгаа бол харилцаа, хандлагадаа анхаарах ёстой байлаа. Үг, хандлага нь цар тахлаас айж, сандарсан ард түмнийгээ хэтэрхий дээрэлхсэн, даналзсан, даапаалсан, дорд үзсэн, дарангуйлсан өнгө аястай. Дээрээс нь 28 хоногийн хатуу хөл хорионы дараа дахиж хаалгаа нээхгүй ч байж мэдэх аж ахуйн нэгжүүдээ “Хуулийн этгээд”, “нэг жижигхэн хүнсний дэлгүүр бол” гэж цоллоод л. Хорих газар, шорон гянданд хатуу дэг тогтоож байгаа хуяг, харгалзагч уу л гэлтэй. Автомашиныг хязгаарлаж байгаад нь ард түмэн дургүйцсэнгүй, харин хоригдол, хүмүүжигчтэй харилцаж буй мэт энэ харьцаа нь ард түмэнд огтоос таалагдсангүй. 

Уг нь Хууль зүй, дотоод хэргийн сайд Х.Нямбаатарт автомашины хөдөлгөөн хязгаарлаж, автобусны цаг зарлаж суухаас илүү том ажлууд бишгүй л байгаа санагдах. Төрийн сайдын үндсэн ажлаасаа зугтаж, тээвэр зохицуулалтын хэлтсийн мэргэжилтний ажлыг булааж аваад л хийхээс ичих хэрэгтэй гэсэн үг л дээ. Жишээ нь, хилийн цэрэг ангиудад хэчнээн цэрэг амиа алдаж, амиа хорлож, хэчнээн цэрэг ялтан болж байж Хууль зүй, дотоод хэргийн сайд Х.Нямбаатар анхаарах гээд байна вэ. “Дарамт шахалтыг тэвчээгүй” гэх хоёр цэрэг даргыгаа буудаад хөнөөчихлөө, долоохон хоногийн дараа халагдах гэж байсан цэрэг өөрийгөө хөнөөчихлөө. “Цэргийн албан эр хүн болгож хүмүүжүүлнэ” гэж авч явсан эрчүүдийгээ эх орон нь эрэмдэг зэрэмдэг болгоод эсвэл хүйтэн цогцос, нэг бол хүнд гэмт хэрэгтэй ялтан болгоод цэргийн албанаас буцааж байгаагаа Хууль зүй, дотоод хэргийн сайд Х.Нямбаатар мэдэж байгаа юу. Оюутолгойн хэлэлцээр, С.Зоригийг хэргээр “шоудаж”, архийг “халбагаар” зардаг болгохоор судалж, Ерөнхийлөгчийг “намнах” арга ажиллагаанд бэлдэж, автомашины QR код хэвлэж, автобусны цагийн хуваарь гаргаж суухаас өөр ид шид Х.Нямбаатарт байна уу.