ОГЦРОХ ХАНГАЛТТАЙ "ГАВЬЯА"-ТАЙ Ч ОГЦОРДОГГҮЙ С.АМАРСАЙХАН

Б. Цогтбаяр:
Улс төр- Тэрслүү үг

2021-04-22, 873

-ТӨРСӨН ДҮҮТЭЙГЭЭ НИЙЛЖ, ТУУЛЫН БУРГАСЫГ “ХЯДСАН” ХЭРЭГТЭЭ ХАРИУЦЛАГА ХҮЛЭЭГЭЭГҮЙ С.АМАРСАЙХАН ТӨРСӨН ХҮҮГИЙНХЭЭ 77 САЯ ТӨГРӨГИЙН ЗЭЭЛИЙН АСУУДАЛД ХАРИУЦЛАГА ХҮЛЭЭЖ, ОГЦРОХ НЬ ЮУ Л БОЛ-

Шадар сайд С.Амарсайханы эхнэрийн “Цар тахлын голомт буюу ХӨСҮТ-өөр аялж, халдвар хамгааллын дэглэм ноцтой зөрчсөн” дуулиан намжаагүй байтал төрсөн хүүгийнх нь “Боловсролын зээлийн сангаас 77 сая төгрөг авсан” асуудал дуулиан дэгдээлээ. Эхлээд төрсөн дүүтэйгээ хамт “Байгаль сүйдлэгч”, дараа нь төрсөн ахтайгаа хамт “Газрын наймаачин” гэгдэж, хэл амны бай болдог байсан С.Амарсайхан одоо “Эхнэрээ эрхлүүлэгч”, “Хоншооргүй аав” хочтой болчихлоо. Үйлийн үртэй гэх үү, үйлс нь хазайсан гэх үү, ямартай ч олон нийтийн шүүмжлэл, хэл аманд хамгийн их өртдөг улстөрчөөр Шадар сайд С.Амарсайханыг нэрлэвэл нэг их буруудахааргүй болчихлоо.

Зарим нь Шадар сайд С.Амарсайханыг “Эхнэрээ энгийн иргэдээс илүүд үзэж ХӨСҮТ-ээр зугаалуулж, эрхлүүлсэн”, “Ардын хүүхдүүдийн боломжийг хулгайлж, төрсөн хүүгээ улсын зардлаар гадаадад сургахаар завдсан” хэргүүдээрээ албан тушаалаасаа чөлөөлөгдөх байх гэж харж байх шиг. Гэхдээ С.Амарсайхан энэ мэтийн дуулиануудад хариуцлага хүлээж, албан тушаалаа амархан өгөхгүй л болов уу. Ингэж хэлэхийн учир нь тэр НИТХ-ын дарга байхдаа төрсөн дүүтэйгээ нийлж, Туул голын бургасыг “хядсан” хэрэгт, Хотын дарга байхдаа төрсөн ахтайгаа нийлж, Зайсан орчимд “эзэн” сууж, тансаг орон сууц, оффис сүндэрлүүлсэн дуулиануудад холбогдож, хэл амны бай болж явсан нэгэн. Гэхдээ энэ бүх “ноцтой” дуулианууд ч түүнийг НИТХ-ын даргаас, Хотын даргаас буулгаж чадаагүй юм шүү дээ. Тухайлбал, Шадар сайд С.Амарсайханы хэл амны бай болж эхэлсэн түүх нь 2017 оноос эхлэлтэй.

Жишээ нь, 2017 оны аравдугаар сард С.Амарсайхан Ц.Сандуйн орыг залгаж, НИТХ-ын дарга болоход нь “Тэрбумтан С.Отгонбаярын төрсөн дүү С.Амарсайхан улс төрд хүч түрэн орж ирлээ. Төрсөн ах С.Отгонбаяр нь Ерөнхийлөгч Х.Баттулгатай худ. С.Амарсайханы албан тушаалыг ахиулагчид нь тэд” хэмээн шүүмжилж байв.

2018 онд УИХ дахь АН-ын бүлгийн хэсэг гишүүд буюу Б.Пүрэвдорж, М.Оюунчимэг нар “Туулын бургасыг хядаж, хаус хороолол босгож буй “Зүүнбаян рефайнери”ХХК-ийн захирал С.Уламбаяр нь НИТХ-ын дарга С.Амарсайханы төрсөн дүү. Хотын удирдаж буй хүний гэр бүлийнхэн нь Туулын бургасыг дураараа сүйдлээд байж болох уу” хэмээн зарга мэдүүлснээр олон нийтийн уур бухимдал С.Амарсайханыг чиглэсэн.

2019 оны хавраас буюу С.Амарсайханыг хотын дарга болмогц түүний төрсөн ах С.Ганбат нь Зайсан орчмын долоон байршилд 15.02 га газар эзэмшиж, тансаг орон сууц, оффис сүндэрлүүлж байна гэх мэдээллүүд ар араасаа цацагдаж, мөн л хэл аманд өртөж байв.

Ингэж явсаар “Хоёр ах, нэг дүүтэйгээ нийлж, “Оюуны ундраа групп”-ээрээ дамжуулан Туул голын эрэг дагуух газруудад эзэн суусан” гэх энэ цуврал дуулианууд хуучрах янз орсон. Энэ сэдвээр С.Амарсайханыг гурван жил орчим шүүмжилсэн ч тэр ах, дүү, алд биеэ өмөөрч, мөчөөгөө өгөхгүй заргалдсаар байсан тул эцэстээ энэ асуудал орхигдсон гэх үү дээ.

Гэхдээ “Туул”-ын сэдэв хуучрахтай зэрэгцээд түүнд холбогдох шинэ сенсаациуд ар араасаа гарч ирсэн. Тухайлбал, 2019 оны зургаадугаар сард НИТХ-ын төлөөлөгч, МАН-ын гишүүн Ж.Батсайхан Хотын дарга С.Амарсайханыг огцруулах санал гаргаж, нийт төлөөлөгчдөөс гарын үсэг цуглуулж эхэлснээр нэлээд өндрөө авсан. Төлөөлөгч Ж.Батсайхантай нэгдсэн төлөөлөгчид нэгэн дуугаар шахуу “С.Амарсайхан хотын дарга болсноосоо хойш нэг ч ажил хийсэнгүй. Харин эсрэгээрээ төрийн мэргэшсэн албан хаагчдыг хууль зүйн үндэслэлгүй халж, хувийн компанидаа халаа сэлгээ хийж байгаа мэт аашилж байна. Иймээс огцруулах ёстой” хэмээн мэдэгдэж байлаа. Гэхдээ тэр гарын үсгүүд С.Амарсайханд төдийлөн нөлөө үзүүлж, цохилт болж чадаагүй, тэгсгээд мартагдсан.

Улмаар 2020 оны хавар хотын дарга С.Амарсайхан Их жанжин Д.Сүхбаатарын талбайн өмнөх “Хонхтой” цэцэрлэгт хүрээлэнг дахин төлөвлөж, 3.2 тэрбум төгрөгөөр усан оргилуур барих нь ээ гэдэг асуудал дэгдэж, хэсэгтээ л шүүмжлэл өрнөсөн болсон. Гэвч зун нь ашиглалтад орох үед нийслэлчүүд нэг өдөр уг усан оргилуурын дэргэд хэд хоног “өнжиж”, гэртээ харихдаа С.Амарсайханыг шүүмжилж байснаа мартаж орхисон.

Дараахан нь С.Амарсайхан албан тушаал эрх мэдлээ урвуулан ашиглаж, тендер сонгон шалгаруулалтгүйгээр 130 мянган ам.доллароор сургуулийн шар автобус оруулж ирсэн гэх асуудал дэгдсэн. Гэвч тухайн үедээ АТГ-аас шалгаж эхэлсэн мэдээлэл гараад бас л мартагдсан.

Энэ мэтээр эхэнд дурдсанчлан “Туул голын бургасыг хядаж, хаус хороолол босгосон”, “Зайсан орчмын газруудад эзэн сууж, орон сууц, оффис сүндэрлүүлсэн”, “3.2 тэрбумыг усан оргилуурт зарцуулж, салхинд хийсгэсэн”, “130 мянган ам.доллароор хуучин автобус шахсан” дуулиануудын аль ч С.Амарсайханыг албан тушаалаас нь хөндийрүүлж чадаагүй. Тухай бүрд нь С.Амарсайхан сүртэй нэг ч мэдэгдэл хийж, өөр лүү улстөржсөн зорилгоор дайрч байна хэмээн тайлбарлаж, эрс няцааж, үгүйсгээд өнгөрүүлж байсан.

Энэ удаагийн “Эхнэрээ “улаан бүс”-ээр оруулж, гаргасан”, “Өөрөө тэрбумтан шахуу атлаа төрсөн хүүгээ төрийн зардлаар сургахаар завдсан” дуулианууд ч түүнийг “унагааж” чадахгүй л болов уу. Учир нь, тэр эхнэрийнхээ асуудлыг “Хадмууддаа хайртай хүргэний дүрээр”, хүүгийнхээ асуудлыг “Хүүгийнхээ мөрөөдлийг дэмждэг эцгийн дүрээр” тайлбарлачихсан шүү дээ.

Нөгөөтэйгүүр, Шадар сайд С.Амарсайханыг энэ удаагийн асуудлуудаар огцрохгүй байх гэсэн нэг таамаг байна. Тухайлбал, Ерөнхийлөгчийн сонгууль дуусах хүртэл Ерөнхий сайд Л.Оюун-Эрдэнийн Засгийн газар унах эрхгүй даалгавартай гэгдэж байгаа. Өөрөөр бол, тэднийг “Үхэж болохгүй даалгавартай хурандаагийн цэргүүд” гэж ч нэрлэж буй. Сонгууль өнгөртөл цар тахал, вакцинтай холбоотой бүхий л болж, бүтэхгүй асуудлуудыг У.Хүрэлсүхээс зайлуулж, өөрсдийн нуруундаа үүрч, шүд зуугаад сонгууль өнгөрөөх нь тэдний “даалгавар”. Сонгууль дууссаны дараа танхимаараа огцроод шагналаа авч, амралтаа эдэлнэ гэх. Ийм хариуцлагатай “даалгавар”-тай учраас Шадар сайд С.Амарсайхан эхнэрийнхээ, хүүгийнхээ асуудлыг “мартагнуулаад” өнгөрөхөөр “гүрийж” байж мэдэх л юм.

ОГЦРОХ ХАНГАЛТТАЙ "ГАВЬЯА"-ТАЙ Ч ОГЦОРДОГГҮЙ С.АМАРСАЙХАН

Шинэ мэдээ

Нийтлэлчид