-ШАДАР САЙД С.АМАРСАЙХАН ТА БУРУУГАА УХАМСАРЛАЖ, ОГЦОРЧ ЧАДАХГҮЙ БОЛ ЕРӨНХИЙ САЙД Л.ОЮУН-ЭРДЭНЭ ТА ТОМ ТОЛГОЙТОЙ САЙДТАЙГАА ХАМТ ХАРИУЦЛАГАА ХҮЛЭЭНЭ ҮҮ-

Шадар сайдын эхнэр халдвар авсан аав, ээжийгээ эргэж очсон гэв үү. Тэр бүү хэл ХӨСҮТ-д нэг хоночихоод гараад явчихсан гэх. Хаана байгаа хууль, хэнд үйлчилдэг дүрэм юм бэ. Эхнэрийгээ улаан бүс рүү нэвтэрч, тэндээсээ гарсан гэдгийг баталж хэлж байхдаа та эмээгээгүй гэж үү, Шадар сайд аа. Ядаж ичсэнгүй юү. Монгол ард түмнийг цэнхэр дэлгэцээр доромжилж суухдаа та юу бодож байсан бэ.

Тэр сэтгүүлчийн асуултад хариулахдаа

“Халдвар хамгааллын дэглэмээ барьж, ямар нэгэн зөрчил гаргаагүй учраас эрсдэл байхгүй. Сахиураар очсон.Өөрөө вакцин хийлгэж урвал өгсөн учраас буцаж тусгаарлагдсан. Шинжилгээ өгөөд хариу сөрөг гарсан учраас ХӨСҮТ-тэй холбоотой ямар нэгэн асуудал байхгүй” гэж хээв нэг Төрийн ордны танхимаас дуугарч байх юм. Даргын аав, ээж халдвар авбал, охин нь сахиж болох хууль бий юм уу. Тэгээд өрөө нь таалагдахгүй бол хамраа чимхээд, улаан бүсээс гараад явчихаж болох юм уу. Халдвар хамгаалалын дэглэм гэж сүржигнээд байсан хийрхэл чинь, ойрын хавьтал бол хорино, цагдана, тусгаарлана гээд байсан чинь яасан бэ. Таны аав, ээж, эхнэрт улс даяар мөрдүүлж, хэрэгжүүлж буй дүрэм, журам чинь үйлчилдэггүй хэрэг үү. Халдвар авсан аав, ээжийг тань буруутгасангүй, халдвар хамгааллын дэглэм зөрчих эрх мэдлийг эхнэртээ өгсөн таниас хариуцлага нэхэж байна.

Дөнгөж төрсөн нярай, эхийг углааш, халаадтай нь эмнэлгээс гаргаж, ХӨСҮТ рүү зөөвөрлөснийхөө төлөө У.Хүрэлсүхийн Засгийн газар огцорч байлаа. Тэгвэл улс эх орныхоо эсрэг санаатай гэмт хэрэг үйлдэж, эрх мэдэл, албан тушаалаа урвуулан ашиглаж, ар гэрийнхэндээ давуу байдал олгосон та ямар хариуцлага хүлээх вэ, Шадар сайд аа. Ерөнхий сайд асан У.Хүрэлсүхийн бараг нулимс дуслуулан байж хэлж зогссон хүнлэг байх тухай, хэн нэг албат нь хариуцлага алдвал бүгд хариуцлага хүлээх тухай мэдэгдэл үнэн бол та ч бас огцрох ёстой.

10-хан настай охин коронавирусийн халдваргүй хэрнээ, ЭХЭМҮТ-ийн тусгаарлах өрөөнд ганцаараа тусгаарлагдаж, бие нь эрс муудсанаар амьсгал хураасан байдаг. Тодруулбал, Сэлэнгэ аймгийн Баянгол сумын II багийн иргэн Б.Пүрэвбаатарын охин 10 настай Н нь тархины цус харвалттай гэх оноштойгоор өнгөрсөн оны арваннэгдүгээр сарын 23-нд ЭХЭМҮТ-д хүргэгдэн ирсэн.

Гэвч эмнэлэгт ирээд хоёр хоногийн дараа охин нас барсан юм. Охиныг голомттой бүс нутгаас ирсэн хэмээн 22-ын товчооноос нийслэл рүү оруулахгүй, амьсгалын аппараттай гурван цаг тарчлааж, арай чүү нэвтрүүлэхдээ ээжээс нь салгаад ганцааранг нь тусгаарлачихсан гэдэг. Ковидтой эсэхийг нь шинжлэх шинжилгээ хийх нэрийдлээр 24 цаг хорьж, эмчилгээг оройтож эхэлснээр охин амьсгал хураасан юм. Охин ээжээсээ холдохгүй гэж чадлынхаа хэрээр уйлж, арга буюу салахдаа “Ундаа ч болтугай аваад өгөөч” гэж сүүлчийн удаа хэлсэн байдаг. Даанч тэр дахиж ээжтэйгээ, ихэрлэж төрсөн эгчтэйгээ, алган дээрээ бөмбөрүүлсэн аавтайгаа уулзах бүү хэл ундаагаа ч ууж чадалгүй үүрд явчихсан.

Хэрэв энэ охин Шадар сайд таны охин байсан өнөөдөр амьд байх байжээ. Түүнд шинжилгээний хариу бүү хэл ээжээсээ ч холдох хэрэг байхгүй байсан юм байна. Гурван цаг эмнэлгийн хүйтэн машинд амьсгалын аппаратны цэнэгтэй уралдаж, амьсгалах хэрэг ч байхгүй байжээ. Тэр ердөө л “Шадар сайдын охин байна” гэж хэлсэн бол ЭХЭМҮТ рүү бараг онгоцоор хүргэгдэн ирж, шинжилгээний хариу нь тэр дороо гарах байж. Тэгээд эмнэлгийн орчин нөхцөл, өрөө тасалгааны байгаа царай нь таалагдахгүй бол ковидтой ч гэртээ харьж болох байжээ. Даанч түүний аав, ээж дарга биш, Шадар сайд бүүр биш, УИХ-ын гишүүн ч биш байсан нь харамсалтай.

Мөн элэгний хорт хавдартайгаа тэмцэж, ганц охинтойгоо сүүлчийн удаа уулзах гэж шууд зуун хүлээж, тэнхээгээ тасартал хүлээсэн охиноо тусгаарлалтын байрны гаднаас арай чүү хараад буцсан аавыг монголчууд мартаагүй байна. Аавтайгаа уулзахаар тусгай үүргийн нислэгийг хуруу даран хүлээж, БНСУ-аас ирж, тусгаарлалтын байрны дөрвөн ханан дунд 21 хоног тарчилж, аавыгаа эцсийн замд нь ч үдэж чадаагүй охин. “Яагаад хамгаалалтын хувцас өмсгөөд аавтай минь уулзуулж болоогүй юм бэ. Надаас коронавирус илрээгүй шүү дээ. Долоон удаагийн шинжилгээ нь энэ байна” гэж тэр голынхоо дуугаар хашхирч байсныг та санаж л байгаа байх. Түүний энэлэн шаналанг Монголын ард түмэн сонссон ч харамсалтай нь албаныхнаас хэн нь ч сонсоогүй, түүнд туслаагүй билээ.

Хэрэв тэр бүсгүй таны хамаатан, эсвэл эхнэрийн тань дүү байсан бол яах яасан бол. Бараг хамгаалалтын хувцасгүй шахуу аавыгаа үдэж, тусгаарлалтын байрандаа хамт байх байсан болов уу.

Иргэддээ хатуурхдаг хатуурхал чинь харгислал болж, эхнэрээ хайрладаг хайр чинь улсаар минь аюулд оруулах нь. Хэрэв Шадар сайд С.Амарсайхан та өөрийнхөө бурууг ухамсарлаж, огцорч чадахгүй бол Ерөнхий сайд Л.Оюун-Эрдэнэ та том толгойтой сайдтайгаа хамт хариуцлагаа хүлээнэ үү.