Монголын сэтгүүлчдийн нэгдсэн эвлэлийн Ерөнхийлөгч асан Х.Мандахбаяр МАН-аасаа татгалзан байж Монголын сэтгүүл зүйн төлөө хүчин зүтгэх болсон цаг саяхан. Түүнийг 2018 оны хоёрдугаар сард МСНЭ-ийн Ерөнхийлөгчөөр сонгогдоход улс төрд орох замаа "Сэтгүүлчдийн байгууллагаар засаж байна" гэж салбарынхан нь хардаж байсан. Энэ хардлага ч худлаа байгаагүйг тэр өөрөө баталсан. Тодруулбал, тэрбээр 2020 оны  УИХ-ын сонгуульд Өмнөговь аймагт нэр дэвшихийн тулд өнгөрөгч оны дөрөвдүгээр сарын 20-нд МСНЭ-ийн Ерөнхийлөгчийн ажлаа З.Боргилмаад хүлээлгэн өгсөн байдаг. Тэгвэл жилийн хугацаа өнгөрчихөөд байхад Х.Мандахбаяр одоо ч МСНЭ-ийг удирдаж, монголын сэтгүүлчдийн нэгдсэн эвлэлийн өмнөөс өөрийн гарын үсэгтэй батламж, одон тэмдэг сэтгүүлчдэд гардуулсаар явна.

Тухайлбал, Монголын сэтгүүл зүй үүсэж, хөгжсөний 108 жилийн ойг тохиолдуулан хэд хэдэн сэтгүүлч, хэвлэл мэдээллийн ажилтнуудыг "Ган үзэгтэн" шагналаар шагнажээ. Ингэхдээ хэвлэл мэдээллийн байгууллага, сэтгүүлчдийн үнэмлэх дээр  Х.Мандахбаярын гарын үсэг, тамга тэмдэг зурайж байлаа. УИХ-ын гишүүн болох амбиц өвөртөлмөгцөө МСНЭ-ийг орхиод явсан Х.Мандахбаяр гишүүн болох боломжоо алдмагцаа МСНЭ-дээ буцаад ирсныг нотлох барим нь энэ.

Энэ мэтээр үүрэгт ажлаа хүлээлгэн өгөөд хэдийн жил тойрч байгаа түүний нэр, гарын үсэг Монголын сэтгүүлчдийн нэгдсэн эвлэлээс салсангүй. Уг нь МСНЭ гэдэг байгууллага дур нь хүрэхээр хүрээд ирдэг, дургүй нь хүрэхээр хаяад явдаг байгууллага биш л байлтай.

Х.Мандахбаярыг МСНЭ-ийн Ерөнхийлөгчийн ажлаа хүлээлгэж өгснөөс хойш жилийн хугацаанд дараагийн Ерөнхийлөгч хэн байх, хэрхэн сонгох тухай яриа огт гарсангүй. Түүний тойрон хүрээлэгчид нь үүнийг цар тахлын нөхцөл байдалтай холбон тайлбарласаар өдийг хүрч буй. Тэгвэл Х.Мандахбаярт МСНЭ-ийн ажлаа албан ёсоор хүлээлгэж өгөх, дараагийн Ерөнхийлөгчийг сонгох бодол байхгүй бололтой юм. Зүгээр л УИХ-ын сонгуульд оролцохын тулд нэр төдийгөөр ажлаа өгсөн болж харагдсан гэж хардах шалтгаанууд олон байна. Наанадаж л тэр үнэхээр ажлаа хүлээлгэж өгсөн байсан бол МСНЭ-ийн элдэв шагнал, урамшуулал дээр гарын үсгээ зурж, тамга тэмдгээ дараад явах эрхгүй сэн.

Х.Мандахбаяр Монголын сэтгүүлчдийн нэгдсэн эвлэлийн Ерөнхийлөгч байхдаа юу хийсэн бэ

Түүнчлэн Монгол Улсад тогтмол үйл ажиллагаа явуулдаг 500 гаруй хэвлэл мэдээллийн байгууллага бий. Х.Мандахбаяр МСНЭ-ийн Ерөнхийлөгч болсноосоо хойш хэвлэл мэдээллийн байгууллагуудад ажилладаг хэдэн зуун сэтгүүлчдэд тулгардаг олон арван бэрхшээлийг шийдэж, тэдний аюулгүй орчинд ажиллах, нийгмийн олон асуудлыг шийдэж чадалгүй өнөөдрийг хүрсэн гэхэд хилсдэхгүй. Монголын сэтгүүлчдийн нэгдсэн эвлэл зөвхөн ойн арга хэмжээ баяр ёслолын үеэр сэтгүүлчдийг олноор нь шагнаж, “Ган үзэгтэн”-ээр тодруулж, биет болон биет бус хэлбэрээр урамшуулдаг л байгууллага болсон нь нууц биш. Тэр ингэж олон тооны сэтгүүлчдийг шагнаж, урамшуулах замаар тойрон хүрээлэгчдээ тэлдэг гэдгийг нь салбарынхан нь жиг жуг хийцгээж буй.

Ганцхан жишээ, Х.Мандахбаяр 2018 онд Монголын сэтгүүлчдийн нэгдсэн эвлэлийн Ерөнхийлөгчөөр томилогдохдоо “16 давхар сэтгүүлчдийн ордон барих, 1000 сэтгүүлчийн орон сууцны шав тавихад бэлэн болсон” хэмээн зарлаж байлаа. Гэтэл бодит байдал сэтгүүлчдэд баярын өдөр тэмдэг өгөхөөс өөр ажил үнэндээ хийсэнгүй. Харин эрх мэдэл, албан тушаалын төлөө Монголын сэтгүүлчдийн нэгдсэн эвлэлийг нэрийг ашигласаар өдийг хүрлээ.