ОГЦРУУЛААД ЗОГСОХГҮЙ Н.БАЯРМӨНХӨӨС ХАРИУЦЛАГА НЭХЬЕ

Монгол Улсад  коронавирусийн тархалт ид эхэлж байх үед Нийслэлийн Засаг дарга Д.Сумъяабазар “Нойр, хоолгүй олон хүн удирдаж байна” гэж ундууцаж байлаа. Тэр үүнээсээ болж олон ч хүний дургүйцлийг хүргэж байсан “гашуун” түүхтэй нэгэн. 1.4 сая хүн амьдарч байгаа Улаанбаатар хот хөл хорионы хатуу дэглэмийн өдрүүдэд оновчтой шийдвэр, зөв менежментээр дутаж байсан цаг саяхан.

 Өөрөөр хэлбэл, Хотын дарга арай гэж “Хөлөө олов уу” гэж бодож суутал дахиад нэг “ялархагч”-ийн дүрд хувирсан Засаг дарга гарч ирлээ. Энэ бол Баянзүрх дүүргийн Засаг дарга Н.Баярмөнх.

Хариуцсан дүүргийнх иргэд гэнэт хатуу хөл хорионд хоригдсондоо бухимдаж, хүйтэн өдрүүдэд жагсаал, цуглаан зохион байгуулж байхад тэр  “Хүмүүст эрт хэлбэл зугтчихдаг юм” гээд албан тасалгааныхаа өрөөндөө хээв нэг яриад зогсож байлаа. Дүүргийнх нь иргэд ямар гэмт хэрэг хийсэн ялтан биш дээ. Тэд зөвхөн “Хэнд ч мэдэгдэхгүйгээр гэнэт хөл хорьсоноо тайлбарла. Ажил, амьдрал улам бүр хэцүүдлээ. Ийм хариуцлагагүй шийдвэрүүд гаргахаа хэзээ болих юм бэ” гэж арга буюу жагссан юм билээ. Гэвч Н.Баянмөнх дарга үүнд нь дээрх мэтээр тохуурхсан хариу өгөөд сууж байлаа.

Хамгийн гол нь Баянзүрх дүүргийн Засаг дарга Н.Баярмөнх таныг айл өрхүүдийн орцны үүдийг хамгаалж, төмөр хашлагаар хашаалж сүржигнэж байх зуур гэр бүлийн хүчирхийлэлд өртсөн 39-хөн настай эмэгтэй гэгээн цагаан өдрөөр, алаг үрсийнхээ нүдний өмнө 15 давхраас үсрээд амиа алдчихлаа.

Хэрэв талийгаач бүсгүйн амьдардаг хорооны Засаг даргыг солихтой холбоотой ч байж мэдэх зорилгоор хатуу хөл хорио тогтоогоогүй, тэр бүсгүй ажлаа хийж байсан бол аймшигт хэрэг гарахгүй байсан ч байж мэднэ. ЦЕГ-ынхны хэлснээр гэр бүлийн хүчирхийлэгч ажлаа хийж байсан бол эхнэрээ үхэх хүртэл нь дарамталж, амиа золих  хүртэл нь тамлахгүй ч байх байсан юм бил үү. Хэрэв хатуу хөл хорьж, сүржигнээгүй байсан бол өнөөдөр нялх дөрвөн хүүхэд ээжтэйгээ хамт, элэг бүтэн инээж хөхрөөд байж байх байлаа.

Баянзүрх дүүргийн 26 дугаар хорооны Засаг даргыг огцруулж, өөрийн хүнээ томилохтой чинь коронавирусийн тархалт уг хороонд тархсан нь, хэнд ч мэдээлэл өгөлгүйгээр хар шөнөөр гэнэт хатуу хөл хорио тогтоосон чинь тохиолдлынх байв уу гэдэгт олон нийт эргэлзсээр байна, Н.Баярмөнх дарга аа. Таны энэ сүржигнэл, “Өргөтгөсөн тандалт, судалгааны ажилд хамтарч ажиллана уу” гэсэн албан бичигт өгсөн хариу “бэлэг” чинь нэг хүний амийг шууд бусаар авч одсоныг та юу гэж бодож байгаа вэ.

Хариуцсан дүүргээ хамгаалж, иргэдийнхээ аюулгүй байдлын төлөө ажиллах хариуцлагатай алба хашиж яваа Н.Баярмөнх даргад хүний амь юу ч биш бололтой. Тэр жагсаж байгаа иргэдээсээ зугтааж, сэтгүүлчдийн асуултад хариулахдаа “Нойртой, нойргүй, хоолтой, хоолгүй олон хүн энэ хүмүүсийн төлөө ажиллаж байна. Битгий улс төржүүлээд бай. Бид та нарын эрүүл мэндийн төлөө ажиллаж байна. Иргэд наад бухимдлаа дараа нь бол” зэргээр дүүргийнхээ иргэдийг зандчив. Гэсэн атлаа тэр өөрийнх нь сүржигнэж гаргасан шийдвэрээс болж, цоожтой хаалганы цаана хэдэн цаг тамлуулсан талийгаач эмэгтэйд эмгэнэл ч илэрхийлсэнгүй, цагдаагаар хамгаалуулж, машиндаа суулаа. Ингээд тав хоног хатуу хөл хорих шийдвэр гурав дахь өдрөө цуцлагдав.

Хүний амиар хөл хорьсон Баянзүрх дүүргийн Засаг даргыг огцруулъя. Огцруулаад ч зогсохгүй түүнээс хариуцлага нэхье. Түүний удирдаж байгаа Баянзүрх дүүргээс коронавирусийн дотоодод алдсан анхны тохиолдол илэрч, улсаараа хатуу хөл хорионд орж байсан шүү дээ. Хөл хорио тавигдаад хэдхэн хонож байхад тус дүүргийн нэгдсэн эмнэлэгт коронавирусийн голомт бий болж, нийслэл хоёр дахь удаагаа хатуу хөл хорионд шилжиж байсан удаатай. Ийм хариуцлагаггүй ажиллаж байхад ч тэр зөөлөн суудалдаа заларсаар байгаа ч хариуцлагаа хэзээ ч сайжруулж байсангүй, чадсангүй.