Хариуцсан салбарынхан чинь халаасаа “КОВИД”-оор “түнтийлгэж” байгааг хараад л өнгөрөөх үү, сайд аа

Эрүүл мэндийн яам олон сайдын гар дамжсан. Гэхдээ ингэтлээ доройтож үзээгүй гэдгийг яамныхан нь жиг жуг гэцгээж байна. Бид дэлхий нийтийг хамарсан цар тахлын үед анх удаа ажиллаж, амьдарч байна. Гэлээ гээд эрүүл мэндийн салбараа элгээр нь хэвтүүлчихээд сууж байх дээрээ тулаагүй л баймаар.

ХӨСҮТ гэх том шар байшинтай “айл”-ын буланд тусгаар тогтносон хэсэг улс шинжилгээний хариуг хуурамчаар үйлдэж, тэр бүү хэл “сөрөг” гэх хариу дамлан зарж, “Дураараа дургиж, дунд чөмгөөрөө наргиж” байгаа гэх мэдээлэл хэвлэлээр хөвөрч эхэллээ.

Үүгээр ч зогсохгүй халдвар авсан иргэдийг тусгаарлахгүй “мартдаг”, халдваргүй хүнийг халдвартай болгодог гээд хүний санаанд багтамгүй хар мэдээллүүд шар байшингийн хонгилоос “хашгирч” байна. Эхнэр нь нөхрийнхөө өмнөөс хэд хэдэн удаа шинжилгээ өгөөд байхад ч мэдэхгүй байна гэхээр тэднээс юу хүлээж суух билээ. Шинжилгээний цэгийн ажилтан эр, эм хүнийг ялгахгүй байна гэж үү дээ. Шар пос машин дээрээ гарч ирсэн иргэнийхээ мэдээллийг тулгах ч чадваргүй, сэтгэлгүй баймааргүй юм даа. Эсвэл шинжилгээний цэг дээр ч хууль бус ажиллагаа болдог гэсэн үг юм уу, Эрүүл мэндийн сайд аа.

Халдварын голомт хаврын хавсарга шиг нэмэгдэж байхад ч хариуцлага гэж танай салбарт алга.

“Та нарыг авах ор байхгүй” гээд 50 гаруй айл амьдардаг нийтийн байрны хонгилд халдвартай иргэнийг үлдээсэн байна шүү дээ, сайд аа. Энэ чинь бусад нь ч гэсэн “Халдвар ав” гэснээс ялгаагүй үг биз дээ. Эсвэл ор хоногийн төлбөрөө төлөх чадвартайг нь хүчээр ч хамаагүй эмнэлэг, зочид буудал руу зөөгөөд, огт мөнгөгүй ядуусыг нь орц, хонгилд үлдээх “тушаал”-ыг та өгсөн юм уу?

Мөн халдварын тоог нэмэгдүүлэх яг хэнд ашигтай юм бэ. Зөөвөрлөж байгаа жолоочид уу, эмчилж байгаа эмчид үү, эсвэл “халдвартай, халдваргүй” гэх шинжилгээний хариу гаргаж байгаа оношилгооныхонд уу.

Улс эх орныхоо эсрэг үйлдсэн, ядарсан ард иргэдээрээ тохуурсан энэ эрх мэдлийг ХӨСҮТ-ийнхөнд хэн өгсөн бэ. Хуруугаа л хөдөлгөвөл улсаар нь халдвартай ч болгож мэдэх хүмүүсийг хэн хянах ёстой вэ, С.Энхболд сайд аа. Та болон таны хариуцаж байгаа яамныхан биш гэж үү.

Хэдэн эмч нар нь хоолтой, хоолгүй, нойртой, нойргүй 14 хоног тусгаарлалтад ажиллаж, халдвартай хэмээн оношилсон иргэдийг нь эмчлэх гээд туйлдаж байдаг. Гэтэл нэг хэсэг нь савхан мод, пос машинаар дамжуулан хууль бус ажиллагаа хийж, халаасаа түнтийлгэж байна. Хэн хариуцлага тооцох вэ. Асуулт бүхэнд минь хариулна уу, Эрүүл мэндийн сайд С.Энхболд оо.