МАН, ТЭР ДУНДАА АМ НЭЭХ БҮРТЭЭ “ШУДАРГА ЁС ТОГТООНО” ХЭМЭЭДЭГ ЕРӨНХИЙ САЙДЫГ ЭНЭ УДААД ӨӨРТӨӨ, ӨӨРИЙНХ НЬ АХАЛЖ БАЙГАА ТАНХИМЫН АЛБАТУУДДАА ХЭР ШУДАРГА ХАНДАХЫГ ХАРЪЯ

         Дөнгөж дөрөө олж байсан У.Хүрэлсүхийн Засгийн газар одоогоос хоёр сарын өмнө бүрэн бүрэлдэхүүнээрээ “Дөнгөж нярайлсан эмэгтэйг углааш, халаадтай нь ХӨСҮТ рүү зөөвөрлөсөн” шалтгаанаар огцорч байлаа. Бараг сайн дураараа гэж болохоор энэ огцролт сайд нарынх нь хувьд лав гэнэтийн шийдвэр байсан билээ. Өөрөөр хэлбэл, У.Хүрэлсүхэд тухайн үед хариуцаж байсан ажлаа ямар нэг шалтгаан олж, гялс өгчихөөд ирэх Ерөнхийлөгчийн сонгуульд өөрийгөө бэлтгэх нь л чухал байсан гэсэн үг. Тэр өөрийн бүрдүүлсэн кабинетийн сайд нараа, тэднийг дагаж агентлаг, газар, хэлтсүүдэд албан тушаалд томилогдоод байсан хүний нөөцийг нь ч хөсөр хаяж, өөрийгөө “сугалсан” билээ.

            Нөгөө талаар албатууд нь хүнлэг бус байсны төлөө төрийн албаа шууд өгч болдгийг, өгөх ёстойг тэр харуулсан гэгддэг. Тэгвэл яг энэ зарчим МАН-д үйлчилдэг юм бол Ерөнхий сайд Л.Оюун-Эрдэнэд огцрох шалтгаан хангалттай байна.

              Хамгийн эхний шалтгаан бол ХӨСҮТ-ийн сувилагч, эмч нар бусдад коронавирусийн шинжилгээ хийж байгаа нэрээр “СӨРӨГ” гэх бичиг хуурамчаар үйлдэн хамгийн багадаа 80 мянган төгрөгөөр борлуулдаг байсныг хууль, хяналтынхан илрүүлчихлээ.

            Тэр ч бүүхэл эхнэр нь нөхрийнхөө өмнөөс хэд хэдэн удаа шинжилгээ өгч, “Сөрөг” гэсэн хариу авдаг байсан, хамгийн сүүлд хийлгэсэн шинжилгээгээр өөрөө ковидтой нь илэрсэн үндэстний эсрэг гэмт хэрэг Л.Оюун-Эрдэнийг Ерөнхий сайд байх үед гарлаа. Энэ бол цэвэр хариуцлагын асуудал.

            Зөвхөн дээрх хоёр хууль бус үйлдэл албатууд нь хүнлэг бус байсны төлөө огцрох бүрэн үндэслэл яах аргагүй мөн. Дээрх хоёр үйлдэл бол нярайлсан эмэгтэйг углааш, халаадтай машинд зөөвөрлөснөөс хэдэн мянга дахин их хор хөнөөлтэй, монгол үндэстний эсрэг гэмт хэрэг билээ.

            Үүнээс гадна тэр өмнөх Засгийн газрынхны үсээ цайж, зүсээ гундтал ажиллаж, ковидыг тархаахгүйн төлөөх хөл хориог ажлаа авуутаа зад тавьж, “Одоо дахиж хөл хорио тавихгүй. Дэлхий ертөнц ковидтой зэрэгцэн амьдраад байхад бид юунаас нь айх гэж” хэмээн “томорч”, хөл хориог сулруулсан билээ. Үүний гороор өнөөдөр 4000 шахам хүн ковидын халдвартай нь батлагдахаас гадна “Нийтийн дунд халдвараа алдчихлаа. Одоо ковид тархаагүй газар, гудамж гэж байхгүй. Тусах эсэх нь иргэн таны ухамсараас шалтгаална” гэсэн тайлбар тавиад сууж байгаа нь дэндүү хариуцлагатайнх гэж ойлгох уу.  

        МАН, тэр дундаа ам нээх бүртээ “Шударга ёс” хэмээдэг Ерөнхий сайдыг энэ удаад өөртөө, өөрийнх нь ахалж байгаа танхимын албатууд үндэсний аюулгүй байдалд заналхийлсэн, үндэстний эсрэг гэмт хэрэг үйлдээд байхад хэр шударга хандахыг харах үлдлээ.

        Хэрвээ У.Хүрэлсүхийн ердөө 60-аадхан хоногийн өмнө бараг нулимс дуслуулан байж хэлж зогссон хүнлэг байх тухай, хэн нэг албат нь хариуцлага алдвал бүгд хүлээх тухай мэдэгдэл үнэн бол Л.Оюун-Эрдэнэ ч огцрох ёстой. У.Хүрэлсүхэд дөрөө олж, төсвөө батлуулсан танхимаа огцруулах зориг байдаг юм билээ. Л.Оюун-Эрдэнийн танхим хариуцлагагүй, харалган байгаагийнхаа төлөө огцроход харамсаад байх юм бараг байхгүй. Түүнд тийм зориг байж чадах уу.