“Сая төгрөгийг одоо март” гээд шууд хэлчихвэл дээргүй юу, Ерөнхийлөгч, Ерөнхий сайд аа

Б. Цогтбаяр:
Улс төр- Тэрслүү үг

2021-03-16, 1591

-Өрх бүрд сая төгрөг өгөөч гэж гуйж бөхийсөн Х.Баттулга, өгөхгүй гэж гүрийж гэдийсэн МАН хоёроос дөрвөн сар ганцхан сая төгрөг хүлээн харуулдаж суугаа ард түмэн л хөөрхий байна-

Ерөнхийлөгч Х.Баттулга өрх бүрд нэг сая төгрөг өгөх сураг дуулгаад даруй дөрвөн сарын хугацаа өнгөрчээ. Цар тахлын хямралын хавсарганд уруудаж яваа ард түмэн өнөөх нэг сая төгрөгийн дэмжлэгийг нь хүлээсээр, “бухын доодохыг харж үнэг турж үхэх” гэгч болж гүйцлээ. Хэзээ, яаж олгох нь тодорхойгүй нэг сая төгрөгт найдаж, хүнсний дэлгүүрт өр бичүүлж, өдөрт хоёр төмс, хоёр зуун грамм мах зөөж буй айлууд ч бий гэх.

Өрх бүрд сая төгрөг өгөөч гэж гуйж бөхийсөн Х.Баттулга, өгөхгүй гэж гүрийж гэдийсэн МАН хоёроос дөрвөн сар ганцхан сая төгрөг хүлээн харуулдаж суугаа ард түмэн л хөөрхий байна. Х.Баттулга нь дөрвөн жилийнхээ төгсгөлд хийсэн ажилтай харагдах гээд “Алаагүй байвгайн арьсыг арав хуваах” гэгчээр орж ирээгүй оффшорын мөнгөнөөс өрх бүрд сая төгрөг тараана гэж хоосон ам гарч, амандаа багтах гэж бантахдаа МАН-ыгаа гуйж гувшаад салахаа больсон. МАН нь болохоор оффшороос мөнгө орж ирээгүй, өрх бүрд нэг сая төгрөг буюу 900 тэрбум төгрөг гаргах өөр нөөц боломж байхгүй гээд гэдийчихсэн. Тэгсэн атлаа одоо 500 тэрбум төгрөгөөр залуучуудыг өглөө эрт босдог, хүнтэй зөв харицдаг болгох тухай яриад сууж байгаа нь өлсөхийн эрхэнд үүрээр босож махны зах явдаг, өвдөг сөгдөн гуйж хэдэн уут яс олж бор хоногоо залгадаг иргэдэд ихээхэн хоржоонтой санагдаж буй нь мэдээж.

Манай улсын нэн ядуу, өлсгөлөнгийн ирмэгт байгаа иргэдийн тоо коронавирусийн халдвараар өвчлөөд буй хүмүүсийн тооноос 100 дахин их байна. Өөрөөр бол манай улсын гурван хүн тутмын нэг нь ядуу буюу тэдэнд нэг сая төгрөг бол зүүдэндээ л боодлоор нь барьж, тоолж болох мөнгө. Бас барилгын туслах залуугийн бүтэн сар тоосго, цемент үүрч олох, орцны жижүүр эмэгтэйн хоёр сар нуруугаа “тасартал” хана, шал угааж олох, ээлжийн манаач “өвөө”-гийн гурван сар нойроо хугасалж олох, цагийн ажилтан оюутны 333 цаг аяга угааж, зар тарааж, хоол зөөж цуглуулах мөнгө. Чухамдаа нэг сая төгрөг гэдэг бол өнөөгийн нийгэмд “өгнө” гэж худлаа ам гарч, хоосон хүлээлт үүсгэж боломгүй их мөнгө юм. “Тоглож болохгүй нас” гэдэгтэй ижил “амлаж болохгүй мөнгө” гэж бас байдаг гэх үү дээ. Уг нь ажил хийсэн хүн бүр нэг сая төгрөгийн цалин авдаг, тэр нь амьдралд нь хүрэлцдэг бол Ерөнхийлөгчөөс ч, МАН-аас ч сая төгрөг царайчилж суухгүй л байх сан. Даанч нэг сая төгрөг бол төр засгийн нийт хүн амаа тэнд хүргэнэ гэж тэмүүлээд байдаг алтан дундажийнхны сарын орлоготой тэнцэх мөнгө учраас ийн итгэл найдвараа алдахгүй хүлээж байгаа юм.

Ерөнхийлөгч Х.Баттулга өрх бүрд нэг сая төгрөг олгох асуудлаар УИХ, Засгийн газарт нийт долоон удаа ханджээ. Гэвч аль алинд нь үл ойшоогдож, тархай бутархай намын хүчгүй Ерөнхийлөгч гэдгээ мэдэрсэн байх юм. Ерөнхийлөгч Х.Баттулга сая төгрөгийн саналаа өргөн барих бүрт ард түмэн өндөлзөж байлаа.

Тухайлбал, Ерөнхийлөгч Х.Баттулга анх 2020 оны арваннэгдүгээр сарын 17-нд төрөөс өрх бүрд нэг сая төгрөгийн дэмжлэг үзүүлэх саналыг Ерөнхий сайд У.Хүрэлсүхэд хүргүүлсэн байдаг. Гэвч Засгийн газар дэмжээгүй учраас буцаагдсан.

Улмаар найм хоногийн дараа буюу 2020 оны арваннэгдүгээр сарын 25-нд Х.Баттулга өрх бүрд нэг сая төгрөгийн дэмжлэг үзүүлэхэд зарцуулагдах мөнгийг улсын төсөвт суулгах шаардлагатай гэж 2021 оны улсын төсвийн тухай хуульд хориг тавьсан ч УИХ хүлээж аваагүй.

2020 оны арванхоёрдугаар сарын 31-нд он солигдох мөчид өрх бүрд нэг сая төгрөгийн дэмжлэг үзүүлэх саналаа Х.Баттулга дахин дэвшүүлж, сая төгрөгний хүлээлтийг дахин эхлүүлсэн.

2021 оны нэгдүгээр сарын 8-нд “Өрх бүрд нэг сая төгрөгийн дэмжлэг олгох тухай” УИХ-ын тогтоолын төслийг УИХ-ын дарга Г.Занданшатарт өргөн барьсан. Гэвч уг тогтоолын төслийг УИХ-аар хэлэлцэхгүй байсаар чуулганы хаалттай залгасан.

2021 оны нэгдүгээр сарын 28-нд буюу УИХ-ын намрын чуулганы хаалтын өмнөх өдрийн хуралдаанд Ерөнхийлөгч Х.Баттулга оролцож “Цар тахлаас шалтгаалан ард иргэдийн амьжиргаа өдрөөс өдөрт дорж буй энэ үед УИХ-д өргөн барьсан өрх бүрд нэг сая төгрөг олгох тогтоолын төслийг хэлэлцэхгүйгээр чуулган хаах гэж буйд үнэхээр гайхаж байна. Үүнтэй холбогдуулан би зөвхөн энэ асуудлаар УИХ-ын ээлжит бус чуулганыг зарлан хуралдуулах болно” гэж мэдэгдсэн.

Улмаар 2021 оны хоёрдугаар сарын 1-нд УИХ-ын чуулганыг ээлжит бусаар хуралдуулж, өрх бүрд сая төгрөг олгох асуудлыг хэлэлцэх саналыг УИХ-ын дарга Г.Занданшатарт хүргүүлсэн. Ээлжит бусаар хуралдах тов зарлаагүй.

Амандаа багтаж, ард түмэнд аятайхан харагдах гэсэн Х.Баттулга аргаа барахдаа хоёрдугаар сарын 11-нд УИХ-ын ээлжит бус чуулган зарлан хуралдуулах асуудлаар хамтарч ажиллахыг УИХ-ын гишүүдээс хүссэн. Хэдэн гишүүн уг хүсэлтэд нь хариу өгсөн нь тодорхойгүй.

Өчигдөр УИХ-ын хаврын чуулган нээлтээ хийлээ. Ерөнхийлөгч Х.Баттулга энэ долоо хоногт эсвэл ирэх долоо хоногоос нэг их хэтрэлгүй өрх бүрд нэг сая төгрөг олгох саналаа “сугавчлаад” УИХ-ын дарга Г.Занданшатартай уулзах нь гарцаагүй. Дөрвөн сарын өмнө зөвшөөрөөгүй МАН гуравхан сарын дараа сонгууль болох гэж байхад Ерөнхийлөгчөөс өрх бүрд сая төгрөг тараалгаж, сонгуулийн сурталчилгааг нь санхүүжүүлж өгнө гэдэг юу л бол. Нэг сая төгрөгөөр ард түмэндээ хайртай, хийсэн ажилтай харагдах гэсэн Х.Баттулга, тэгж харагдуулахгүй гэсэн МАН хоёрын эл өрсөлдөөн лавтай сонгууль өнгөртөл үргэлжилнэ. Өөрөөр бол Х.Баттулга нь сая төгрөг өгөх саналаа шуудхан татчихвал хэлсэндээ хүрдэггүй муу нэр зүүчих гээд, МАН нь сая төгрөг өгөхгүй гэж шууд хэлчихвэл ард түмэндээ хайргүй гэж харагдчих гээд байгаа бололтой юм. Харин өнгөрсөн дөрвөн сар сая төгрөг хүлээж суусан, дахиад гурван сар хүлээж суух ард түмэн л хөөрхий байна. Тиймээс мөнгөний мөрөөсөл болж суугаа ард түмэндээ сая төгрөг өгнө, өгөхгүй гэж байн байн өндөлзүүлж, улс төрийн шоглоом хийхээ одоо зогсоож Х.Баттулга ч, эрх баригч МАН ч өрх бүрд нэг сая төгрөг өгч чадахгүй гэдгээ шууд хэлчихвэл дээр юм биш үү.

“Сая төгрөгийг одоо март” гээд шууд хэлчихвэл дээргүй юу, Ерөнхийлөгч, Ерөнхий сайд аа

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4

Сэтгэгдэл үлдээсэн: 2021-03-16 17:28:29

Hun : Say tg avhiimsoon,
Сэтгэгдэл үлдээсэн: 2021-03-16 17:28:29

Hun : Say tg avhiimsoon,
Сэтгэгдэл үлдээсэн: 2021-03-16 17:28:28

Hun : Say tg avhiimsoon,
Сэтгэгдэл үлдээсэн: 2021-03-16 09:52:43

Me : Yamarch bolobsrolgui jenko durak 4 jil mongoliig horollo hairan 4jil orkuuda

Шинэ мэдээ

Нийтлэлчид