Л.Оюун-Эрдэнэ даанч дээ, С.Зоригийн хэргээр “улс төр” хийх эр гэж санасангүй

Б. Цогтбаяр:
Улс төр- Тэрслүү үг

2021-03-13, 1656

Ерөнхий сайд Л.Оюун-Эрдэнэ даанч дээ. Төр, нийгмийн нэр зүтгэлтэн С.Зориг агсныг хөнөөсөн аллагын хэргийг өрсөлдөгчдөө харлуулах, өөрийн нэр хүндийг өсгөх “хэрэгсэл” болгож ашигладаг увайгүй улстөрчдийн шинэ үеийн залгамжлагч нь Л.Оюун-Эрдэнэ байх гэж. Уг нь түүнийг С.Зоригийн хэргээр “шоу” хийх хүртэл нь буюу өчигдрийг хүртэл үзэл бодол, үндэстнээ гэх бодлого нь бусад улстөрчөөс тэс өөр, бохир улстөрд шинэ соёл, хандлага авчрах залуу удирдагч гэж харж эхлээд байлаа. Даанч тэр МАН-ын ах нарынхаа л адил “увайгүй”, улстөрийн карьераа өсгөхийн тулд шоронд хоригдож байгаа эмэгтэйн нулимсыг урсгахаа ч юман чинээ боддоггүй нэгэн байж таарлаа.

Өчигдөр буюу Олон улсын эмэгтэйчүүдийн баярын өдөр нийтээрээ амарч байх үед Ерөнхий сайд Л.Оюун-Эрдэнэ “С.Зоригийн хэрэг”-ээр Ерөнхийлөгч Х.Баттулгыг “харлуулах” гээд ээж, эхнэрээ ч баярлуулах завгүй байлаа. Ингэхдээ Л.Оюун-Эрдэнэ эхлээд Засгийн газраа ээлжит бусаар хуралдуулж, С.Зоригийн хэрэгт буруутгагдан ял эдэлж байгаа Т.Чимгээ нарын хэргийг шүүн таслах явцад эрхийг нь зөрчиж, хүчээр хэрэг хүлээлгэсэн байж болзошгүй баримттай танилцсан. Дараа нь 401 дүгээр хаалттай хорих ангийн эмнэлэгт өөрийн биеэр очиж “С.Зоригийн хэрэг”-ээр 2016 оны арванхоёрдугаар сарын 27-нд 20 жилийн ял авсан Т.Чимгээтэй уулзлаа.

Түүний эл уулзалт нь хоёр үндсэн зорилготой байсан гэж харагдаж байна.

ЗОРИЛГО-1: Өрсөлдөгчөө С.Зоригийн хэрэгт хамаатуулж, харлуулах МАН-ын шалгарсан арга

Ерөнхий сайд Л.Оюун-Эрдэнэ Т.Чимгээтэй уулзалт хийх үеэрээ олон нийтэд хандаж “Сүүлийн үед Б.Баасанцогт гэж хүн гарч ирсэн. Хэргүүдийг Б.Баасанцогт өөрийн компьютертээ хойшлуулахаар төлөвлөдөг байсан хэрэг илэрсэн. Үндэсний аюулгүй байдлын зөвлөлд энэ асуудлыг ярина. Хэрвээ Б.Баасанцогт шүүхийн хараат бус байдалд хөндлөнгөөс оролцсон нь тогтоогдвол том асуудал болж хувирна. Үндэсний аюулгүй байдлын зөвлөлийн нарийн бичгийн дарга А.Гансүх энэ асуудалд оролцсон байж болзошгүй асуудал бий” гэж мэдэгдсэн. Өөрөө хэлбэл, Ерөнхий сайд Л.Оюун-Эрдэнэ “С.Зоригийн хэрэг”-ийн ээлжит буруутнаар Ерөнхийлөгч Х.Баттулгыг “нэрлэлээ”.

Тодруулбал, ҮАБЗ-ийн Нарийн бичгийн дарга А.Гансүх, өмгөөлөгч гэх Б.Баасанцогт нарыг Ерөнхийлөгч Х.Баттулгын хүмүүс гэж нийтэд ойлгуулах кампанит ажил өнгөрсөн сар орчим хугацаанд өрнөсөн. Өмгөөлөгч Б.Баасанцогтыг нэр бүхий шүүгч нарыг архидуулж, биеэ үнэлэгч зуучилж өгдөг байсан гэх бичлэг олон нийтэд цацагдсан. Улмаар Б.Баасанцогт нь Ерөнхийлөгч Х.Баттулгын даалгавраар шүүгч нартай ажлын бус цагаар уулзаж, хэнд хэдэн жилийн ял өгөх, хэнийг ялаас мултлах чиглэл өгдөг байсан гэх ойлголтыг нийтэд хурдацтай тараасан. Үр дүнд нь Б.Баасанцогт бол Ерөнхийлөгч Х.Баттулгын шүүгч нартай холбоо тогтоож, өөрийн талдаа оруулах, шүүхийг гартаа авах ажлыг гардан зохион байгуулдаг хүн гэж нийтээрээ ойлгож эхэлж байх шиг.

Гэтэл яг энэ үед Ерөнхий сайд Л.Оюун-Эрдэнэ “Б.Баасанцогт С.Зоригийн хэрэгтэй холбоотой шүүх хурлуудыг хойшлуулдаг, шүүхэд нөлөөлдөг байсан нь илэрсэн” гэж мэдэгдэл хийлээ. Өөрөөр хэлбэл, Л.Оюун-Эрдэнэ Б.Баасанцогтоор төлөөлүүлэн “С.Зоригийн хэргийг шүүхэд нөлөөлөх замаар гацааж, удаашруулж байгаа гол хүн нь Х.Баттулга” гээд хэлчихэж байгаа юм.

Уг нь одоогоос гурван жил гаруйн өмнө С.Зоригийн хэргийг удаашруулдаг, гацаадаг хүнээр Хууль зүй, дотоод хэргийг сайд асан Ц.Нямдорж нэрлэгдэж байлаа. Тодруулбал, ТЕГ-ын дарга асан, хошууч генерал Б.Хурц “Хууль зүйн сайд Ц.Нямдорж гэдэг хүн сайд болох бүртээ энэ хэргийг шалгах ажлын хэсгийг өөрчилж, нийт дөрвөн удаа тараасан. Ажлын хэсэгт ажиллаж байсан 32 албан хаагчийг сольсон. Улс төрийн болон бусад зорилгоор Цэндийн Нямдорж энэ хэрэгт нөлөөлж байна.

Сайд болохоороо энэ хүн шууд Тагнуулын байгууллагаар оролдож эхэлдэг. Өөрөө биш ч хэн нэгнээр, өөр ямар нэгэн гишүүдээр хууль санаачлуулна, өргөн барина, энэ байгууллагын эрх мэдэл, бүх зүйл рүү халдаж эхэлдэг. Өөрөө хууль зөрчдөг. Ц.Нямдорж өөрөө Эрдэнэтэд шахааны бизнестэй. С.Зоригийн хэрэг Эрдэнэтээс үүдэлтэй байх магадлал өндөр. С.Зоригийн хэргийн захиалагчийг хайх, илрүүлэх хэрэгт Ц.Нямдорж удаа дараа саад болж байна. Ц.Нямдоржийн ярьдаг хоёрхон сэдэв байдаг. Нэгдүгээрт, “Эрдэнэт” үйлдвэр, хоёрдугаарт, С.Зоригийн хэрэг. Энэ хоёр хэрэг хоорондоо холбоотой. С.Зоригийн хэрэг Эрдэнэтээс гаралтай. С.Зоригийн хэрэгт ял авсан этгээдүүд Эрдэнэтийнх. Надад хардах асуудал их бий. С.Зоргийн хэрэгт Ц.Нямдоржийг шалгах ёстой” хэмээн мэдэгдэж байсан.

С.Зоригийн хэрэгт улс төрийн зорилгоор нөлөөлж, удаашруулдаг, гацаадаг хүнээр Ц.Нямдорж ийн нэрлэгдсэн ч түүнийг шалгасан эсэх нь тодорхойгүй. Энэ асуудал тухайн үедээ сенсаци болоод л мартагдсан. Тэгвэл одоо С.Зоригийн хэрэгт нөлөөлдөг, гацаадаг, удаашруулдаг байсан гол хүнээр Х.Баттулга нэрлэгдчихлээ. С.Зоригийн хэргийг илрүүлэх хүртэл 18 жил, илэрснээс хойш таван жил нэр нь огт дурсагдаагүй, ядаж л энэ хэргийн ард хэн, хэн байгааг цор ганцаар мэдэж байж болох Б.Хурцын дурсаа ч үгүй Б.Баасанцогт, А.Гансүх, Х.Баттулга нар С.Зоригийн хэрэгт холбоотой байна чинээ хэн санах билээ.

Ингээд харвал хэний ч танихгүй Б.Баасанцогт гэгчийг яагаад гэнэт олон нийтийн анхааралд оруулав, яагаад Б.Баасанцогтын бичлэгийг задлахдаа Үндэсний аюулгүй байдлын зөвлөлийн ажилтан, Х.Баттулгын хүн гэж танилцуулав, одоо яагаад С.Зоригийн хэрэгтэй холбоотой асуудлуудыг удаашруулдаг, гацаадаг хүн гэж цоллов. Энэ бүгдийн цаана Ерөнхийлөгчийн сонгуулийг угтсан, Х.Баттулгыг харлуулах гэсэн МАН-ын том бас бохир улс төрийн тоглолт явж байна гэдэг нь хэнд ч илэрхий харагдана.

Төр, нийгмийн нэрт зүтгэлтэн С.Зориг агсны аллагын хэрэг даанч “мөлжүүртэй”, мөнхийн сэдэв юм. МАН-ынхан үеийн үед, ялангуяа өрсөлдөгчөө зайлуулах бүрдээ С.Зоригийн хэргийг гаргаж ирдэг байсан. Ц.Элбэгдорж, Э.Бат-Үүл нар цөм С.Зоригийн хэрэгт даруулсан. Тэгвэл С.Зоригийн хэргээр даруулах дараагийн хүн нь Х.Баттулга байжээ. Ерөнхийлөгчийн сонгуулийн өмнө Х.Баттулгыг С.Зоригийн хэрэгт хамаатуулах бохир технологийг гардан хэрэгжүүлэх хүн нь Л.Оюун-Эрдэнэ байсан нь харамсалтай.

ЗОРИЛГО-2: Зовсон эмэгтэйн нулимсаар “оноо авах” бохир технологи

Эмэгтэйчүүдийн эрхийг хамгаалах өдөр хэвлэлүүд дагуулан шоронгийн эмнэлэгт өөрийн биеэр очиж, шүүх таслан явцад эрх нь ноцтой зөрчигдсөн байж болзошгүй Т.Чимгээтэй уулзаж, нулимстай яриаг нь анхааралтай сонсож суусан нь Л.Оюун-Эрдэнийн дараагийн зорилго нь улс төрийн карьераа өсгөх, ард түмнээс ялангуяа эмэгтэйчүүдээс оноо авах байв. Т.Чимгээ, Л.Оюун-Эрдэнэ хоёрын уулзалт бүх нийтийн анхаарлыг татна, ард түмэн уярч, хайлна гэдэг тооцоолол аль эрт гарчихсан байсан биз.

Эрүүдэн шүүлгэж, хилсээр яллагдсан байж болзошгүй Т.Чимгээгийн яриаг улс даяараа анхааралтай сонсож, түүнд хэрэг хүлээлгэхийн тулд шүүх, хууль хяналтынхан хэрхэн дарамталж, тамлан зовоож, ар гэр, үр хүүхдийг нь яаж зовлонгийн далайд унагасныг нь мэдэж авлаа. 18 жил илрээгүй “С.Зоригийн хэрэг”-ийн буруутан болж, 20 жилийн хорих ял сонсож, таван жил зургаан сар тамлал, дарамт дор шоронгийн хүйтэн өрөөнд байсан хөөрхий эмэгтэйн яриа, нулимс Монголын эмэгтэйчүүдийн өр зүрхийг өвтгөсөн нь мэдээж.

Мөн Ерөнхий сайд Л.Оюун-Эрдэнэ “Бид энэ эмэгтэйд хүчээр хэрэг хүлээлгэсэн байвал яах вэ гэдэг асуудал бий. Хорих ангид байгаа хүн Т.Чимгээ рүү мессэж илгээн дарамталсан тохиолдол гарсныг өмнө нь УИХ-аар ярьсан. Мөн хашаанд нь хүний цогцос аваачиж булсан, уух зүйлд нь мансууруулах бодис хийсэн, нүцгэн зургийг нь авч гэр бүлийн хүнд нь явуулсан асуудал байсан. Эл хэргийг сэргээн шалгуулж өгөхийг хүсч надад өргөдөл гаргаж өгсөн. Тиймээс Засгийн газраар хэлэлцэж, энэ асуудлыг нууцаас гаргах асуудлыг хэлэлцэнэ. Шүүх ямар шийдвэр гаргасан нь бус, гагцхүү шүүн таслах үйл ажиллагааны явц хуулийн дагуу байсан эсэх нь чухал. Эрүүдэн шүүсэнтэй холбоотой хэрэг Төв аймгийн шүүх, Давж заалдах шатны шүүх дамжин Улсын дээд шүүхээс буцаад байна. Шүүхийн байгууллага яагаад зарим хэргийг богино хугацаанд шийддэг, заримыг нь сунжруулдаг асуудлыг ч Үндэсний аюулгүй байдлын зөвлөлийн хурлаар хэлэлцүүлнэ. Хэрвээ Т.Чимгээ нарыг эрүүдэн шүүсэн нь тогтоогдвол Эрүүгийн хэрэг хянан шийдвэрлэх тухай хуулийн 41.1-д заасны дагуу шинээр илэрсэн нөхцөл байдлын улмаас өмнө нь оноосон хэргийг хүчингүйд тооцож, шинээр мөрдөн шалгах хууль, эрхзүйн үндэслэл бүрдэнэ” гэж мэдэгдсэн.

“С.Зоригийн хэргийн буруутан, алуурчин” хэмээн нийтэд чичлүүлж, дээрээс нь хууль хяналтынханд эрхээ зөрчүүлж, дарамтлуулж, “дээшээ тэнгэр хол, доошоо газар хатуу” гэгч болоод байгаа Т.Чимгээгийн асуудлыг Ерөнхий сайд Л.Оюун-Эрдэнэ ийнхүү өөрийн биеэр анхаарч, эрх нь зөрчигдсөн, эрүүдэн шүүсэн эсэхтэй холбоотой шүүх дамжсан хэргийг нь яаравчлан шийдвэрлэх, магадгүй өмнө нь оноосон ялыг нь хүчингүйд тооцож, шинээр шалгаж эхлэх мэдэгдэл хийсэнд нь ард түмэн талархаж, түүнд алга ташив. Хэзээнээс л уяхан, өрөвч ард түмний сэтгэлийг хэрхэн хөдөлгөж, ард түмнээс, ялангуяа эмэгтэйчүүдээс хэрхэн оноо авахаа Л.Оюун-Эрдэнэ сайн тооцоолжээ. Тиймдээ ч Т.Чимгээтэй Эмэгтэйчүүдийн эрхийг хамгаалах өдөр уулзсан биз. Эмэгтэйчүүдийн эрхийг хамгаалах, ингэхдээ шоронд хоригдож байгаа эсэхээс нь үл хамааран тэгш эрхтэй байхыг чухалчилж буй нь өнгөн талаасаа алга ташмаар үйлдэл мөн. Гэхдээ Т.Чимгээгийн хувьд МАН, АН-ын улс төрийн “зодооны” золиос болж, захиалгаар яллагдсан байж болзошгүй эмэгтэй. Мөн шоронгийн зузаан хананы цаанаас үр хүүхэддээ санаа зовхоос өөр юу ч хийж чадахгүй байгаа эх хүн. Тийм ч учраас түүний зовж шаналсан, бэтгэрсэн сэтгэлээр улс төр хийж яавч болохгүй баймаар...Тэгж ярьвал Т.Чимгээг шоронд таван жил гаруй зовж байгаагын гол буруутнууд нь Л.Оюун-эрдэнийн МАН-ын ах нар нь ч байж болзошгүй. Хэрвээ ах нар нь зовоож, дүү нь очиж нулимсыг нь арчиж буй бол ямар гээчийн тохуурхал болж хувирах вэ.

Ерөнхий сайд Л.Оюун-Эрдэнэ даанч дээ. 23 жилийн өмнөх хэргээр улс төр хийх “ядарсан эр” гэж даанч санасангүй. С.Зоригийн хэргийг яриад, буруутныг нь хайгаад ирэхээрээ л МАН-ын ах нарынхаа өнгөрсөн түүхийн алдааг давтаж байгаа юм. Бас тэр ах нартайгаа үй зайгүй адилхан, өрсөлдөгчөө намнаж, өөрийгөө дөвийлгөдөг улс төрийн бохир технологийг нь төгс эзэмшсэн гэдгээ өчигдөр харууллаа.

Л.Оюун-Эрдэнэ даанч дээ, С.Зоригийн хэргээр “улс төр” хийх эр гэж санасангүй

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4

Сэтгэгдэл үлдээсэн: 2021-03-13 11:13:08

зочин: Зоригийн хэргийг бүдэгрүүлэхийг оролдогчид л энэ хүнийг ятгаж юм бичүүлж
Сэтгэгдэл үлдээсэн: 2021-03-13 10:38:46

зочин: Юу нь буруу байнаа. Эхнээсээ тодрхойгүй байгаа жижиг ч гэсэн юм болгоныг бүх юмыг, тодруулж байж л хэргийг эцэслэдэг биз дээ. Юм болгоныг улс төржүүлдэгээ болимоор байна
Сэтгэгдэл үлдээсэн: 2021-03-09 20:16:10

зочин: ХОНГИЛ ГЭЭЧ ЮМАНД ГҮН ОРСОН ТҮҮНИЙГ ТАТАЖ ГАРГАХААР ХИРЭЭРЭЭ ҮЗЭЭД Л БАЙНА ШҮҮ ДЭЭ ЮМ ОЙЛГОДОГГҮЙ ТЭНЭГ ҮХЭЭРИЙН БУГНУУДАА
Сэтгэгдэл үлдээсэн: 2021-03-09 16:08:56

Зочин: Суллаж чадахгүй бол хүний сэтгэл санаагаар тоглоод улс төр хийж байдаг. Арчаагүй эрийн шинжгүй новшнууд юмдаа.