Бүх нийтийн бэлэн байдлын үед УИХ-ын нэр бүхий гишүүд эрх мэдэл, албан тушаалын байдлаа урвуулан ашиглаж, “том толгойлж” халдваргүй гэх тодотголтой орон нутаг руу зорчив. Төрийн өндөр дээд албан тушаалтнуудад хөл хорионы дэглэм үйлчилдэггүй гэдгийг ганцхан жишээнээс харж болохоор байлаа.

Тухайлбал, УИХ-ын гишүүн Б.Пүрэвдорж хоёрдугаар сарын 7-ны өдөр Улаанбаатар хотоос гарч Ховд аймгийн Жаргалант сумаар зочилж, өндөр настнуудынхаар золголт хийсэн гэнэ. Мөн тэрбээр хоёрдугаар сарын 15-ны өдөр “Нуур гарна” гэх шалтгаанаар Жаргалант сумын төвөөс гарч бусад сумаар зорчиж, золголт хийгээд амжсан бололтой.

Учир нь, УИХ-ын гишүүн Б.Пүрэвдорж өөрийн цахим хуудастаа “Ховд аймгийн Алтай, Үенч, зарим өндөр настнуудтай золголоо” хэмээн хөгшидтэй хууч хөөрсөн мэдээлэл нийтэлж, олныг шуугиулав. Эрх мэдэлтэй гишүүнийг Ховд аймгаар зочлох үеэр тус аймгаас орох, гарах хөдөлгөөнийг хязгаарласан байжээ. Тодруулбал, Ховд аймгийн Засаг дарга 2021 оны хоёрдугаар сарын 8-ны өдрийн А/62 тоот захирамж гарч, сум орон нутгаас гарах, орох хөдөлгөөн нийтийн болон хувийн тээврийн хэрэгсэлийг зогсоож, “тэг” зогсолт хийсэн өдөр байлаа.  

Түүнчлэн Улаанбаатар хотоос гарах, орох хөдөлгөөнийг хязгаарласан байх үед УИХ-ын гишүүн Б.Пүрэвдорж хэрхэн, яаж Улаанбаатараас гарсан бэ гэх асуулт хариулт нэхэж байгаа юм. Түүний Ховд аймаг руу зорчих зайлшгүй, хүндэтгэн үзэх шалтгаан нь юу байв. Орон нутгийн иргэд өнгөрсөн арваннэгдүгээр сараас хойш Улаанбаатар хотод “хоригдож” хүндэтгэн үзэх шалтгаангүй гэх ганцхан өгүүлбэрээр амаа таглуулсаар гуравдугаар сарын 1-тэй золгож, арай чүү гэрийн бараа харлаа. Өөрөөр хэлбэл, бие нь өвдөөгүй, ах, дүү, аав, ээж нь нас бараагүй л бол тэд Улаанбаатар хотод дөрвөн сар гацав. Гэтэл УИХ-ын гишүүн нутгийнхаа иргэдтэй золголт хийхийн тулд дөрвөн сар гацсан иргэдийн гацааг дөрвөн удаа өгсөн ПСР шинжилгээний хариугаар тайлж, нутаг руугаа хөлгийн жолоо залаад иржээ.

Ямар шалтгаан, ямар албан бичгийн хүчээр түүнийг Улаанбаатар хотоос гарсан талаар өөрөөс нь тодруулахад “Эрт болоод өнгөрсөн асуудал. Би дөрвөн удаа ПСР шинжилгээ өгсөн. Ямар ч асуудалгүй. Би өөр ямар ч мэдээлэл өгөхгүй” хэмээлээ.

УИХ-ын гишүүнийх нь эрх мэдэл түүнийг Ховд-Улаанбаатар, Улаанбаатар-Ховд чиглэлд бол төвөггүй хүргэх аж. Түүгээр ч зогсохгүй тойргийнхоо иргэдтэй хацраа нийлүүлэн хатирах боломжийг олгосон байна.

Дараагийн “том толгой”-той улс төрчөөр УИХ-ын гишүүн С.Бямбацогт нэрлэгдээд байгаа билээ.

Улаанбаатар хотоор гарах хөдөлгөөн хаалттай буюу өнгөрсөн хоёрдугаар сарын 27-ны өдөр Төв аймгийн Эрдэнэ сумын нутагт орших Асралт хайрханд гарчээ. Тэрбээр энэ талаараа цахим хуудастаа  “Сар шинийн 15-ны билэгт сайн өдөр Хэнтийн нурууны ноён оргил Асралт хайрхандаа 57-уулаа авирлаа” хэмээн зургаа оруулсан байна.

УИХ-ын гишүүн С.Бямбацогтоос Улаанбаатар хотоос хэрхэн ямар зөвшөөрлийн улмаас гаргасныг нь тодруулахад, “Намайг Улаанбаатар хотоос гарахад товчоонд шалгаж байсан нэг ч хүн байгаагүй. Хөдөө орон нутаг руу орох, гарах хөдөлгөөн хаасан гэдэг нь сум, аймаг буюу олон нийтийн газар руу зорчихыг хэлж байгаа юм. Ууланд гарахыг хориглосон зүйлгүй. Тийм учраас Асралт хайрханд авирчихаад ирлээ. Надаас гадна 200-аад хүн явж байна лээ. Тийм учраас би өөрийгөө хууль зөрчсөн гэж үзэхгүй байна” гэх тайлбар өглөө.

УИХ-ын гишүүд эрх мэдэл, албан тушаалаа ашиглаж, УОК-ын шийдвэрийг биелүүлсэнгүй юү. Эсвэл тэдэнд ямар ч хууль үйлчилдэггүй гэж үү.