ОФИЦЕРООС ОНЦГОЙН ДАРГА БОЛТЛОО, ГИТАРЧНААС ГЕНЕРАЛ БОЛТЛОО ТӨРИЙН ТЭРГҮҮНЭЭС ХОРМОЙДСОН Г.АРИУНБУЯН ХЭЗЭЭ ХАРИУЦЛАГА ХҮЛЭЭХ ВЭ

2026-06-10, 695

Гуравхан настай охин 30 метр цооногт амиа алдсан ослын араас олон нийт ОБЕГ-ын дарга Г.Ариунбуянгаас хариуцлага нэхээд, бүр шахаж, шаардаад барсангүй. Төрийн тэргүүн У.Хүрэлсүхийн унаган багын найз гэж гэдийгээд, толгой ч бөхийсөнгүй, тахимаа ч өгсөнгүй.

Гал түймэрт халтайтлаа, цас зуданд осготлоо, үер усанд зууртлаа явдаг хэдэн бор аврагчдад ард түмэн алга ташдаг. Хээрийн түймэрт халтайтлаа ажилласан аврагчид хар цай, хатсан гамбираар хооллож буйг хараад ард түмэн бухимддаг ч бас бахархдаг. Гэхдээ генерал цолондоо түүртсэн гял цал дарга нар нь эсрэгээрээ ард түмнийг ундууцуулдаг болчихсон. Өндөр барилгад гал гарахад талд нь ч хүрэх шатгүй, гүнзгий цооногт хүүхэд унахад таллаж тайрсан канистрнаас өөр багажгүй байлгаж байгаа дарга нарт нь нийгмээрээ тэгж эгдүүцээд байгаа юм. Төсөв мөнгө гучуу, тоног төхөөрөмж дутуу гэх түмэн шалтаг тоочиж аргацаасаар байх зуурт нь ослын хохирогчид нэмэгдсээр, онцгойн аврагчид ч хоригдсоор л байна. Тиймээс ч онцгой байдлын албаны оройн сэнтийд 11 жил тухалж байгаа Г.Ариунбуянгаас нийгмээрээ хариуцлага нэхээд байгаа юм. Харамсалтай нь, хариуцлага хүлээх байтугай, харцаа ч буруулсангүй, тэндээ тахигдчихсан аятай л байна.

Хатуухан хэлэхэд, онцгой байдлын албаны удирдлагын баг нь найзуудаараа нийлж, хамаатнуудаараа хамтарч ажиллуулдаг хувийн компанийх шиг л болчихлоо. Тэртээ 1989 онд Цэргийн нэгдсэн дээд сургуулийн хамт төгссөн У.Хүрэлсүх, Г.Ариунбуян, Ж.Чүлтэмсүрэн, Г.Сайханбаяр гэх дөрвөн найзын эрхшээлд энэ байгууллага бүхэлдээ орчихсон юм байна.

ОБЕГ-ын дарга Г.Ариунбуян, Төрийн тэргүүн У.Хүрэлсүх, хоёр Сүхбаатарын нэрэмжит ЕБ-ийн II сургуулийг 1985 онд хамт төгссөн 10 жилийн андууд. Дараа нь 1989 онд Цэргийн нэгдсэн дээд сургуулийг ч мөн хамт төгссөн. Дараа нь У.Хүрэлсүх, Г.Ариунбуян хоёр “Андууд” нэртэй хамтлаг байгуулаад бужигнуулж явсан ч үе бий. Хожим нь, 2014 онд У.Хүрэлсүх Шадар сайд байхдаа Г.Ариунбуянг зөвлөхөөрөө ажиллуулж байгаад ОБЕГ-ын дэд дарга болгосон. Удалгүй Г.Ариунбуян ОБЕГ-ын Тэргүүн дэд дарга болж, тэндээсээ ОБЕГ-ын дарга болж дэвшсэн. Ийнхүү Г.Ариунбуян унаган багын найз У.Хүрэлсүхийнхээ татаас, түлхээсээр ОБЕГ-ын дэд дарга, тэргүүн дэд дарга, даргаар 11 жил ажиллаж байна.

Тайлбар: У.Хүрэлсүх, Г.Ариунбуян, Г.Сайханбаяр, 1989 ба 2022 он

ОБЕГ-ын харьяа Үндэсний аврах бригадын дарга Ж.Чүлтэмсүрэн нь Төрийн тэргүүн У.Хүрэлсүх, ОБЕГ-ын дарга Г.Ариунбуян, БХ-ын сайд асан Г.Сайханбаяр гуравтай Цэргийн нэгдсэн дээд сургуулийг 1989 онд хамт төгссөн найзууд. Тэгээд болоогүй, Ж.Чүлтэмсүрэн, У.Хүрэлсүх хоёр 1989 онд Сүхбаатар аймаг дахь Ардын армийн 152-р ангид хамтдаа хуваарилагдан очиж ажиллаж байлаа. Дараа нь 1994 онд Ж.Чүлтэмсүрэн, У.Хүрэлсүх хоёр Засгийн газрын дэргэдэх Удирдлагын хөгжлийн институтийг хамт төгсөж байлаа. Хожим нь 2017 онд У.Хүрэлсүхийг Шадар сайх байх үед Ж.Чүлтэмсүрэн НОБГ-ын даргаар томилогдсон. Дараа нь 2020 онд Г.Ариунбуян ОБЕГ-ын дарга болмогцоо Ж.Чүлтэмсүрэнг ОБЕГ-ын Тэргүүн дэд даргаар томилж байв. Харин өнгөрөгч 2025 онд ОБЕГ-ын харьяа Үндэсний аврах бригадын даргаар томилсон.

ОБЕГ-ын Тэргүүн дэд дарга бөгөөд Штабын дарга Ц.Ганзориг нь Батлах хамгаалахын сайд асан Г.Сайханбаярын зээ дүү. Харин Г.Сайханбаяр нь Төрийн тэргүүн У.Хүрэлсүх, ОБЕГ-ын дарга Г.Ариунбуян хоёртой Цэргийн нэгдсэн дээд сургуулийг 1989 онд хамт төгссөн найз нь. Тиймдээ ч У.Хүрэлсүх Ерөнхий сайд байхдаа найз Г.Сайханбаярыгаа Батлан хамгаалахын сайдаар томилж байлаа.

ОБЕГ-ын дэд дарга Я.Гантөмөр нь Төрийн тэргүүн У.Хүрэлсүхийн зөвлөх асан Я.Төмөрбаатарын төрсөн дүү. Я.Төмөрбаатар нь 2008 онд У.Хүрэлсүхийг МАН-ын Ерөнхий нарийн бичгийн дарга болсон үеэс ахлах зөвлөхөөр нь ажиллаж эхэлсэн. Хожим нь У.Хүрэлсүх Ерөнхий сайд болсныхоо дараа Я.Төмөрбаатарыг Орчны бохирдол, нийгмийн асуудал хариуцсан зөвлөхөөрөө томилон ажилуулж байсан. Мөн Я.Төмөрбаатар нь У.Хүрэлсүхтэй “Харли сонирхогчдын Монголын холбоо” ТББ-ыг 2012 оноос хойш хамтран удирдсан байдаг.

ОБЕГ-ын дэргэдэх Гамшиг судлалын үндэсний хүрээлэнгийн захирлаар өнгөрсөн хоёрдугаар сард Л.Болдбаатар томилогдсон. Гамшиг судлалын үндэсний хүрээлэнгийн захирал Л.Болдбаатар нь Төрийн тэргүүн У.Хүрэлсүхийн эхнэр Л.Болорцэцэгийн төрсөн ах.

Товчхондоо, онцгой байдлын алба дээрх дөрвөн найзын л эрхшээлд орчихсон байна. Найзан дундаа налайсан энэ тогтолцоог өөрчлөхөөс нааш хэнээс нь ч хариуцлага нэхээд нэмэргүй бололтой.

ОФИЦЕРООС ОНЦГОЙН ДАРГА БОЛТЛОО, ГИТАРЧНААС ГЕНЕРАЛ БОЛТЛОО ТӨРИЙН ТЭРГҮҮНЭЭС ХОРМОЙДСОН Г.АРИУНБУЯН ХЭЗЭЭ ХАРИУЦЛАГА ХҮЛЭЭХ ВЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид