Ерөнхийлөгч Х.Баттулгын хайрт дүү Олимпын аварга Н.Түвшинбаяр Ерөнхий сайд Л.Оюун-Эрдэнийн зөвлөх болж, түүнд хүчин зүтгэхээр болсноо өчигдөр зарлалаа. Мөн хэдхэн хоногийн өмнө түүний бас нэгэн дүү, АН-ын PR-чин байсан А.Амундра МАН-д элсэж, Ерөнхий сайдад зөвлөх болсноо мэдэгдсэн. АН-ын угшилтай залуус, тэр тусмаа Х.Баттулгын дүү нар ийн Ерөнхий сайд Л.Оюун-Эрдэнийг тойрон хүрээлэх болсны цаана улс төрийн ямар нэг тохироо яваад байна уу гэх хардлага олон нийтэд төрж буй нь тодорхой. Ерөнхий Сайд Л.Оюун-Эрдэнэ МАН-ынх байтлаа Х.Баттулгын хүмүүсээр зөвлүүлэхээр болсон нь яавч жирийн бөгөөд санаандгүй сонголт биш. Арай Л.Оюун-Эрдэнэ МАН-ын хүн биш, Х.Баттулгын хүн болчихсон юм биш байгаа даа. 

Түүнчлэн Ерөнхий сайд У.Хүрэлсүхийг огцруулсан углааш, халадтай эхийн бичлэг анх “Eagle” телевизээр цацагдсаныг санаж буй байх. Ерөнхийлөгч Х.Баттулгын У.Хүрэлсүхийг унагаах төлөвлөгөө гэгддэг тус бичлэгийг цацсан “Eagle” телевизийн эзэд нь А.Амундра, “Голомт”-ийн Д.Баясгалан нар. Х.Баттулга, Д.Баясгалан нар төмөр замын “хамтрагчид”. Ингээд хөөвөл А.Амундра Ерөнхийлөгч Х.Баттулгатай нэг бус сэжмээр холбогдоно. Гэтэл тэр бас л Ерөнхий сайд Л.Оюун-Эрдэнэд зөвлөхөөр болоод буй. А.Амундра ажил, амьдралын замыг нь засаж өгсөн АН-ын ах нараасаа урвасан уу, эсвэл тэр бас л Х.Баттулгын даалгавартай яваа юу. 

Ямартай ч Ерөнхийлөгчийн сонгууль хаяанд ирчихээд байхад өөрийнх нь гол хөдөлгөгч хүч болсон хайртай дүү нараа МАН-д зүгээр л алдах тэнэг хүн Х.Баттулга биш. Тэр тусмаа цаг ямарт өөрийнх нь талд байж, нэр хүндийг нь өсгөж явдаг Н.Түвшинбаяр дүүгээ МАН-д хүчин зүтгэг гээд тавиад туучих хүн яавч биш. Тэгэхээр хөшигний ард ард түмний санаанд багтамгүй зохиолтой тохироо өрнөж буй нь тодорхой. Ямар ч тохироо байсан Х.Баттулга, Л.Оюун-Эрдэнэ хоёрт ашигтай байж таарна. Тэгэхээр тэд нэгдэж, тэднээс бусад нь бодит байдал ил болох цагийг хүлээх л үлдлээ.