-ЕРӨНХИЙ САЙДЫН АТГ-Т ӨГСӨН БАРИМТУУД НОТЛОГДВОЛ УИХ-ЫН ГИШҮҮН, ХУУЛЬ ЗҮЙ, ДОТООД ХЭРГИЙН САЙД Б.ЭНХБАЯРЫГ ЭГҮҮЛЭН ТАТАХ НӨХЦӨЛ ҮҮСНЭ-

          Бүхэл бүтэн 900 хуудастай, дөрвөн бүлэг баримт АТГ-ын комиссорын ширээн дээр очлоо, өчигдөр. Очих очихдоо Ерөнхий сайдаар ажиллаж байсан тэргүүн нь танхимынхаа сайдын талаарх баримтыг хуулийн байгууллагад өгсөн анхны тохиолдол болов. Өөрөөр хэлбэл, нэгэн цагт тэд Монголын төрийн бодлогыг хамтдаа зангидаж, танхимын бодлогоор хууль өргөн мэдүүлж, намынхаа нөхдийг тойруулж суугаад сонсголоор байцааж асан журмын нөхөд байлаа тэд.

        Нэг нь Ерөнхий сайдынхаа илд, бамбай, нөгөө нь Хууль зүйн сайдынхаа сэлэмний хуй нь явсан, түүнийгээ олны өмнө зарлан тунхаглаж явсан нь саяхан. Тэгвэл өнөөдөр тэд өстөн болтлоо дайсагнаж, өргөдөл гомдол өгч, хуулийн хаалга татах хүртлээ түнжин хагарчихаад байгаа нь энэ.

        Өөрөөр хэлбэл, Ерөнхий сайд асан Л.Оюун-Эрдэнэ өчигдөр Хууль зүй дотоод хэргийн сайд Б.Энхбаярыг шалгуулахаар ноцтой баримтууд АТГ-т өгч байгаагаа мэдэгдлээ. Түүний хэлснээр дөрвөн бүлэгт нийт 894 хуудас баримтыг багцлан өгч байгаа юм байна. Нэгдүгээрт, нүүрсний хулгайн дуулиан болсон оффтейк гэрээ буюу “Бодь групп”-тэй холбоотой нүүрсний хэргийг багцлан багтаасан юм гэнэ. Хоёрдугаар бүлэгт нүүрсний хулгайг илчлэх зорилготой зохион байгуулсан нүүрсний сонсголын баримтуудыыг багтаасан гэдгээ зарлалаа. Нүүрсний сонсголыг үнэндээ Л.Оюун-Эрдэнийн Засгийн газар эхлүүлсэн. Улмаар одоогийн Хууль зүй, дотоод хэргийн сайд, УИХ-ын гишүүн Б.Энхбаяр Нүүрсний сонсголыг удиран явуулж байлаа. Харамсалтай нь, нүүрсний сонсголын үнэн мөнөн ичлэгдэж чадаагүй гэдгийг Ерөнхий сайд асан Л.Оюун-Эрдэнэ өөрөө мэдэгдлээ. Тодруулбал, түүний өгсөн баримтын гурав, дөрөвдүгээр бүлэг нь сонсголын үнэн илчлэгдээгүй нууц буюу гол сонсголгүй сонсголыг будлиантуулсан Хууль зүй, дотоод хэргийн сайдын бүрэн баримт байгаа юм байна. Өөрөөр хэлбэл, нүүрсний сонсголын үеэр Хууль зүй дотоод хэргийн сайд Б.Энхбаяр аллбан тушаалын байдлаа урвуулан ажиглаж, их хэмжээний авилга авсан байж болзошгүй бүрэн баримт Ерөнхий сайд Л.Оюун-Эрдэнийн гарт байгаа гэх юм.

         Бүүр санаанд оромгүй том тоотой их хэмжээний мөнгөний асуудал ч сөхөгдөж байна. Энэ талаар Ерөнхий сайд асан Л.Оюун-Эрдэнэ “Есөн өдөр үргэлжилсэн сонсголоор Бодьтой холбоотой асуудлыг хоолой шахаж яриад байсан ч өнөөдрийн баримттай холбоотой ямар ч асуудлыг ярихгүй байж байгаад Бодийн оффтейк гэрээг УИХ-ын тогтоолд оруулахгүй байсаар сонсголоо дууссгасан. Сонсголын дунд Б.Энхбаяр маш их өөрчлөгдсөн. Үүнийг би "Улс төрийн шахалт байсан уу, хувийн ашиг сонирхол байна уу" гэж би тодруулсан. Гэтэл Б.Энхбаяр "Би улс төрийн шахалтад ороогүй. Гэхдээ би төрөө бодож байна, Ерөнхий сайд аа" гээд гараад явсан. Ингээд Б.Энхбаяр бид хоёрын дунд олон асуудал үүссэн. Өнөөдөр улс төрийн үйл явц, томилгоогоор учир нь тайлагдаж байна. УИХ-ын гишүүн Б.Энхбаяр Бодь интернешнл ХХК-иас хоёр хүний хамт 500 мянган ам.долларыг нэг удаа, мөн 800 мянган ам.долларыг дахин авсан. Нийт 1.3 сая ам.долларыг авсныг гэрчүүд хэлсэн. Б.Энхбаяр Бодь групптэй холбоотой байсныг би сүүлд мэдсэн” хэмээн мэдэгдээд байна. Улмаар “Хууль зүй дотоод хэргийн дэд сайд Д.Мөнх-Эрдэнээр дамжуулж, нотлох баримтуудаа усгатгах гэж оролдсон. Дэд сайд “Бодь групп”-тэй ашиг сонирхолын зөрчилтэй” гэх асуудлыг ч сөхөөд байна. Харин Хууль зүй, ддотоод хэргийн сайд Б.Энхбаяр Ерөнхий сайдыг уймарч будилсан, юу ч хамаагүй зохиож ярьдаг. Би ийм хэмжээний мөнгө аваагүй гэснээс өөрөөр ыарин тавих баримт нотолгоотой зүйл бас ярьсангүй, үнэндээ.

            Үндсэндээ улс төрийн салхи Ерөнхий сайд асан Л.Оюун-Эрдэнэ, Хууль зүй, дотоод хэргийн сайд Б.Энхбаяр нарын зүг эргэсэн нь энэ. Үеийн үед УИХ-ын гишүүд, төрийн өндөр дээд албан тушаалтнуудын авилга албан тушаалын хэрэгтэй холбоотой хавтас дүүрэн баримт хууль хяналтын байгууллагад очдог ч, хэрэг нь үнэн мөнөөр нь шийдэгдсэн нь тун ховор. Тиймдээ ч иргэд төрийн өндөр дээд албан тушаалтнуудын талаарх баримт, хуулийн байгууллагын шийдвэрт итгэх итгэл нь багассан. Баримт дэлгэж л байдаг, шалгуулж л байдаг, эцэст нь толгойг нь илээд томчууд нь дээгүүрээ гар бариад эвлэрчихвэл хэрэг замхардаг зүй тогтлыг мэддэг болсон учраас хэнд ч хэдий хэмжээний мөнгө ярьж байгаа нь сонин биш болчихлоо.

          Харин энэ удаад Засгийн газрын тэргүүнээр зургаан жил суусан Ерөнхий сайдын амнаас арай ч ор үндэсгүй худлаа үг гарахгүй байлгүй дээ гэж гэж итгэж, хүлээж сууна аа, монголын ард түмэн. Үнэндээ жил хүрэхгүйн өмнө хөрөнгө орлогоо нотлохыг шаардлагын дагуу хуулийн байгууллагад шалгуулахаар ямбаны суудлаасаа буусан хүн эрх биш мэдэх байлгүй дээ, монголын хууль хяналтын байгууллагыг.

         Өөрөөр хэлбэл, Ерөнхий сайд Л.Оюун-Эрдэнийн илчилсэн 900 баримт үнэн байгаасай. Улстөрчидийн нэгнээ онилох, айлгах, хүртлэх зэвсэг нь хууль хяналтын байгууллага, тэр тусмаа ард түмний итгэл найдвар биш байгаасай, хэмээн найдаж байна. Хэрэв зээ Ерөнхий сайд асан Л.Оюун-Эрдэнийн ярьсан бүхэн, барьсан баримт нь үнэн байвал бүхэл бүтэн улсынхаа хуулийг сахиулах үүрэг хүлээсэн Хууль зүй, дотоод хэргийн сайд Б.Энхбаярыг эгүүлэн татах, Монголын төр тогтолцооны өөрчлөлт хийх хүртлэх ноцтой асуудлууд сөхөгдөж мэдэх нь.