Н.Учрал улс төрд хонь байхаасаа л чонын бодол тээсээр ирсэн. Ардын намын аль, аль үеийн ах нар нь түүнийг хайраар дутаагаагүй ч харин тэр илүүг хүсэж, ханцуйндаа хутга нуусаар ирсэн. Одоо тэр 70-аад оныхон 80-аад оныхонтой тамираа тасартал тэмцэлдэхийг таашаалтайгаар харж, харин цаагуураа 90-ээд оныхноор хүчээ зузаатгаж, хутгаа ирлээд сууж байна. Зүйрлэвэл, М.Энхболд, У.Хүрэлсүх хоёрын зодоонд Л.Оюун-Эрдэнэ ялсан шиг.
Н.Учрал ЦХХХ-ны сайд болсноосоо эхлээд л төрд хурдхан хүчирхэгжихийг хүсэж, томилгоонд улайрсан. Багын найз Э.Хаш-Эрдэнэ нь “И-Монгол академи” УТҮГ-ын Хамтын ажиллагаа, хэрэглэгчийн газрын дарга болсон. Бас нэг багын найз Б.Дагвасүмбэрэл нь одоо “Үндэсний дата төв” УТҮГ-ын даргаар ажиллаж байна. Дараа нь Н.Учрал ЗГХЭГ-ын дарга болсон, тэгмэгц багын найз Н.Ганхуяг нь “Цемент шохой” ТӨХК-ийн Стратеги төлөвлөлт, бизнесийн хөгжлийн газрын даргаар томилогдсон. Одоо Н.Ганхуяг нь “Цемент шохой” ТӨХК-аас нэр бүхий компанид 2.1 тэрбум төгрөгийн цемент нийлүүлсэн асуудалд ороод явж буй. Бас нэг найз Д.Баярсайханыгаа “Эрдэнэс Монгол” ХХК-ийн Сөүл дэх Төлөөлөгчийн газрын тэргүүнээр томилоод илгээчихсэн. Онгоцны үйлчлэгч байсан Д.Баярсайхан одоо Солонгост Монголын уул уурхайн салбарыг бүхэлд нь төлөөлөөд сууж байгаа.
Дараа нь, Н.Учрал Тэргүүн шадар сайд бөгөөд Эдийн засаг хөгжлийн сайд болсон. Тэр үедээ Н.Учрал “Хөгжлийн банканд дахиж хэний ч шахааны хүн томилохгүй” гэх сүржин мэдэгдэл хийж байлаа. Гэтэл Н.Учралын гэр бүлийн компаниудыг удирддаг үеэл П.Энхтуяагийнх нь нөхөр Б.Баярмагнай Хөгжлийн банкны Захиргааны удирдлагын газрын захирал болоод заларчихсан. Хөөрхий, хүргэн Б.Баярмагнайгаа төрд ажиллах намтартай болгохын тулд Их засаг их сургуульдаа магистрт хүртэл сургасан байгаа юм.
Хамгийн сүүлд, хэдхэн хоногийн өмнө Н.Учралын унаган багын найз Э.Энхзориг Иргэний нисэхийн үндэсний төвийн захирлаар томилогдчихлоо. Энэ мэтээр Н.Учрал сайд болсон салбар бүрдээ багын найзуудаа “шургуулж”, хүргэнээ хүртэл хавчуулсан. Ардын намын ах нар нь харж хүлцсээр л ирсэн.
Тэгвэл өдгөө Н.Учрал улаан цагаандаа гараад МАН дотроо өөрийн намаа нууцхан, зугуухан байгуулж буй бололтой юм. Тодруулбал, Н.Учралын “Yes Mongolia” ТББ-ын Удирдах зөвлөлийн бүрэлдэхүүн нь өдрөөс өдөрт өргөжсөөр, намын дайтай болж торниод байна. Нөгөө талаас, Н.Учралын СДМЗХ-ныхон нь бүгд төрд дарга болж, бууриа засаж, байраа эзэлцгээлээ. Нэгэн цагт У.Хүрэлсүх, Г.Занданшатар, Я.Содбаатар нар ах нараа МАХН-ын буурин дээр нь үлдээгээд, МАН болоод салж байсан шиг цаг нь ирж, нөхцөл нь бүрдэхэд Н.Учрал ч өрх тусгаарлахыг үгүйсгэх аргагүй болжээ. Гэхдээ ах нарынхаа хайранд өлгийдүүлсний буянд 10 жилийн дотор МАН-ын дарга болтлоо томорсондоо хэт эрт эрдээд, хаан болох гэж улайрч байж хатуухан унах вий, Н.Учрал.
МАН ДОТОР БОЙЖИЖ БУЙ Н.УЧРАЛЫН НАМЫН ДАЙТАЙ ФРОНТ
МАН-ын дарга Н.Учралын 2015 онд үүсгэн байгуулсан “Yes Mongolia” ТББ гэж бий. Энэ ТББ-гаараа Н.Учрал өөрийгөө сурталчилж, улмаар 2016 онд анх УИХ-ын гишүүн болсон түүхтэй. Өдгөө “Yes Mongolia” ТББ нь Н.Учралын ухаан орсон цагаасаа нөхөрлөсөн унаган багын найз, “Чиний л төлөө” дууных нь клипэнд тоглосон Т.Түвшингийнх нь нэр дээр бүртгэлтэй байдаг. Харин “Yes Mongolia” ТББ-ын тэргүүнээр Н.Учралын зөвлөх, одоогийн УИХ-ын Тамгын газрын Дэд дарга Л.Дашдэмбэрэл ажилладаг. Харин Н.Учрал өөрөө “Yes Mongolia” ТББ-ынхаа Бодлогын зөвлөлийн дарга сэтэртэйгээр далдаас удирддаг. Оны өмнөхөн Н.Учрал “Yes Mongolia” ТББ-ынхаа 10 жилийн ойг нижгэр тэмдэглэсэн бол хэдхэн хоногийн өмнө Удирдах зөвлөлийн хурлаа мөн л УИХ-ын чуулганы дайтай хийжээ.
Гол нь, МАН-ынхан Н.Учралын “Yes Mongolia” ТББ-ын гишүүн болж, Удирдах зөвлөлийн бүрэлдэхүүнд нь багтчихвал төрд гэрлийн хурдаар томорчихдог юм байна. Тэд өөрсдийгөө “Yes”-чүүд гэх бөгөөд бараг л МАН доторх нам болцгоогоод удаж буй.
УИХ-ЫН ТАМГЫН ГАЗРЫН ДЭД ДАРГА Л.ДАШДЭМБЭРЭЛ- Н.Учралыг СДМЗХ-ны Ерөнхийлөгч байхад Дэд ерөнхийлөгч нь байсан. 2024 онд Н.Учралыг ЗГХЭГ-ын дарга болмогц Ахлах зөвлөх нь болсон. Дараа нь Н.Учралыг Тэргүүн шадар сайд болмогц Ажлын албаных нь дарга болсон. Харин өнгөрсөн онд УИХ-ын дарга болмогц нь УИХ-ын Тамгын газрын Дэд даргаар томилогдон ажиллаж байгаа. Намын даргынхаа хувийн ТББ-ыг сайн удирдвал УИХ-ын Тамгын газрын Дэд дарга болж томрох энүүхэнд байдаг бололтой юм.
ИРГЭНИЙ НИСЭХИЙН ЕРӨНХИЙ ГАЗРЫН ДАРГА Э.ТӨРБАЯР- Н.Учралын “Yes Mongolia” ТББ-ын Ерөнхий нарийн бичгийн даргаар ажилладаг. Өнгөрсөн онд Н.Учралын “Yes Mongolia” ТББ-ын Ерөнхий нарийн бичгийн дарга болохтойгоо зэрэгцээд л Иргэний нисэхийн ерөнхий газрын даргаар томилогджээ. Бүхэл бүтэн улсын ИНЕГ-ын даргыг хувийн ТББ-ийнхаа нарийн бичгээр томилоод сууж байна гэхээр Н.Учрал том байгаа биз.
ИРГЭНИЙ НИСЭХИЙ ҮНДЭСНИЙ ТӨВИЙН ЗАХИРАЛ Э.ЭНХЗОРИГ- Н.Учралын унаган багын найз. Өмнө нь 2021 онд Н.Учралын “Yes Mongolia” ТББ-ын Ерөнхий нарийн бичгийн даргаар ажиллаж байсан. Энэ сарын 5-нд буюу 13 хоногийн өмнө Иргэний нисэхий үндэсний төвийн захирлаар томилогдсон.
БОУАӨ-ИЙН ДЭД САЙД Б.МӨНХТАМИР- Н.Учралын “Yes Mongolia” ТББ-ын Дэд тэргүүнээр ажилладаг. Өмнө нь Б.Мөнхтамир “МИАТ” ТӨХК-ийн захирлаар ажиллаж байгаад “Цаашдын улс төрийн карьераа хөөмөөр байна” гэдэг шалтгаанаар ажлаа өгсөн. Гэтэл Б.Мөнхтамирын ярьсан улс төрийн карьер нь Н.Учралын хувийн ТББ-ын Дэд тэргүүн болж, дараа нь дэд сайд болох байжээ.
“ДАРХАНЫ ТӨМӨРЛӨГИЙН ҮЙЛДВЭР” ТӨХК-ИЙН ГҮЙЦЭТГЭХ ЗАХИРАЛ Б.ЧАГНААДОРЖ- Н.Учралын “Yes Mongolia” ТББ-ын Удирдах зөвлөлийн гишүүнээр ажилладаг.
“ДАРХАНЫ ТӨМӨРЛӨГИЙН ҮЙЛДВЭР” ТӨХК-ИЙН СТРАТЕГИ, БИЗНЕС ХӨГЖЛИЙН ГАЗРЫН ЗАХИРАЛ Б.ОРГИЛ- Н.Учрал СЗМЗХ-ны Ерөнхийлөгч байхдаа Б.Оргилыг Ерөнхий нарийн бичгийн даргаараа ажиллуулж байсан. Дараа нь 2021 онд Н.Учрал өөрийн “Yes Mongolia” ТББ-ын тэргүүнээр ажиллуулсан. Ингээд Н.Учрал ЦХХХ-ны сайд болмогцоо Б.Оргилыг Төрийн цахим үйлчилгээний зохицуулалтын газрын Үйлчилгээний нэгдсэн төвийн зохицуулалтын газрын даргаар томилсон. Улмаар Н.Учрал 2024 онд ЗГХЭГ-ын дарга болмогцоо Н.Оргилыг “Дарханы төмөрлөгийн үйлдвэр” ТӨХК-д дарга болгожээ.
ҮНДЭСНИЙ СТАТИСТИКИЙН ХОРООНЫ ДАРГА Б.БАТДАВАА- Н.Учралын “Yes Mongolia” ТББ-ын Удирдах зөвлөлийн гишүүнээр ажилладаг.
УИХ-ЫН ТАМГЫН ГАЗРЫН ТЭРГҮҮН ДЭД ДАРГА П.БАТБААТАР- “Yes Mongolia” ТББ-ын Удирдах зөвлөлийн гишүүнээр ажилладаг. Н.Учрал ЦХХХ-ны сайд байхдаа яамныхаа дэргэд Төрийн цахим үйлчилгээний зохицуулалтын газрыг байгуулж, даргаар нь П.Батбаатарыг томилж байсан. Харин УИХ-ын дарга болмогцоо УИХ-ын Тамгын газрын Тэргүүн дэд даргаар тавиад буй.
“ЭРДЭНЭС МОНГОЛ” ХХК-ИЙН СӨҮЛ ДЭХ ТӨЛӨӨЛӨГЧИЙН ГАЗРЫН ТЭРГҮҮН Д.БАЯРСАЙХАН- Н.Учралын “Yes Mongolia” ТББ-ын Бодлогын зөвлөлийн гишүүнээр ажилладаг. Өмнө 2019 онд Н.Учралын “Yes Mongolia” ТББ-ын тэргүүнээр ажиллаж байсан. Дараа нь 2020-2024 онд Н.Учралын зөвлөх, Сонгинохайрхан дүүргийн ИТХ-ын төлөөлөгчөөр ажилласан. 2024 оны УИХ-ын сонгуулийн дараа Н.Учрал ЗГХЭГ-ын дарга болмогцоо Д.Баярсайханыг “Эрдэнэс Монгол” ХХК-ийн Сөүл дэх Төлөөлөгчийн газрын тэргүүнээр томилж явуулсан.
ЕТГ-ЫН ЗАХИРГАА, САНХҮҮГИЙН ГАЗРЫН ДАРГА Б.БАТЦЭЦЭГ- Н.Учралын “Yes Mongolia” ТББ-ын Бодлогын зөвлөлийн гишүүн. Өмнө нь 2018 онд Н.Учралын “Yes Mongolia” ТББ-ын тэргүүнээр ажиллаж байсан.
“НИЙСЛЭЛИЙН ОРОН СУУЦНЫ КОРПОРАЦИ”-ИЙН ЗАХИРАЛ М.ГОВЬСАЙХАН- Н.Учралын “Yes Mongolia” ТББ-ын Бодлогын зөвлөлийн гишүүн. Өмнө нь 2021 онд Н.Учралын “Yes Mongolia” ТББ-ын Удирдах зөвлөлийн даргаар томилогдон ажиллаж байсан.
“УБТЗ”-ЫН ХӨДӨЛГӨӨНИЙ АЮУЛГҮЙ БАЙДАЛ ХАРИУЦСАН ОРЛОГЧ ДАРГА Ш.НЯМСҮРЭН- “Yes Mongolia” ТББ-ын Удирдах зөвлөлийн гишүүнээр ажилладаг.
ИНЕГ-ЫН САНХҮҮ, ХӨРӨНГӨ ОРУУЛАЛТЫН ГАЗРЫН ДАРГА Д.ХАТАНБААТАР- Н.Учралын “Yes Mongolia” ТББ-ын Удирдах зөвлөлийн гишүүнээр ажиллаж байсан. Мөн Н.Учралыг СДМЗХ-ны Ерөнхийлөгч байх үед Удирдах зөвлөлийн гишүүнээр нь ажиллаж байсан.
НИТХ-ЫН ТӨЛӨӨЛӨГЧ, Н.УЧРАЛЫН ЗӨВЛӨХ Б.ДӨЛГӨӨН- Н.Учралын “Yes Mongolia” ТББ-ын Дэд тэргүүн, Удирдах зөвлөлийн гишүүнээр ажилладаг.
НИТХ-ЫН ТӨЛӨӨЛӨГЧ, “ЗОРЧИГЧ ТЭЭВЭР-2” НӨҮГ-ЫН ЗАХИРАЛ Э.ЭНХТӨР- “Yes Mongolia” ТББ-ын Удирдах зөвлөлийн гишүүнээр ажилладаг.
НИТХ-ЫН ТӨЛӨӨЛӨГЧ, “НАЛУУ-УХАА” ЭДИЙН ЗАСГИЙН ТУСГАЙ БҮСИЙН ЗАХИРАГЧ Д.ОТГОНСҮРЭН- “Yes Mongolia” ТББ-ын Удирдах зөвлөлийн гишүүнээр ажилладаг.
СҮХБААТАР ДҮҮРГИЙН ЗАСАГ ДАРГЫН ОРЛОГЧ, ДҮҮРГИЙН МАН-ЫН ХОРООНЫ ДЭД ДАРГА, СДМЭХ-НЫ ЕРӨНХИЙ НАРИЙН БИЧГИЙН ДАРГА, Н.УЧРАЛЫН ЗӨВЛӨХ У.ӨНӨРЦЭЦЭГ- “Yes Mongolia” ТББ-ын Удирдах зөвлөлийн гишүүнээр ажилладаг.
ХАН-УУЛ ДҮҮРГИЙН ИТХ-ЫН ТӨЛӨӨЛӨГЧ, УИХ-ЫН ГИШҮҮН Ж.АЛДАРЖАВХЛАНГИЙН ЗӨВЛӨХ С.САЙНБАЯР- “Yes Mongolia” ТББ-ын Удирдах зөвлөлийн гишүүнээр ажилладаг.
ЧИНГЭЛТЭЙ ДҮҮРГИЙН ИТХ-ЫН ТӨЛӨӨЛӨГЧ Д.ЯДАМЖАВ- “Yes Mongolia” ТББ-ын Удирдах зөвлөлийн гишүүнээр ажилладаг.
“НИЙСЛЭЛИЙН ОРОН СУУЦНЫ КОРПОРАЦИ”-ИЙН ЗАХИРГААНЫ УДИРДЛАГЫН ГАЗРЫН ЗАХИРАЛ Т.АМАРТҮВШИН- “Yes Mongolia” ТББ-ын Удирдах зөвлөлийн гишүүнээр ажилладаг.
Эндээс харвал, Н.Учралын “Yes Mongolia” ТББ-ын Удирдах зөвлөлийн бүрэлдэхүүн нь МАН-ын Удирдах зөвлөлийн бүрэлдэхүүнээс ч хүчирхэг болсон нь илүүц тайлбаргүй харагдаж байгаа биз.
ТӨРД ТОРНИЖ БУЙ Н.УЧРАЛЫН ТАВИУЛУУД
Одоогийн МАН-д “Их гурвал” болчихоод буй У.Хүрэлсүх, Г.Занданшатар, Я.Содбаатар гурвын түүх Монголын ардчилсан социалист залуучуудын холбоо\МАСЗХ\-ноос эхэлсэн. Жишээ нь, У.Хүрэлсүх, Г.Занданшатар хоёр МАСЗХ-ны Ерөнхийлөгчөөр ээлжлэн ажиллаж, харин Я.Содбаатар Ерөнхий нарийн бичгийн дарга нь байлаа.
Тэгвэл Н.Учрал 2019-2024 онд буюу зургаан жил Социал демократ Монголын залуучуудын холбоо\СДМЗХ\-ны Ерөнхийлөгчөөр ажилласан. Гэтэл Н.Учралыг СДМЗХ-ны Ерөнхийлөгч байх үед Дэд ерөнхийлөгч, Ерөнхий нарийн бичгийн даргаар дэргэд нь ажиллаж асан нөхдүүд өдгөө төрийг аалзны тор мэт хэрцгээж байна. Дээрээс нь, Н.Учрал УИХ-д хөл тавьсан цагаасаа хэдэн арван зөвлөх дэргэдээ ажиллуулсан. Тэд нь өдгөө цөм дарга, дэд сайд болцгоожээ. Өөрөөр хардвал, Н.Учрал ах нарынхаа арга барилаар СДМЗХ-гоор дамжуулан хаанчлалд бэлдэж буй мэт.
“ТАВАНТОЛГОЙ ТӨМӨР ЗАМ” ТӨХК-ИЙН ГҮЙЦЭТГЭХ ЗАХИРАЛ Х.ПҮРЭВЖАРГАЛ- Н.Учралыг СДМЗХ-ны Ерөнхийлөгч байх үед Баруун бүс хариуцсан нарийн бичгийн дарга байсан. Өнгөрсөн онд Г.Занданшатарын Засгийн газар байгуулагдаж, Н.Учрал Тэргүүн шадар сайд болмогц Х.Пүрэвжаргал “Тавантолгой төмөр зам” ТӨХК-ийн гүйцэтгэх захирлаар томилогдсон.
“ЭРДЭНЭС МОНГОЛ”-ЫН ХАРЬЯА “ЭРДЭНЭС АШИД” ХХК-ИЙН ГҮЙЦЭТГЭХ ЗАХИРАЛ Э.ОЧБАЯР- Н.Учралыг СДМЗХ-ны Ерөнхийлөгч байх үед дэд ерөнхийлөгч нь байсан. Дараа нь Н.Учрал СБД-ийн МАН-ын хорооны дарга байхдаа дэд даргаарааа дэргэдээ ажиллуулж байсан. Ингээд Н.Учралыг ЗГХЭГ-ын дарга болсны дараа “Эрдэнэс ашид” ХХК-ийн гүйцэтгэх захирлаар томилогдсон.
“ЭРДЭНЭС АШИД” ХХК-ИЙН ЗАХИРГАА, ХҮНИЙ НӨӨЦИЙН МЕНЕЖЕР Х.БАЯРХҮҮ- Н.Учралын үеэл. Өмнө нь “Авто тээврийн үндэсний төв”-ийн Дэд захирлаар томилон ажиллуулж байсан. Гэвч “Нүүрсний хулгай”-н хэрэгт холбогдоод чөлөөлөгдсөн.
ҮНДЭСНИЙ БАЯЛГИЙН САНГИЙН ЗАХИРАЛ Б.ТЭМҮҮЛЭН- Н.Учралыг ЦХХХ-ны сайд болсноос хойш зөвлөхөөр нь ажилласан.
ЕРӨНХИЙ САЙД Г.ЗАНДАНШАТАРЫН ЗӨВЛӨХ Б.ГАЛСАН- Н.Учралын туслах, СДМЗХ-ны Ерөнхий нарийн бичгийн даргаар ажиллаж ирсэн.
САНГИЙН ДЭД САЙД Б.ХУЛАН- Н.Учрал ЗГХЭГ-ын дарга, Тэргүүн шадар сайд бөгөөд Эдийн засаг хөгжлийн сайд байхдаа зөвлөхөөрөө ажилуулж байсан. Улмаар Сангийн дэд сайдаар томилуулсан.
ССАЖЗ-ЫН ДЭД САЙД Г.ДАШНЯМ- Хэнтийн уугуул буюу Г.Дашням, Н.Учрал хоёр ааваараа нэг нутгийнх. Н.Учралыг СДМЗХ-ны Ерөнхийлөгч байх үед Удирдах зөвлөлийн гишүүнээр нь ажиллаж байсан. 2024 оны УИХ-ын сонгуулиар Н.Учрал Г.Дашнямыг Сүхбаатар, Чингэлтэйн тойрогт нэр дэвшүүлсэн ч унасан. Улмаар Н.Учрал Г.Дашнямыг зөвлөхөөрөө ажиллуулж байгаад ССАЖЗ-ын дэд сайдаар томилуулаад буй.
ЧИНГЭЛТЭЙ ДҮҮРГИЙН ИТХ-ЫН ДАРГА Т.УЛАМБАЯР- Увсын уугуул буюу Н.Учралтай нэг нутгийнх. 2010 онд Н.Учралын Их засаг их сургуулийг төгссөн. Дараа нь Н.Учралыг СДМЗХ-ны Ерөнхийлөгч байх үед Чингэлтэй дүүргийн СДМЗХ-ны Удирдах зөвлөлийн гишүүнээр ажиллаж байсан.
ЧИНГЭЛТЭЙ ДҮҮРГИЙН ИТХ-ЫН ТӨЛӨӨЛӨГЧ, МАН-ЫН БҮЛГИЙН ДАРГА Л.ЦЭЕЭРЭГЗЭН- Н.Учралыг СДМЗХ-ны Ерөнхийлөгч байх үед Чингэлтэй дүүргийн СДМЗХ-ны тэргүүнээр ажиллаж байсан.
ХАН-УУЛ ДҮҮРГИЙН ИТХ-ЫН ДАРГА Ч.БАТ-ОРГИЛ- Увсын уугуул буюу Н.Учралтай нэг нутгийнх. Н.Учралыг СДМЗХ-ны Ерөнхийлөгч байх үед Хан-Уул дүүргийн СДМЗХ-ны тэргүүнээр ажиллаж байсан.
НИТХ-ЫН ДАРГА А.БАЯР- Н.Учралыг СДМЗХ-ны Ерөнхийлөгч байх үед Дэд ерөнхийлөгч байсан.
МАН-ЫН НАРИЙН БИЧГИЙН ДАРГА М.ЦЭЛМҮҮН- Н.Учралыг СДМЗХ-ны Ерөнхийлөгч байх үед Дэд ерөнхийлөгч байсан. Улмаар Н.Учралыг ЗГХЭГ-ын дарга, Тэргүүн шадар сайд бөгөөд Эдийн засаг хөгжлийн сайд байх үед зөвлөхөөр нь ажилласан. Ингээд Н.Учрал МАН-ын дарга болмогцоо МАН-ын Нарийн бичгийн дарга болгосон. Тэгээд болоогүй, авга эгч Г.Байгалмаа нь Беларусь Улсад Элчин сайдаар томилогдохоор болсон.
“МОНГОЛЫН ХӨРӨНГИЙН БИРЖ”-ИЙН БИЗНЕС ХӨГЖИЛ ХАРИУЦСАН ЗАХИРАЛ Т.ХАШ-ЭРДЭНЭ- Н.Учралыг СДМЗХ-ны Ерөнхийлөгч байх үед дэд ерөнхийлөгч нь байсан. Өнгөрсөн онд Н.Учрал Т.Хаш-Эрдэнийг “Монголын хөрөнгийн бирж”-ийн гүйцэтгэх захирлаар томилж, сар гаруй ажиллуулаад чөлөөлсөн. Харин түүний оронд Н.Учралын зөвлөх Б.Дөлгөөний 10 жилийн ангийн найз томилогдсон.
НИТХ-ЫН ТӨЛӨӨЛӨГЧ, “АГРО-СИТИ” ЭДИЙН ЗАСГИЙН ТУСГАЙ БҮСИЙН ЗАХИРАГЧ Г.БАТБАЯР- Н.Учралыг СДМЗХ-ны Ерөнхийлөгч байх үед Дэд ерөнхийлөгч байсан.
МАН-ЫН УДИРДАХ ЗӨВЛӨЛИЙН ГИШҮҮН Б.ЖАВЗАНДОРЖ- Н.Учралыг СДМЗХ-ны Ерөнхийлөгч байх үед Дэд ерөнхийлөгч байсан.
НИТХ-ЫН ТӨЛӨӨЛӨГЧ, ГЭРЛЭХ ЁСЛОЛЫН ОРДНЫ ЗАХИРАЛ Ү.ОЮУНЗУЛ- Н.Учралыг СДМЗХ-ны Ерөнхийлөгч байх үед Дэд ерөнхийлөгч байсан.
ЕРӨНХИЙЛӨГЧИЙН ЗӨВЛӨХ Д.ДАВААДОРЖ- Н.Учралыг СДМЗХ-ны Ерөнхийлөгч байх үед Дэд ерөнхийлөгч байсан
ЧИНГЭЛТЭЙ ДҮҮРГИЙН ИТХ-ЫН ТӨЛӨӨЛӨГЧ, Д.ЯДАМЖАВ- Н.Учралыг СДМЗХ-ны Ерөнхийлөгч байх үед Чингэлтэй дүүргийн СДМЗХ-ны даргаар ажиллаж байсан. Өнгөрсөн онд Н.Учрал Д.Ядамжавыг “Эрдэнэс Монгол” ХХК-ийн Чанар, бүтээмж хариуцсан менежер болгосон.
УИХ-ЫН ДАРГЫН АЖЛЫН АЛБАНЫ ДАРГА Э.ТАМИР- Н.Учралыг СДМЗХ-ны Ерөнхийлөгч байх үед Ерөнхий нарийн бичгийн даргаар нь ажиллаж байсан. Өнгөрсөн онд Н.Учрал Э.Тамирыг “Эрдэнэс Монгол” ХХК-ийн Дэд бүтэц, логистикийн группийн менежер болгосон.
УИХ-ЫН ТАМГЫН ГАЗРЫН ХУУЛИЙН ГАЗРЫН ЗАХИРАЛ Х.СҮРЭНХОРОЛ- Н.Учрал ЦХХХ-ны сайд болмогцоо Хуулийн хэлтсийн даргаараа томилж дэргэдээ авсан. Дараа нь ЗГХЭГ-ын дарга болохдаа Ахлах референтээр ажиллаж байгаад Тэргүүн шадар сайд бөгөөд Эдийн засаг хөгжлийн сайд болмогцоо яамныхаа Хөгжлийн нэгдсэн бодлого, төлөвлөлтийн газрын даргаар томилж байсан. Харин УИХ-ын дарга болмогцоо УИХ-ын Тамгын газрын Хуулийн газрын захирлаар томилон ажиллуулж буй.
УИХ-ЫН ТАМГЫН ГАЗРЫН ЗАХИРГААНЫ УДИРДЛАГА, ХҮНИЙ НӨӨЦИЙН ГАЗРЫН ДАРГА П.БАТТӨР- Н.Учрал ЗГХЭГ-ын дарга болмогцоо Үндэсний хороо, төсөл хөтөлбөр хариуцсан хэлтсийн даргаараа томилж байсан. Дараа нь Н.Учрал Тэргүүн шадар сайд бөгөөд Эдийн засаг хөгжлийн сайд болмогцоо яамныхаа Төрийн захиргааны удирдлагын газрын даргаар томилсон. Харин УИХ-ын дарга болмогцоо УИХ-ын Тамгын газрын Захиргааны удирдлага, хүний нөөцийн газрын даргаар томилоод буй.
Энэ мэтээр түүний баг цааш хөвөрнө. Нэг талаар тойрон хүрээлэгчдэдээ ээлтэй, хэнийг нь ч ялгалгүй гарыг нь ганзаганд, хөлийг нь дөрөөнд хүргээд байгаа мэт боловч цаагуураа тэр өөрийн багийг удирдаж буй намаасаа дутахааргүй болтол бүрдүүлж, албан тушаалын хүч өгч амжжээ гэсэн үг. Нэг үгээр, ах нар нь түүнийг гомдоовол явахад, ах нараасаа өөрөө урвабал ганцаардахааргүй бэлэн болсны илрэл ч байж мэднэ.
| УВАЙГҮЙ УРВАЛТ, УЛАЙРСАН ТОМИЛГОО, УЛАЙССАН ШУНАЛААСАА БОЛЖ УНАХ ВИЙ, Н.УЧРАЛ |
|
.PNG)
.PNG)
.PNG)
.PNG)
.PNG)
Усны Компакт: Монголд анхны томоохон Ус гүн цэвэршүүлэх үйлдвэрийг албан ёсоор нээлээ
Хил орчмын дэглэмийн зөрчил илрүүлжээ
Ногоон зээлийн хүртээмжийг 3.4 дахин нэмэгдүүлснээр эргэн төлөлтийн ачааллыг 40 хувиар бууруулна
Боксын өсвөр үеийн Азийн аваргаас 1 мөнгө, 5 хүрэл медаль хүртэв
Өсвөрийн тулаанчид "ТАШКЕНТ 2026" Азийн аваргыг зорилоо
ТАЙЖИЙН ХҮҮГИЙН ӨМНӨӨС СУРГУУЛЬД СУРЧ, ӨРНӨДИЙГ ЗОРЬСОН “ГЕРМАН” Б.СОДНОМ
"УУЛЫН Б.ТӨМӨР"-ИЙН ДҮҮ Д.ОЮУНГЭРЭЛ: АХЫН ХӨВСГӨЛИЙН ТАЙГАД 10 ЖИЛ БҮГСЭН НЬ ЦЭРГЭЭС ХАЛАГДААД БУЦАХДАА НАЙЗТАЙГАА АЙЛЫН АРГАМЖААТАЙ МОРЬ УНАЖ, ЗУГТААД ТУВА РУУ ГАРЧИХСАНААС ЭХЛЭЛТЭЙ
ЕРӨНХИЙЛӨГЧ АСАН Х.БАТТУЛГЫН ХҮҮ ХҮЛЭГТИЙН ГЭРИЙН ТАГТНААС УНАЖ, АМИА АЛДСАН ЖҮЖИГЧИН Б.БААТАРХҮҮГИЙН ХҮҮ ХҮСЛЭНГИЙН ХЭРГИЙН ТАНИЛЦУУЛГА
"БИ НИСЭХ ДУРТАЙ" КИНОНЫ МӨНГӨН ЭМЧИД ДУРГҮЙ Ч "СҮҮДЭР"-ИЙН ДУГАРЫГ ХАЙРЛАДАГ БИЛЭЭ, БИД
Л.ОЮУН-ЭРДЭНИЙН АЛСЫН ХАРАА АНУ-Д ОРОГНОХ ЮМ БИШ БИЗ
САХАЛ Ж.БАТ-ЭРДЭНИЙН СААР БАРИМТУУД
Ерөнхий сайд МҮОХ-ын төлөөлөгчдийг хүлээн авч уулзлаа
БТС-ын Төрийн захиргааны байгууллагын удирдах ажилтны уулзалт болов
“Лос-Анжелес-2028” олимпын наадмын боксын эрх олгох системийг баталлаа
Амралтын өдрүүдээр Төв аймгийн зарим байршилд цахилгаан хязгаарлана
Эмэгтэй гишүүдийн санаачилгаар УИХ-д Хүүхэд, гэр бүлийн хөгжлийг дэмжих бүлгийг байгууллаа
Өнөр хорооллын гудамжны авто замыг 23:00 цагаас хаана
УИХ-ын чуулганы нэгдсэн хуралдаанаар хэлэлцэх асуудлууд
Даваа гарагт зарим байршилд халуун ус тасарна
Оросын Өвөрбайгалийн хязгаар хүнсний талонд шилжиж эхэллээ
Элчин сайд Н.Энхтайван Унгарт ажиллаж буй компанийн төлөөлөлтэй уулзав
Д.ТРАМП ШИ ЖИНЬПИН НАРЫН УУЛЗАЛТЫН ЭРГЭН ТОЙРОНД
“Соёмбо” клубийн Т.Кайсар боксын Азийн аваргаас хүрэл медаль хүртлээ
Олимпын боловсролын комиссын хурал боллоо
“МИНИЙ ДЭЛГҮҮР”-ИЙН АЖИЛТАН “ДЭЛГҮҮРЭЭС ХУЛГАЙ ХИЙЛЭЭ” ГЭХ ШАЛТГААНААР БУСДЫГ ӨШИГЛӨЖ, АМИНД НЬ ХҮРЧЭЭ
УНШИГЧДАД ХҮЛЭЭЛТ ҮҮСГЭЭД БУЙ ШИНЭ БҮТЭЭЛҮҮД
Ч.ХҮРЭЛБААТАРЫГ 25 ЖИЛ ХОРМОЙДОЖ ЯВАА Б.ЗАЯАБАЛ
“УНАА ХОЛТОЙ, УСАН БИЕТЭЙ” УЛСЫН ЗААН З.ДҮВЧИН
Ш.БЯМБА-ЭРДЭНЭЦЭЦЭГ: “ПҮҮЖЭЭ” БАРИМТАТ КИНОГ СЭТГЭЛ ШИМШРЭЭД ҮЗЭЖ ЧАДДАГГҮЙ, ААВ, ЭЭЖ, ЭГЧ, ДҮҮГЭЭ САНААД ХЭЦҮҮ БАЙДАГ ЮМ
