-Хүнээ боддог дарга л хөгжлийг түүчээлдэг дээ-

            Ерөнхий сайд Л.Оюун-Эрдэнээр ахлуулсан шинэ Засгийн газар байгуулагдаж, таамгаас тэс өөр хүмүүс сайд болоод хэдхэн хонож байна. Харин төрийн албан хаагчид салбарын шинэхэн сайд маань халаа сэлгээ хэрхэн хийх бол гэдэгт чих тавьж, дотроо битүүхэн айдастай ажлын өдрүүдийг үдэж буй. Шинэ дарга ирэхдээ өөрийн хүмүүсээ дээш татаж, багаа бүрдүүлэх нэрийдлээр өмнөх ажилтнуудаа халдаг нь Монголд гэм биш зан болчихсон гэхэд хилсдэхгүй.

            Угтаа улс орны урт, удаан хугацаанд оршин тогтнох үндэс нь төрийн залгамж халаа, үндэсний тууштай бодлого, чадвартай боловсон хүчин. Харамсалтай нь манайд дарга солигдоход жолооч, цэвэрлэгч, жижүүрээс эхлээд албан хаагчид, төрийн бодлого хүртэл солигдож орхидог гэмтэй. Ажлаа мэддэг, салбартаа багагүй хугацаанд ажилласан хүнийг өмнөх даргын хүн гэдэг ганцхан шалтгаанаар халж, оронд нь ажлаа мэдэх байтугай төрийн албанд ажиллаж ч үзээгүй нэгнийг тавих нь бий. Урдах ажлаа мэдэхгүй хүнтэй улсын бодлого ярих бүр ч хэрэггүй. Энэ нь улсын хөгжлийн тогтвортой байдал, бодлогод нөлөөлж, хүнээр төсөөлбөл хөлийг нь тушиж орхисноос ялгаагүй үйлдэл. Хөлгүй хүн хаа хол яваа аж.

            Гаднын орнуудад бол дарга, сайд, ерөнхийлөгч, өөр хэн ч өөрчлөгдсөн төрийн албан хаагчдаараа оролддоггүй, төрийн бодлогыг олон жилээр төлөвлөчихсөн байдаг тул тэнд хөндлөнгөөс оролцох эрхгүй, оролцлоо ч түүнийг олон нийтийн санал асуулгаар шийддэг жишиг бий. Жишээлбэл, дэлхийн тэргүүлэгч улс болохын төлөө зорьж буй БНХАУ алсын хараагаа 300 жилээр тодорхойлж, таван жил тутамд өсөлтийн стратеги төлөвлөгөөгөө сэргээж, эдийн засаг болон түүний үр нөлөөгөөр үндэсний бодлогоо барьдаг. Өөрөөр хэлбэл, аль ч салбарт ямар ч хүн очсон барих бодлого нь нэг гэсэн үг.  Тэгвэл бидний иш татах дуртай АНУ зуун жилээр төрийн бодлогоо тодорхойлдог. АНУ XXI зууны үндэсний бодлогоо эдийн засгийн өсөлтөө тэргүүнд барьж, тогтвортой хөгжлийн бодлогыг баримтлан дэлхийн нийтээр өөрчлөгдөж буй тоглоомын дүрмийн шинэчлэгч байх, хүний эрх, эрх чөлөөг хангах, удирдагчийн тэргүүлэгч байр сууриа ахин тогтоох, хөгжлийн боломжийг нэмэгдүүлэх, орчин үеийн тогтолцоог цогцлоох гэж тавьжээ. Гэтэл эсрэгээрээ байгалийн баялаг ихтэй Нигерь, Өмнөд Африкийн зарим улс төрийн залгамж халаагаа алдаж, төрийн бодлогын тасралтгүй байдлаа хангаж чадаагүйгээс үүдэн баялгийн хараалд өртсөн.  Манай улсын хувьд хазгай гишгэх төдийд л дээрх улсуудын түүхийг давтах эрсдэлтэй.

            Тиймээс салбарын бус хүн сайд болдог юм гэхэд наад зах нь ажлаа мэддэг, үүргээ ухамсарладаг, улс орны хөгжилд хувь нэмэр оруулах чадвартай албан тушаалтнуудаар оролддоггүй баймаар байна. Өөрийн хүнээр биш, ажлаа мэддэг хүнээр хүрээлүүлж чадвал аль ч салбарын ажил урагшлах нь тодорхой. Бидэнд халаа, сэлгээ биш, тогтвортой бодлого, төрийн залгамж халаа, туршлагатай, чадвартай боловсон хүчин чухал. Хүнээ боддог дарга л хөгжлийг түүчээлдэг дээ.