-Л.ОЮУН-ЭРДЭНЭ, У.ХҮРЭЛСҮХ ХОЁРЫН ДЭНДҮҮ ЯАРЧ БАЙГААГИЙН ИЛРЭЛ НЬ ТӨР ТҮШИХ САЙД НАР НЬ ШӨНӨ ДӨЛӨӨР ТАМГАА АВСАН ЯВДАЛ БАЙЛАА-

           “Мордохын хазгай” гэгч нь болох вий дээ. Коронавирустэй “дайтаж” байсан Засгийн газраа У.Хүрэлсүх хэдхэн цагийн дотор, яаран сандран “унагаж” орхиод, Л.Оюун-Эрдэнэд цулбуураа атгуулсан. Өнөөх нь ч танхимын сайд нараа яаран томилж, тангараг өргүүлээд зогсохгүй хар шөнөөр тамгануудыг “түүлгэсэн”. Түүлгэсэн гэдэг нь шинэ сайд нар нь өмнөх сайд нараасаа тамгыг нь авах гээд 00:00 цаг аль хэдийнэ өнгөрсөн байхад яамд дээрээ, хадагныхаа буруу зөвийг ч ялгах сөхөөгүй ядарсан, яарсан амьтад очицгоосныг хэлж буй хэрэг.

         “Өдөр алдаж шөнө” гэгчээр ард иргэдийг дуг нойрондоо дугжирч байх цагаар ийн яаран сандран тамгаа авах ямар ёс, ямар шаардлага тэдэнд байсан юм бол. Гэрэл гэгээтэй өглөө, ажлын цагаар нэр төртэй, ёс жудагтайгаар тамгаа гардаад зогссон бол авч байгаад нь ч, өгч байгаад нь ч бүтэн сайхан байх байсан биз ээ. Гэтэл хэн нэг хулгайч, дээрэмчнээс юмаа булааж авч байгаа аятай үйл явдал өнгөрсөн баасангаас бямба гарагт шилжих шөнө Монголын яамдад болж өнгөрлөө. Сайдын суудалд суугаад л “босож” буй зарим нь тамгаа өгч байгаагаа ч мэдэх сөхөөгүй согтуу байсан сурагтай. Өмнөх сайд нар нь “болдоггүй”, тамгаа өөрт ашигтайгаар ашиглаад салдаггүй байсан бол тэгж авах нь зөв. Гэвч тэд бүгд нэг намын “томилгооныхон”. Хэзээ л бол хэзээ жагсаалдаа зогсох МАН-ын “цэргүүд”. Гэтэл хар шөнөөр төрийн тамга, тэмдгээ өгөлцөж, авалцсан нь сайн хэрэг ер биш. Ёр билгээ бодсон ч монгол хүн харуй бүрий, шөнийн цагаар өгч, авах нь битгий хэл хогоо ч гаргаж хаядаггүй заншилтай билээ. Муугийн биш, Монголын ёсонд морин цагт сайн сайхан үйл бүхнээ багтаахыг хичээдэг бичигдээгүй уламжлал хэдэн зууны турш төрт ёсонд оршсоор ирснийг онцлоё. 

Үүний цаана У.Хүрэлсүхэд толгойлж байсан Засгийн газраа яаран сандран тараах, Л.Оюун-Эрдэнэд шинэ засгаа бүр үтэр түргэн байгуулах ямар нэг яаруу шаардлага, даалгавар байгаа бололтой гэх хардлага олон нийтэд байна. Гэхдээ үүнийг коронавирустэй шинэ арга, тактикаар тэмцэхийн төлөөх тэвдэлт гэж андуурч болохгүй. Рио Тинтотой Оюу толгойн гэрээг цуцлахын төлөөх адгалт ч гэж ойлгож болохгүй. Бүр улс орноо хөгжүүлэхийн төлөө шөнөд оройгүй болтлоо шатаж яваа эх орончид гэж бодох ч эндүүрэл.

           Ердөө л хуулийн хугацаанд ирэх Ерөнхийлөгчийн сонгуульд нэр дэвшигчээ “асуудал”-аас сугалах, замыг нь цэвэрлэх сонгуулийн бэлтгэл гэдэг нь өрнөж буй үйл явдлаас тодорхой харагдана. Үүний төлөө тэд Монгол төрийн ёс жаяг, залгамж халаа, дэг ёсыг умартан дураараа дургиж байгаа нь энэ гэхэд хилсдэхгүй биз ээ. Өөрөөр хэлбэл, ирэх зургадугаар сарын 9-нд Л.Оюун-Эрдэнэ У.Хүрэлсүх “ах”-ыгаа Ерөнхийлөгч болгохын төлөөх хамгийн том сонгуулийн “штаб”-аа ийнхүү яаран сандран “байгууллаа”. Үгүй сэн бол, тэр болон тэд Монгол төрийн дэг ёс, дүрэм журам, төрийн сайдын нэр хүнд, залгамж, халааг ингэж уландаа гишгэж, үнэгүйдүүлэхгүй байсан билээ. Монголын хамгийн ууган намын залгамжлагчид, шинэ цагийн улстөрчид гэхэд тэд энэ удаад дэндүү жудаггүй, дэндүү тэвдүү байлаа даа, Мордохын хазгай болох вий дээ.

 Хар шөнөөр төрийн тамга, тэмдгээ өгөлцөж, авалцсан нь сайн хэрэг ер биш. Ёр билгээ бодсон ч монгол хүн харуй бүрий, шөнийн цагаар өгч, авах нь битгий хэл хогоо ч гаргаж хаядаггүй заншилтай билээ