Нийслэл хотын автозамын түгжрэлийг бууруулахын тулд олон арга хэмжээг авч буй. Гэвч одоогоор үр дүнд хүрсэн нэг ч ажил алга гэхэд хилсдэхгүй. "Нохой нь сүүлээ сүүл нь хонгорцогоо" гэгчээр эцсийн эцэст буруутан нь иргэд болоод дуусдаг. Үе үеийн хотын дарга нар “Метро, дүүжин тээвэртэй болно” гэж иргэдийн чихэн дээр цэцэг шиг үг шивнэчихээд дараа нь төрийн төмөр нүүрээ харуулаад нүүр улайхгүй суучихдаг нь эмгэнэлтэй. Хэрэв үе үеийн хотын дарга нар ажлаа хийсэн бол Монгол Улс аль хэдийнэ метро, дүүжин тээвэртэй болчих байлаа. Харамсалтай нь, нийслэл хот маань хэлснээ хийдэг биш, Үндсэн хуулиа зөрчдөг хотын дарга нартай л болох юм даа.

Харамсалтай нь нийслэл хот маань хэлснээ хийдэг биш, Үндсэн хуулиа зөрчдөг Хотын дарга нартай л болох юм даа.

Монгол Улс бол ардчилсан орон. Хүний эрхийг нэгт тавих ёстой улс. Гэтэл орон нутгийн дугаартай автомашин нийслэл хотын хөдөлгөөнд оролцоход 5000 мянга, шинээр автмашин худалдан авч байгаа тохиолдолд улсын дугаар олгохгүй гэх мэт шийдвэрүүд нь нэг талаасаа хүнийг зөрчсөн үйлдэл юм. Ардчилсан улсын иргэд хэнээр юу ч заалгахгүй худалдан авалт хийх эрх бий. Тэр эрхийг нь төр засаг хангаж өгөх ёстой. Гэтэл эсрэгээр боломж бүрийг нь хумиж, иргэдийнхээ хөл гарыг мухарлаж байна. Хотын дарга Х.Нямбаатар 2024 оны арваннэгдүгээр сарын 08-ны өдрөөс эхлэн импортоор оруулж ирсэн автомашинд Улаанбаатар хотын дугаар олгохгүй байх шийдвэрийг гаргасан. Албаны хүмүүс энэхүү шийдвэрээ Улаанбаатар хотын түгжрэл, агаарын бохирдол, зам тээврийн ослын тоог бууруулах зорилготой хэмээн тайлбарлаж буй.

Нийслэлийн иргэд хотод амьдарсныхаа төлөө татвар төлж буй. Нэмээд өмчлөх, зорчих эрхээ хязгаарлуулж, хаалгаж, боолгож яагаад амьдрах ёстой юм бэ

Улсын дугаар олгохоо болилоо гээд нийслэлийн түгжрэл буурахгүй болов уу. Иргэдийн хувьд орон нутгийн дугаар авах сонирхол байгаа ч НИТХ-наас түгжрэлийг сааруулах зорилгоор Улаанбаатар хотод орж ирж буй орон нутгийн дугаартай автомашинаас хоногийн 5000 төгрөг авах тогтоолыг баталсан. Ингэснээр орон нутгийн дугаартай тээврийн хэрэгсэл Улаанбаатар хотод 48 цагаас дээш хугацаагаар зорчих тохиолдолд хоногийн 5000 төгрөгийн төлбөр төлөх шаардлага тулгарах болсон. Тиймээс орон нутгийн дугаар авах нь эргээд санхүүгийн дарамттай тулгарч юм. Энэ нь иргэдийн зорчих хөдөлгөөнийг хязгаарлаж, орон нутаг ба ниийслэл гэсэн ялгавар үзлийг бий болгож байна. Хүний эрх талаас нь аваад үзвэл энэ нь хувь хүний болон иргэдийн худалдах, худалдан авах чөлөөт зах зээлийн эрх чөлөөг зөрчиж, байгаагаас гадна энэ салбарт өнөөдрийг хүртэл бий болсон мянга мянган айлын орлого, эдийн засаг, ажлын байр, амьжиргаанд шууд нөлөөлж байгаа нь мэдээж хэрэг. Жолооны зөв, буруу рулетээ машиныг хориглоно, хуучин автомашины импортыг зогсооно гэсэн үгнүүдийг сүүлийн хэдэн жил дарга нар үе үе тархи, чих рүү хүчээр хийх болсон. Одоо болохоор улсын дугаарыг квот руу шилжүүлэх асуудал яригдаж эхэллээ. Дугаарын хязгаарлалтаар хэсэг аргацаасан, урсгал өөрчилж хэсэг стрессдүүлсэн, одоо машины хүрд, номер хоёртой ноцолдож хэр хугацаа өнгөрөөх юм. Нийслэлийн иргэд хотод амьдарсныхаа төлөө татвар төлж буй. Нэмээд өмчлөх, зорчих эрхээ хязгаарлуулж, хаалгаж, боолгож яагаад амьдрах ёстой юм бэ. Үнэхээр автомашины улсын дугаар олгохоо болиод түгжрэл буурч байвал иргэд дэмжих нь гарцаагүй. Гэвч энэ шийдвэр түгжрэл бууруулахаас илүүтэй олон хүний амь амьжиргааг таслах вий. “Метро барина” гэж ханхалзаж, данхалзаж, Хотын даргын суудалд суугаад яагаад эцэст нь автомашины дугаар хязгаарлалт, улсын дугаарын хориг тавиад дуусдаг юм бэ.