Өмнөх парламентад Н.Сарангэрэл сайд “Ул”-ныхан гэж хэлснийхээ төлөө улс төрийн хариуцлага хүлээж, томилогдоод сар ч болоогүй албан тушаалаасаа огцорч, сайдын суудлаа хүлээлгэж өгсөн. Түүнчлэн Н.Уртнасан сайд “Утаа гаргаж байгаа айл өрхүүдийг дроноор илрүүлнэ” гэж хэлснээрээ буруудаж мөн л хугацаанаасаа өмнө огцорч, сайдын суудлаа орхиж байв. Тэдэнтэй яг ижил шалтгаанаар буюу олон нийтэд Обуна нэрээрээ танигдсан Цахим хөгжил, харилцаа холбооны дэд сайд Б.Болор-Эрдэнэ “Орост боловсрол эзэмшсэн, хоцрогдсон ахмад, дунд шатныхан төрийн ажлыг хурдтай явуулахад саад болсон. Энэ нь Ерөнхий сайд, Засгийн газрыг ажил хийхэд саад тотгор учруулсан” хэмээн хэлснийхээ төлөө мөн л хариуцлага хүлээж, албан тушаалаасаа огцорсон.

        МАН-ынхан алдаатай үгнийхээ хариуцлагыг хүлээж, алба тушаалаасаа огцордог улс төрийн шинэ соёлыг эхлүүлж байгаагаа мэдэгдэж байлаа. Уг нь бол эрх баригч намынхан улс төрийн энэ соёлоо хэрэгжүүлсэн бол хэлсэн үгэндээ бус хийсэн үйлдэлдээ ч хариуцлага хүлээж сайд суудал, гишүүний эрхээсээ түдгэлзэх  болзлоо Соёл, спорт, залуучуудын сайд Ч.Номин хэдийнээ хангах байлаа.

        Угтаа бол улсын төсвөөр тансаглаж, төсөвт үр ашиггүй урсгал зардал олныг суулгасных нь төлөө түүнд улс төрийн хариуцлага хүлээлгэж сайдын суудлаасаа нь огцоруулах ёстой байтал Засгийн газар улаан цээжээрээ хамгаалж, хамгийн үр ашиггүй, үрэлгэн зардыг нь ч дэмжиж байна. Уг нь бол хэлсэн үгнийхээ төлөө хариуцлага хүлээдэг дээрх жишээгээр улс төрийн хариуцлага хүлээдэг бол Ч.Номин сайд аль хэзээний албан тушаалгүй болсон байх байлаа.

        Төрийн сүлдэнд тангараг өргөхдөө “дөрвөн хөллөж” төрийн албанд нэг ч өдөр ажиллаж байсан туршлагагүйгээ баталсан Ч.Номинг Ерөнхий сайд Л.Оюун-Эрдэнэ Засгийн газартаа багтааснаасаа хойш хир халдаахгүй улс төрд өргөж, байдгаа барьсан гэхэд хилсдэхгүй.

      Өөрөөр хэлбэл, өнгөрсөн дөрвөн жилийн хугацаанд Л.Оюун-Эрдэнийн чихнээс хамгийн их хонх уясан сайд нь Ч.Номин байлаа. Гэвч Л.Оюун-Эрдэнийн Засгийн газарт халаа сэлгээ олон удаа хийгдсэн ч сайдын суудлаас буугаагүй тогтож үлдсэн цөөн хэдэн хүний нэг нь Ч.Номин болж таарав. Түүгээр ч зогсохгүй Сонгинохайрханы тойргийг УИХ-ын гишүүн асан П.Анужингаас Ч.Номинд “зээлдүүлж”, парламентад сонгогдох замыг нь засаж өгсөн удаатай.

     Цаашлаад УИХ-ын гишүүн болмогц нь дахин “давхар дээл”-тэй сайдаар Засгийн газартаа “залж” төрийн уулзалт, цуглааныг түүний хамаарал бүхий зочид буудалд тасралтгүй явуулах уламжлал тогтоож байгаа нь ч нууц биш юм.   Тиймдээ ч улс төрд түүнтэй холбоотой дуулиан шуугиан дэгдсэн ч нүдээ аниж, чихээ бөглөөд чимээгүй болчихдог болоод удаж байна. Энэ удаад ч түүнтэй холбоотой дуулианыг  дарах дараагийн технологи хэрэгжиж эхэлсэн гэдэг яриа ч олны дунд гарчээ.

         Уг нь Соёлын сайд Ч.Номин УИХ-ын сонгуульд нэр дэвшихдээ л улс төрийн карьеараа дуусгах болзлоо хангачихсан байв. Тодруулбал, УИХ-ын сонгуулийн сурталчилгаа эхэлэхээс өмнө Засгийн газрын гишүүний тайланг сэтгүүлийн хувьдаа хэвлүүлж, тараасан удаатай. Түүний дараахан УИХ-ын гишүүн болмогцоо мөн л Тэрэлж зочид буудалдаа төрийн албаны хүлээн авалт зохион байгуулсан гэх дуулиан дэгдэж байлаа. Ингэхдээ уг арга хэмжээг “Өөрийн хөрөнгөөрөө зохион байгуулсан” хэмээн хэвлэлийнхэнд яриа өгч зогссон.

       Татвар төлөгчдийн 50 сая төгрөгөөр УИХ-ын гишүүд ганцхан өдрийн дотор тансаглаж, түүнийг нь Соёл, спорт, залуучуудын сайд Ч.Номингийн хамаарал бүхий “Тэрэлжсүйх” зочид буудлын орлого болгосон гэх мэдээлэл намжиж амжаагүй байхтай зэрэгцээд төсвийн хөрөнгөөр төрийн айлчлал хийж, хамгийн их тансагласан түшээдээр мөн л УИХ-ын гишүүн, Соёл спорт, залуучуудын сайд Ч.Номин тодорсон. Угтаабол түүний өнгөрснө хугацаанд томилолтын зардалд зарцуулсан төлбар н 344 тэрбум төгрөг болж таарсан. Гэтэл татвар төлөгчдийн мөнгөөр тансагласан энэ үйлдэлдээ гэмших нь битгий хэл харин ч өөрийгөө өмөөрч “20 хүрэхгүй удаа л томилолтоор явсан шүү” хэмээн олны дургүйцлийг хүргэсэн удаатай.

          Түүгээрч зогсохгүй Соёлын сайдаар томилогдоод удаагүй байхдаа УИХ-ын гишүүдэд “Шинэ ургацын монгол төмс. Соёлын сайд Ч.Номингоос гэх шошготой төсм хүртэл УИХ-ын гишүүдэд тарааж байсан. Хэлсэн үг, хийсэн үйлдлийнхээ хариуд хариуцлага хүлээдэг улс төрийн соёл хэрэгжсэн бол төмс тарааж эхэлсэн тэр үеэс л Соёлын сайд Ч.Номин суудлаасаа буух байлаа.

Харин өдгөө 18.3 тэрбум төгрөгөөр хүүхдүүдэд кмно, жүжиг үзүүлэх ваучер олгож, гадаад томилолтын зардлаараа тэргүүлж байгаа хэдий ч “давхар дээл”-тэй,мандуулдаг хатагтай хэвээр сууна.

         “Ул”-ныхан гэж хэлсний төлөө эгүүлэн татаж байсан ууртай шийдвэр улсын төсвөөр тансаглаж суугаа ч.номин сайдад үйлчлэхгүй юм уу, МАН-ынхаан.