Боловсролын сайд нь багш мэргэжилгүй Дондог, Дуламаа, Дорж нарыг 45 хоногт сургаж, багшлах эрх болгох журам батлуулж, нийтэд танилцуулаад удаагүй байна. 45 хоног сургалтад суугаад багш мэргэжил эзэмшиж, алдрай бяцхан хүүхдүүдийг эрдмийн эх далайд хөтөлж чадах болов уу, тун эргэлзээтэй. Эх нь хээр алаг бол хүү нь шийр алаг гэдэг шиг багш нь сургасан юмгүй, шавь нь сурсан зүйлгүй байх вий, ирээдүйд. Ядаж явахад яр гэдэг шиг боловсролын салбарт олон жил асуудал дагуулж буй сурах бичигт салбарын сайд нь ч анхаарал хандуулсангүй. Ерөнхий боловсролын сургуулийн сурах бичгийн алдааны талаар салбартаа олон жил ажилласан доктор, профессорууд шүүмжилж ирсэн. Гэвч энэ тал дээр анхаардаг байгууллага одоогоор Монгол Улсад байхгүй бололтой. Тухайлбал,  Ерөнхий боловсролын сургуулийн 12 дугаар ангийн сурах бичигт “Хадам ээжтэйгээ харилцах 15 дүрэм” гэх дасгал ажил багтсан талаарх мэдээлэл өнгөрсөн жил гарч, өдгөө ч олны шүүмжлэлийг дагуулсаар буй. Тодруулбал, тус дасгал  “Иргэний ёс зүйн боловсрол” хичээлийн сурах бичигт хэвлэгдсэн бөгөөд "Гоолингоо.мн" сайтаас шууд хуулбарлан тавьсан байсан юм. Тэгвэл сурах бичгийн агуулгыг хэн баталж, хэрхэн хяналт тавьдаг талаар Боловсролын яам, Боловсролын ерөнхий газар, Боловсролын судалгааны үндэсний хүрээлэнгээс тодруулахад тодорхой хариулт өгөхгүйгээр нэг нь нөгөө рүү "чихсэн" эмгэнэлтэй дүр зураг л биднийг угтаж байна. Нэг үгээр бол “Буух эзэн, буцах хаяггүй” хоцорчээ.

Эх нь хээр алаг бол хүү нь шийр алаг гэдэг шиг багш нь сургасан юмгүй, шавь нь сурсан зүйлгүй байх вий, ирээдүйд

        Хүүхэд, залуусыг боловсролгүйгээр төсөөлөхийн аргагүй. Амьдралын баталгаа бол боловсрол, түүгээр дамжуулж олж авсан мэдлэг, чадвар тэднийг ирээдүйд хөтлөх зам. Тиймээс сурагчийн сурах бичиг алдаагүй байх нь хамгийн чухал. Гэтэл сурах бичигт орж буй дасгал ажлуудыг ямар ч шалгуургүйгээр цахим сайтаас хуулбарлан тавьж байгаа нь ирээдүйгээ хорлож байгаа хэрэг биш гэж үү. Үүнээс гадна 2014 онд нэгдүгээр ангийн “Иргэний боловсрол” хичээлийн ном үг, үсэг, хэл найруулга, агуулга нь авах юмгүй байсныг 2016 онд шүүхээр шийдвэрлэсэн байдаг. Тухайлбал, тухайн сурах бичгийг цаашид ашиглах боломжгүй, шинээр зохио гэсэн дүгнэлт гаргаж байжээ. Хамгийн эмгэнэлтэй нь иргэний боловсролын номыг сургалтад ашиглахаас өмнө буюу 2013 онд сургуулиудад туршаад, дараа оныхоо долдугаар сард нэгдүгээр ангийн сурагчдын тоогоор хэвлүүлжээ. 2014-2015, 2015-2016, 2016-2017 оны хичээлийн жилд 180 мянга орчмыг хувилсан гэсэн үг.

2014 онд явуулсан хүсэлтэд ямар ч хариу ирэлгүй 2015-2016 оны хичээлийн жилд алдаатай хэвээр хэвлэгджээ

          Үүнээс гадна, сурах бичгийг хэвлэдэг “Адмон” компани “Иргэний боловсрол” сурах бичигт байгаа алдаа мадгуудыг нягтлаад “Нийт 288 хуудсанд алдаа байгаа тул засварлаж өгнө үү” гэсэн хүсэлтийг БСШУЯ-нд хүргүүлсэн байна. Харамсалтай нь, 2014 онд явуулсан хүсэлтэд ямар ч хариу ирэлгүй 2015-2016 оны хичээлийн жилд алдаатай хэвээр хэвлэгджээ. Энэ мэт сурах бичигтэй холбоотой алдаануудыг дурдаад байвал дуусахгүй. 2023 оны Ерөнхий боловсролын сургуулийн 12 дугаар ангийн сурах бичигт “Хадам ээжтэйгээ харилцах 15 дүрэм” гэх дасгал ажил багтсан талаар дээр дурдсан билээ. Үүнтэй холбоотойгоор тус номонд агуулгын шинэчлэл хийгдсэн эсэх талаар Боловсролын яамнаас тодруулахад дараах хариултыг өгсөн юм. Боловсролын яамны холбогдох албан тушаалтан “12 дугаар ангийн “Иргэний ёс зүйн боловсрол” сурах бичигт багтсан “Хадам ээжтэйгээ харилцах 15 дүрэм” гэх дасгал ажилтай номыг энэ жил ч хүүхдүүд ашиглаж байгаа. Учир нь сурах бичгийн  агуулгад ямар нэг шинэчлэл хийгдээгүй. Өмнө нь баталсан MNS:2008 стандартаар хэвлэгдсэн. 2025-2027 онд сурах бичигт агуулгын шинэчлэл хийнэ. Тэр үед л олны шүүмжлэлийг дагуулсан тус дасгал хасагдах байх. Цахим сайтаас хуулбарлан тавьсан гэдэг дээр Боловсролын судалгааны үндэсний хүрээлэн оновчтой хариулт өгнө” гэв.

            Энэ талаар Боловсролын судалгааны хүрээлэнгээс тодруулахад "Манайх хариуцахаа больсон. Боловсролын ерөнхий газар" мэднэ хэмээсэн юм. Харин Боловсролын ерөнхий газарт тодорхой хариулт өгөх хүн олдсонгүй. 

Бид ирээдүйн Монгол Улсыг авч явах иргэдийнхээ сурах бичигт хэзээнээс анхаарал хандуулах вэ, сайд аа. Буух эзэн, буцах хаяггүй алдаа мадагтай сурах бичигт төсвийн мөнгөө зарцуулсаар л байх уу.