Хүний мөсгүй цэвдэг сэтгэлтнүүдээс эрүүл мэндийн салбараа хамгаалъя

Сайд нь огцрох хүсэлтээ өгснөөр эрүүл мэндийн салбарт бугласан идээ бээр бүр мөсөн арилчихгүй.

Төрийн өмчит эмнэлгүүд хаалгачаасаа сувилагч, эмч, дарга хүртлээ ядарсан түмэндээ хэрхэн үйлчилж ирснийг бид бишгүй л үзлээ. Коронавирусийн халдвар авсан эмэгтэйг төрөөд удаагүй байхад нь өвлийн тэсгим хүйтэндуглааш, халаадтай нь эмнэлгээс зөөвөрлөж байдаг харгис үйлдэл бол эрүүл мэндийн салбарын нэгээхэн л дүр төрх. Төрөх эмнэлэг рүү эргэлт оруулахгүй байсан ч эх, хүүхдэд хөнжил нөмрүүлчих сэтгэлтэн бүхэл бүтэн эмнэлэгт байхгүй байна гэхээр тэнд эмэгтэй хүн, эх хүн ажилладаггүй юм болов уу гэж бодмоор. Ийм хүний үнэргүй, цэвдэг сэтгэлтнүүд эрүүл мэндийн салбараар дүүрсэн гэж хэлж болно.

Эх, хүүхдийн хувь заяаг шийддэг, хамгийн нандин агшинд алба хашдаг төрөх эмнэлгийнхэн ийм байхаар халдвар, хавдар, гэмтэл гэх мэт бусад эмнэлгийн ажилтан, эмч нарын талаар яриад ч хэрэггүй бололтой.  Эрүүл мэндийн салбарт бугласан идээ бээрийг илчлэх ийм явдлыг өөр хэд л бол хэдийг нэрлэж болно. Сүүлийн үеийн хэдэн жишээ дурдахад л, “Голомттой бүсээс ирсэн” хэмээн аравхан настай охиныг гадуурхаж, амьсгал тасрах хүртэл нь эхээс нь салгасан. Үүний буруутан одоо хүртэл олдоогүй, хэн нэгэн хариуцлага хүлээгээгүй. “Шинжилгээний хариу хүлээж байна” гэсэн ганцхан өгүүлбэрт уягдаж, ганцхан шөнө ээжээсээ хол байсан охины бие эрс муудаж, эмчилгээ эхлэхэд хэдийн оройтсон байлаа. Охин ээжтэйгээ ч уулзаж чадалгүй, эмчилгээ ч хийлгэлгүй энэ орчлонгоос  одсон юм.

Насаараа эх орныхоо бүтээн байгуулалтад гар бие оролцсон өвгөн насны эцэст ходоодны хорт хавдраар шаналж, гурван сая төгрөггүйгээсээ болж, өвчнөө хүндрүүлж орхилоо. "Иргэдийнхээ эрүүл энхийн манаанд амь бие үл хайрлан ажиллана" хэмээн тангараг өргөсөн цагаан нөмрөгтөн "Мөнгөгүй бол дахиж битгий ир" гээд боловсон байдлаар "Үхлээ хүлээх"-ийг сануулж, өвгөнийг голдоо ортол гомдоход хүргэсэн. Тэтгэврийн хэдэн төгрөгөө зээлээд, хот бараадсан өвгөн эцсийн амьсгалаа тататлаа хорт хавдраар шаналах сэтгэл, биеийн зовлон өвөртлөөд нутаг буцсан тухайгаа нулимс дуслуулан ярьж байна лээ. Гол тасармаар ийм үгсийг улсын эмнэлгийн хэчнээн эмч өвчтөнүүддээ хэлсэн бол...

Танилгүй бол, мөнгөгүй бол улсын эмнэлгээр үйлчлүүлнэ гэдэг хэр баргийн аавын хүүгийн барах даваа биш гэдгийг хүн бүхэн  мэднэ. Хэдэн хоногийн өмнө эмчид үзүүлэхийн тулд л хаалгачаас нь эхлээд сувилагч, эмч нарын гар цайлгахад хүрнэ. Мэс засал хийлгэхэд эмчид төдөн төгрөг, сувилагчид ийм бэлэг гээд тогтсон ханш бий болсныг хэн хүнгүй л мэддэг. Эрүүл мэндийн даатгал төлдгийнхөө хэргийг бид эмчийн гар цайлгаж, хэдэн эмчилгээ хийлгэх төдийгөөр л гаргадаг.  

Эмнэлгийнхээ үүднээс л ярвайж, янтаганаж, ядарсан ард иргэдээ мөнгө болгож хардаг тэднийг үндсээр нь өөрчлөх цаг болсон. Хүний мөсгүй, иргэдээ боддоггүй, баргийн зүйлд дөжрөхөө больсон эрүүл мэндийн салбарын цэвдэг сэтгэлтнүүдийн зэс эх, хүү хоёрт тохиолдсон үйл явдлын ачаар жаахан ч гэсэн цухуйж, ил боллоо. Одоо харин энэ зэсийг углуургаар нь цэвэрлэх цаг болжээ. Эрүүл мэндийн салбарт хагарсан хатигийг сорвигүй болтол нь цэвэрлэх хэрэгтэй. Ингэж байж улсын эмнэлэг хувийн эмнэлгийн хаяанд дөхөж очно. Хандлагаа өөрчилж, хариуцлагаа хүлээж, эрүүл мэндийн салбараа эрүүлжүүлье.