-Коронавирусийн халдвар авсан талаараа мэдээлсэн иргэн М-д эрүүгийн хэрэг үүсгэн шалгаж байна-

Коронавирусийн халдвар авч, ХӨСҮТ-д эмчлүүлж, эдгэрсэн иргэд яагаад таг дуугүй байна вэ. Монгол Улсад коронавирусийн батлагдсан тохиолдол 1469 хүрээд байгаагаас 909 нь бүрэн эдгэрч, эмнэлгээс гарсан. Гэтэл өнөөдөр халдвар авсан иргэдийн олонх нь таг дуугүй, амаа үдүүлчихсэн мэт байгаа нь хачирхалтай. “Эдгэрсэн хүн байгаа юм уу, эсвэл халдвар авсан хүн байхгүй юм биш үү” гэж эргэлзэх хэмжээнд хүрч байна гээд бод доо.

Нэг л их халдвартай иргэдээ эмчилсэн улс. Гэтэл халдвар аваад эдгэрсэн хүмүүс нь хэвлэлд байтугай фэйсбүүк хуудсандаа энэ талаараа бичих нь ховор байна. Тэд ядахнаа “Халдварын шинж тэмдэг ингэж илэрдэг юм билээ. Тийм төрлийн эмчилгээ хийсэн. Биед минь ийм өөрчлөлт орсон. Эдгэрсний дараа сөрөг нөлөө үлдсэн, үлдээгүй” гээд нэрээ нууцлаад ч болтугай иргэддээ мэдээлмээр. Энэ талаар биш юм аа гэхэд ядаж “Намайг эмчилж өгсөн эмчдээ баярлалаа” гэж хэлээд зогсож баймаар. Эсвэл тэдэнд “Эмчилгээний талаар хэнд ч мэдээлэл өгч болохгүй” хэмээн үүрэгдсэн юм болов уу. Учир нь, цахим орчинд мэдээлэл хийсэн хэд хэдэн хүнийг цагдаагийн байгууллагаас шалгаж байгаа аж.

ХӨСҮТ-өөс Эрүүгийн цагдаагийн албаны үүд рүү “шилжсэн” нь

Цахим орчинд коронавирусийн халдвар авсан талаараа мэдээлж, иргэдэд сэрэмжлүүлэг өгсөн хүн тун цөөн. Тэд мэдээлэл өгөөд л маргаашнаас нь ор сураггүй таг болчихдог нь бүүр сонин. Тухайлбал, эх орондоо эрүүл ирээд, тусгаарлах байрнаас халдвар авсан талаар иргэн М өнгөрсөн оны арваннэгдүгээр сард мэдэгдсэн. Тэрбээр “Энхсаран” сувиллаас халдвар авсан хүний олонхийг нь халуун усны газраас авсан гэж бодож байгаа. Харин би болон надтай хамт байсан хүн халуун усны газраар үйлчлүүлээгүй, өрөөндөө шүршүүртэй байсан. Бид “Энхсаран” сувиллын ажилчдаас халдвар авсан байх магадлал маш өндөр байгаа юм. Одоо ХӨСҮТ-д “Энхсаран” сувиллын хэд хэдэн ажилтан коронавирусийн халдвар авсан гээд бидэнтэй хамт эмчлүүлж байгаа. Тэгэхээр халдвар халуун усны газарт эхэлж тархаад, тус газрын ажилчид түүнээсээ халдвар аваад, тусгаарлалтад байсан хүмүүст тараасан байх магадлалтай. Би гэхэд л хоол тараадаг хүнээс халдвар авсан байх гэж бодож байгаа. УОК хариуцлага алдаж, эрүүл иргэдээ хохироосон гэдгээ хүлээн зөвшөөрч, уучлал хүсэх ёстой” хэмээн тусгаарлах байрны ноцтой баримтыг олон нийтэд мэдээлж байлаа.

Тэрбээр ХӨСҮТ-д 20 гаруй хоног эмчлүүлж, сувилал руу шилжиж, бүрэн эдгэрээд гэртээ харьсан ч фэйсбүүкээр мэдээлэл тараасан гэдгээрээ буруудаж, хоёр ч хэргээр Эрүүгийн цагдаагийн албаны үүд сахих болжээ. Түүнийг ярилцлага өгч, лайв хийсэн өдрөөс эхлэн ар гэрийнхэн болон өөр рүү нь цагдаагийн байгууллагаас утас цохиж, “Ямар зорилгоор лайв хийсэн” талаар нь тодруулж байсан аж. Харин эдгэрээд гарсных нь дараа Эрүүгийн цагдаагийн албанаас Эрүүгийн хэрэг, зөрчлийн хэргээр хэрэг бүртгэл нээн байцааж эхэлжээ.  

Коронавирусийн халдвартай иргэдээс мэдүүлэг авч, шалгах нь  хэний тушаал вэ

Иргэн М шиг халдвар авсан тухайгаа мэдээллээд цагдаагийн байгууллагад шалгагдсан олон хүн бий гэнэ. Тухайлбал, “Мөнххада” ХХК-ийн ажилтан, “Амар” зочид буудлаас халдвар авсан гэх иргэд зогсоо зайгүй байцаагдаж, шалгагдаж байгаа аж. Тэдний шалгагдаж байгаа үндэслэл нь ердөө л олон нийтэд мэдээлэл тараасан гэх. Мэдээлэл өгсөн иргэн бүрийнхээ амыг УОК эрүүгийн цагдаагийнхнаар  бариулж байгаа юм биш биз. Халдвар хаанаас авснаа, ямар нөхцөл байдалд тусгаарлагдаж байснаа хуваалцсан хүн бүрийг шахуу яагаад цагдаагаас байцаагаад байна вэ.