Загасны ой санамж маш богино юм гэнэ лээ. Гэтэл манай төр түшилцэж яваа эрхмүүдийн ой санамж түүнээс ч богино бололтой. Дан ялангуяа эрхэм түшээд маань гадагшаа явахаараа, онгоцонд суухаараа хийсэн үйлдэл, хэлсэн үгээ мартаж, ой санамжаа "алдчихдаг" өвчин тусаад ирдэг гэмтэй. Энэ нь онгоцны дуу чимээнээс болдог уу, эсвэл очиж байгаа газрынхаа цаг агаар, орчин нөхцөлөөс болдог уу бүү мэд. Ямартай ч УИХ-ын нэг гишүүн, Цэцийн дарга маань гаднын улсыг зориод ой санамжаа "алдаад" ирсэн юм даг.

ХУДАЛЧ Ш.РАДНААСЭД

            Онгоцонд сууснаа, бүр эх орондоо ирснээ ч санахгүй болтлоо “өвчин” нь хүндэрч, хүнд шатандаа орсон гишүүн төрийн эрх барилцаж, Говь-Алтайчуудыг төлөөлж, УИХ-ын хойморт заларч буй. Бүүр УИХ-ын чуулгандаа оролцож, асуулт асууж, санал хэлж, хууль батлах товчлуур дээр баруун, зүүн гараараа ээлжлэн дараад таахалзаж явна, тэр эрхэм. Цар тахлын үед бүтэн жилийн хугацаанд хүсэлт гаргаад ч эх орондоо ирж чадахгүй байгаа элэг нэгт монголчуудынхаа урдуур оочер дайрч, оготно, зурам шиг нуугдаж ирснийгээ хээв нэг дарж, “Би ачаа тээврийн онгоцоор ирээгүй” хэмээн ярьсан УИХ-ын гишүүн Ш.Раднаасэд сүүлийн хэдэн өдрийн ярианы халуун сэдэв байлаа. Тодруулбал, нэгдүгээр сарын 5-6-нд шилжих шөнө Сөүл-Улаанбаатарын нислэгээр ирсэн 38 хүнтэй УИХ-ын гишүүн Ш.Раднаасэд мөр зэрэгцэн, дөрөө харшуулан эх орондоо иржээ. Гэхдээ тэрбээр үүнийг няцааж, “БНСУ руу эрүүл мэндийн шалтгаанаар яваад, шинэ оны өмнө тусгай үүргийн нислэгээр эх орондоо ирсэн. Миний тусгаарлалтын хугацаа хэдийн дуусаад, УИХ-ын чуулгандаа оролцож байгаа. Гэхдээ эх орондоо хэзээ ирснээ санахгүй байна. Ямартай ч арваннэгдүгээр сарын сүүлч бил үү, арванхоёрдугаар сарын эхээр ирсэн” хэмээн ярьсан нь түүнийг ой санамжаа алдсаныг бэлхнээ гэрчилнэ. Ямар эрүүл хүн л эх орондоо хэзээ ирснийгээ санахгүй байх вэ дээ.

"ӨГЗӨГ" Д.ОДБАЯР

   Ой санамжаа алдагсдын тэргүүн эгнээний “өвчтөн” бол Монгол Улсын Үндсэн хуулийн Цэцийн дарга асан Д.Одбаяр. Тэр Цэцийн даргынхаа карьерийг сүр дуулиантай төгсгөж, хоёр орны бэлгийн харилцааны "бэлэг тэмдэг" болсон гэхэд хилсдэхгүй. Тодруулбал, тэрбээр 2019 оны аравдугаар сарын 31-нд Улаанбаатар-Сөүл чиглэлийн “KAL”-ийн нислэгээр нисэж байхдаа онгоцны үйлчлэгч бүсгүйд бэлгийн дарамт учруулж, өгзгөнд нь хүрч дэлхий даяар Монгол Улсын нэр хүндийг цуурайтуулж байлаа. Д.Одбаяр нь Индонезид болох “Олон улсын Цэцийн гишүүдийн хурал”-д оролцохоор явж байхдаа ийм нэг хэрэг тарьсан. Түүнийг нисэх багийнхан Инчеоны нисэх буудлын цагдаад мэдэгдэж, тэр даруй баривчлуулсан гэдэг. Ингээд тэрбээр харь орны хууль сахиулагчдад байцаагдаж, мэдүүлэг өгөөд “Хийсэн үйлдлээ сайн санахгүй байна” гэж хариулсан байгаа юм. Мөн “Онгоцонд миний ард талын суудал сууж явсан монгол хүн ёс зүйгүй үйлдэл гаргасан. Тэр хүнтэй андуурч байна” хэмээн бусдыг ч гүтгэж амжсан. Гэвч харамсалтай нь түүний хийсэн үйлдэл бүхэн батлагдаж, торгуулийн шийтгэл аваад, “өгзөг” нэрийг өвөртлөөд эх орондоо ирж байсан цаг саяхан. 

   Монгол Улсын нэрийг “Өгзөг” нэрээр өөрчилж, сэвтүүлсэн хариуцлагаа тэрбээр хүлээлгүй, усанд хаясан чулуу адил таг чиг жил гаруйн нүүр үзэх гэж байна. Уг нь Д.Одбаяр Улаанбаатараас нисэхдээ Цэцийн дарга албан тушаалтайгаа, эхнэр, хүүхэдтэйгээ санаж, хийж байгаа үйлдлээ мэдэж байсан гэдэг. Харамсалтай нь, гуравхан цагийн хугацаанд "халдвар" авч, гэнэт л хийж байгаа үйлдлээ, хэлж байгаа үгээ ор тас мартдаг өвчин тусчихсан бололтой юм билээ. Одоо тэр эдгэж, охид, бүсгүйчүүдийг  зүгээр байлгадаг болсон болов уу. Арай бас өгзгөнд нь хүрчихээд, ой санамжаа алддаг хэвээрээ яваа юм биш биз.

            Ой санамжаа алддаг төрийн түшээдийн маань түүх тэднээр л дуусаасай билээ. Тэгэхгүй бол Монгол Улсын төрийн толгойд баахан "ой санамжгүй" хүмүүс сууж, өнөөдөр баталсан хуулиа маргааш мартаад, одоо хийснийгээ цагийн дараа санахгүй байвал ард түмэн бид чинь мөн чиг баларлаа шүү.