Тэшүүр “мөрлөөд” ээждээ очиж бууз хийсэн УИХ-ын гишүүн Д.Өнөрболорын сурталчилгааг дуурийн дуугаараа “Монос”-ын Л.Эрдэнэчимэг бут цохилоо. Түүний араас Санхүүгийн зохицуулах хорооны дарга асан С.Даваасүрэн ногоон цоохор алчуур мөрөн дээрээ тохчихоод "Can’t Help Falling in Love” дууг төгөлдөр хуурын ард суугаад дуулж байгаагаар дүрсээ бичүүлсэн байв.

      Ийн сонгууль ойртсныг илтгэх солиотой сурталчилгаа ар араасаа гарч эхэллээ. Угтаа бол улстөрчид ард түмнээс сонгогдох эрхээ авах гэж дуурь дуулж, балет бүжиглэх нь наад захын ажил болох нь. Үнэндээ бол борог амьдралтай иргэдийнхээ бор хоногийг яаж өнгөрөөж байгааг ч мэдэхгүй хэр нь амьдралаас тасарчихсан сурталчилгаа ар араас нь цацаж эхлэх нь тэр.  Ёстой л тэд “За гэвэл ёо-гүй” дээрээ тавьчихсан зав олдвол тойрог руугаа гүйчихээд төрийн ажлаа урлаг, уран сайнаар сольчихсон ёстой дураараа дургиж, дунд чөмгөөрөө жиргэж явна.

     Сонгуульд горилогчид сод авъяасаараа бусдаасаа ялгарах гэж энэ дээшээ их юм болно. Угтаа бол хийсэн ажил, санаачилсан хууль, эрх зүйн орчныг сайжруулсан  гэх ард түмний өмнө бариад ярих ажилгүй байгаа нь сонгуулийн сурталчилгаанаас нь илт байгаа гэсэн үг.

     Саяхан УИХ-ын гишүүн Ц.Цэрэнпунцаг зудын эрсдэлтэй аймгуудаар явж байхдаа Зил-131 машин маниулдаж тэр байтугай цахим орчинд “Завханы Тэс сумаас гараад малчин айлд тэжээл хүргэхээр явж байлаа. Би дотор нь сууж явсан. Гэтэл тэжээл ачсан Зил-131 машин маань огцом өгсүүр өөд хүч алдаад унтрав. Маниулдаад асаах гэсэн дийлдэг хүн байдаггүй. Тэгээд Цэрэнпунцаг гишүүн сэнсэртэл эргүүлж асаасан нь энэ юмаа. Бяр хөгширдөггүй л юм байна” хэмээн магтуулж амжсан.

       Бөхөд хайртай монголчууд Ц.Цэрэнпунцаг гишүүний бичлэгийг үзээд улсын төсвийн хөрөнгө оруулалтаар бурхантай хөшөө барих гэж байсныг нь мартаж, баахан уянгалсан удаатай.  Ингээд л сонгууль эхлэхээр сонирхолтой ч гэмээр, солиотой үйлдлүүдээрээ ард түмнээс оноо авах гэж элдвийг санаачилдаг улс төрийн пи-ар ар араасаа хөвөрч байна.

     Томсгосон тойргийн нэг сул тал нь олонд танигдсан улстөрчидийн сонгогдох магадлал нэмэгддэг. Тиймдээ ч сонгуульд горилогчид олонд танигдаж, сайн хүний дүрээр гарч ирэх гээд хэрэндээ үзэж байна даа.  Ийм эгзэгтэй цаг үед сонгогчид хэр хэрсүү байхаас улс орны ирээдүй шалтгаална гэсэн үг. Угтаа бол улстөрчид хамгийн хөөрхөн, ухаантай дүрээр цаашлаад өөрсдийгөө сурталчилах гэж юу ч хийхээс буцахгүй цаг үедээ ирчихсэн байгаа гэсэн үг.

     Тэр тусмаа шинэ залуу сонгогчид хэнийг сонгохоо мэдэхгүй төөрч яваа энэ цаг үед улстөрчид аманд орсноо амалж, ухаантай, зөөлөн хүмүүс болох нь наад захын ажил болно. Тэд ах дүү хамаатан саданг нь ажилтай, орлогтой болгож, залуусыг гадаадад сургана гэх гоё үгсээр чихэн дээр нь цэцэг ургуулаад санал авч байвал гэх ганцхан мөрөөдөлтэй болчихсон уралдаж гүйцгээж байгаа нь тодорхой.

      Энэ удаагийн хуулийн шинэчлэлээр сонгуулийн албан ёсны сурталчилгааны хоног 17 болсон. Тодруулбал, УИХ-ын ээлжит сонгуулийн сурталчилгаа зургадугаар сарын 10-наас албан ёсоор эхэлж, зургаадугаар сарын 17-нд хаагдана. Цахим орчин ашиглаж сонгуулийн сурталчилгаа хийх харилцааг УИХ-ын сонгуулийн тухай хуулиар хуульчилсан. Өөрөөр хэлбэл, нэр дэвшигч цахим хуудсаа ашиглаж сурталчилгаа явуулах бол тухайн хаягийг Сонгуулийн ерөнхий хороонд бүртгүүлнэ. Улмаар бүртгэлгүй хаягаар сурталчилгаа хийвэл тухайн хаягийг хаах хүртэл арга хэмжээ авах хуулийн зохицуулалт тусгасан.

Мөн томсгосон тойргоор сонгууль явуулах болсноор гадаадад оршин суугаа иргэд сонгууль өгөх боломжтой байхаар хуулийн зохицуулалт хийсэн. Тодруулбал, гадаад улсад байгаа иргэдээс 2024 оны зургадугаар сарын 20, 21, 22, 23-ны өдрүүдэд санал авахаар тогтоосон. 

       Гадаад улсад байгаа иргэдээс санал авах ажлыг төв болон салбар комисс зохион байгуулж ажилладаг. Сонгуулийн ерөнхий хороо гадаад харилцааны асуудал эрхэлсэн төрийн захиргааны төв байгууллагын саналыг харгалзан төв комиссыг, төв комисс нь салбар комиссыг Дипломат төлөөлөгчийн газрын дэргэд байгуулахаар хуульчилсан.

       Гадаад улсад байгаа иргэн санал авах өдрөөс 5-аас доошгүй хоногийн өмнө буюу энэ оны зургадугаар сарын 15-аас өмнө сонгуульд оролцохоо өөрийн оршин байгаа улсын Дипломат төлөөлөгчийн газарт мэдэгдэж, бүртгүүлэх ёстой. Улмаар санал авахаар товлосон өдрийн 07.00-22.00 цаг хүртэлх хугацаанд салбар комиссын тогтоосон санал авах байранд саналаа өгөх юм.

       Угтаа бол улс төрд суух гишүүдийн босго өндөрсөх тусам улстөрчдийн арга нарийсч юу ч хийхээс буцахгүй цаг үе эхэлж байна гэсэн үг. Ийм л цаг үед сонгогчид хэрсүү байж төрд хэрсүү улстөрчдийг гаргах хариуцлагатай цаг үе ойртож байна.