Албаныхан дотоодод халдвар хэрхэн алдсанаа хяналтын камераар илрүүлэх гээд чадахгүй хоёр сар буюу 60 гаруй хоног өнгөрч байна. Тодруулбал, өнгөрсөн оны арваннэгдүгээр сарын 7-нд ХӨСҮТ-ийн сувилагчаас халдвар илэрч, дотоодын анхны халдвар тээгч эмнэлгийн салбараас “төрсөн” гэдгийг тус төвийн дарга Д.Нямхүү зарласан. Ингэхдээ тэрбээр “Анхаарал боломж алдсан эсэх, сувилагч хаанаас халдвар авсан бэ гэдгийг хяналтын камераар шүүж байгаа. Энэ бүгдийг удахгүй тогтооно” гэсэн юм. Гэвч сувилагч халдвар хаанаас авсан нь тогтоогдолгүй байсаар хоёр он дамжлаа.

Албаныхны дараагийн хяналтын камер шүүх объект алдарт “Энхсаран” сувилал, Сэлэнгэ аймгийн Нэгдсэн эмнэлэг, Цэргийн төв эмнэлэг гээд уртаас урт дараалал үүссэн. Үүн дээр нэмэгдээд “Амар” зочид буудлын хяналтын камерыг шүүх шаардлагатай болчихлоо. Учир нь, өнгөрсөн сард Франкфуртаас ирсэн иргэдийг “Амар” зочид буудалд тусгаарласан байдаг. Иргэдийг 14 хоног тусгаарлаж, гэрийн ажиглалтад шилжих өдөр гэнэт найман хүнээс халдвар илэрсэн юм. Тэдний нэг нь тусгаарлалтын байранд ажиллаж байсан эмч. Тэгэхээр эмч хаанаас халдвар авсан бэ гэдгийг хяналтын камераар шүүж тогтоох ёстой. Энэ талаар Эрүүл мэндийн сайд Т.Мөнхсайхан “Амар” зочид буудалд тусгаарлагдаж байсан хүмүүсээс 14 хоногийн дараа  халдвар илэрсэн. Тусгаарлах явцад халдвар авсан байж болзошгүй гэж үзсэн учраас иргэдийг нүүлгэн шилжүүлсэн. Тусгаарлалтын хугацаанд халдвар хамгааллын дэглэм алдагдсан уу, дэглэм зөрчсөн үү гэдгийг хяналтын камер шүүж тогтооно. Хэрэв дэглэм алдагдаагүй бол гаднаас халдвартай ирээд 14 дэх хоног дээрээ илэрсэн үү, эсвэл зочид буудлын нөхцөл байдлаас шалтгаалсан уу гэдэг дүгнэлт гарах ёстой. Одоогийн байдлаар эцсийн дүгнэлт хийх боломжгүй” хэмээн Засгийн газрын хуралдааны үеэр мэдэгдсэн.

“Эмч нар халдвар тараасан байж болзошгүй”

Халдвар илэрсэн иргэд “Гадаадаас эрүүл ирээд халдвар авчихлаа” гэж үзэж байгаа. Тэгвэл бид “Амар” зочид буудалд тусгаардлагдаж байсан хоёр иргэнтэй холбогдож, тусгаарлагдах явцын нөхцөл байдлын талаар тодрууллаа.

Иргэн А: “Амар” зочид буудал тоос шороо маш ихтэй байсан учраас харшил хөдлөөд хэцүү байлаа. Зарим нь гэр бүлээрээ, зарим нь ганцаараа тусгаарлагдсан. Тусгаарлалтын хугацаа дуусахаас хоёр хоногийн өмнө шинжилгээ авч, гардаг өдөр халдвар илэрсэн талаар мэдээллээд, биднийг нүүлгэн шилжүүлсэн. Хэдэн давхарт байсан хүмүүсээс халдвар илэрснийг нь мэдэхгүй. Биднийг “White house” зочид буудалд нүүлгэн шилжүүлээд байна. Хоол унд нь маш муу, бохир орчинтой, хүйтэн, хэцүү газар байна. Өчигдөр (уржигдар) шинжилгээ өгсөн хэдий ч одоо хүртэл хариу нь гараагүй, хүлээлгийн байдалтай байна. Эндээс нэг хүнээс л халдвар илрэх юм бол биднийг дахин 14 хоног тусгаарлана гэсэн. Эрүүл ирсэн биднийг ингэж олон хоногоор тусгаарлаж байгаад маш их гомдолтой байна. Тэнд ажиллаж байсан эмч нар хариуцлага алдсан байх гэж бодож байгаа. Зочид буудлын давхар бүрд нэг, нэг эмч хоол зөөж, хүмүүсийг ажиглаж байсан. Хэрэв гадаадаас нэг хүн халдвартай ирсэн бол эмчээр дамжаад бусад хүн халдвар авсан байх гэж бодож байгаа. Ажиглалт хийж байсан эмч нар оройдоо уулздаг байсан байж болзошгүй. Тус буудлын хяналтын камер нь ажилладаг үгүйг мэдэхгүй.

Иргэн Х: Шинжилгээний хариу буруу гарсан байх магадлалтай

-“Амар” зочид буудлын нөхцөл байдал яг ямар байсан юм бэ. Ажиглалт, хамгаалалт хэр байсан талаар мэдээлэл өгөхгүй юү?

-Миний хувьд лав өрөөнөөсөө огтхон ч гараагүй. Бусад хүн ч мөн ялгаагүй, дэглэмээ сайн барьж байсан байх.Тэнд нөхцөл байдал хүнд байсан гэж хэлж болно. Учир нь, миний байрлаж байсан өрөөний бохир байнга бөглөрдөг байсан. Мөн модон орон дээр хоёр давхар хөнжил тавьчихсан, гудас өгөөгүй болохоор нуруу их өвддөг болсон. Би нэг зүйл дээр гомдолтой байгаа. Шинжилгээ өгөхөөс 30 минутын өмнө ус ч уух ёсгүй байдаг. Хэрэв ингэсэн тохиолдолд шинжилгээний хариу таван хувь  буруу гарах магадлалтай хэмээн дэлхий даяараа үзэж байгаа. Гэтэл биднээс шинжилгээ авахдаа огтхон ч хэлээгүй, зарлаж анхааруулаагүй. Шууд хаалга онгойлгоод л шинжилгээ авч эхэлсэн.Тэгэхээр шинжилгээний хариу буруу гарч, халдваргүй хүмүүсийг халдвартай гэж оношилсон байж болзошгүй.

-Шинжилгээ өгөх үед та хоол идчихсэн байсан юм уу?

-Азаар би хоолоо идээд хэсэг хугацаанд унтчихсан байсан. Тийм болохоор миний шинжилгээний хариу сөрөг гарсан нь зөв гэж бодож байгаа. Гэтэл тэнд чинь шинжилгээ өгөхөөс өмнө хоол идээд, ус, ундаа уусан хүн хүртэл байсан шүү дээ. Тэр битгий хэл буудлаас кола ундаа захиалж уух боломжтой юм билээ. Хэрэв тухайн үед кола уусан хүн байсан бол шинжилгээний хариу буруу гарсан байх магадлалтай. Хэрэв тийм биш бол үүнийгээ батлах ёстой.

Тусгаарлалтад байгаа иргэд ийн ярьж байна. "Энхсаран" сувилалд тусгаарлагдаж байсан иргэд ч тусгаарлалтын явцад халдвар авсан талаараа өгүүлсэн. Иргэдээс өчнөөн үнэтэй төлбөр авч, хамгийн эрүүл, аюулгүй орчин бүрдүүлэх ёстой газрууд нь халдварын голомт болж,  тусгаарлалтын байрнаас иргэд халдвар авсаар л байх уу, Т.Мөнхсайхан сайд аа. Эрүүл иргэд тусгаарлалт нэртэй "шорон”-гоос халдвар авсны хариуцлагыг хэн  хүлээх вэ. Гудамжнаас биш, онгоцноос бүүр биш, хамгийн аюулгүй байх ёстой тусгаарлалтын байр, эмнэлгээс халдвар голомтлон тархаж байна. Хэдэн сар хоригдож, хичээсэн ард түмний хөдөлмөрийг үнэгүйдүүлж байна. Адаг сүүлд нь хамаг бурууг хяналтын камерын санах ой руу чихээд л болоо юу.