Өвөлжилт хүндэрч, хаа сайгүй цасан бүрхүүлтэй, малчид малаа бэлчээж чадахгүйд хүрээд буй. Энэ үед төрийн түшээд маань өвс, тэжээл, мал бэлчих бэлчээр гаргахаас илүүтэй нэгэн хоржоонтой шийдвэр гаргасан нь орон нутгийн удирдлагуудад автомашин тараах шийдвэр байлаа. Сум орон нутгийн удирдлагат зуд тохиогоод байгаа юм уу, малчид зудын эрсдэлд өртөөд байгаа юм уу. Энэ машинаар яг юу хийх вэ. Малчдад өвс тэжээл хүргэх үү, цасанд зам гаргах уу. Тэртэй тэргүй орон нутгийн тамгын газарт туулах чадвар өндөртэй УАЗ-69, Уаз Пургон, ланд 80 гэх автомашинууд бий. Сузуки жимни машин эдгээр автомашинаас илүү байж чадна гэвэл харамсалтай нь үгүй. Чанар чансаа, аюулгүй байдал, туулах чадвар талаасаа орос тэрэгнүүдтэй ярих юм биш. Зуны цагт уул, хад, шавар шавхайд туулах чадвар сайтай байж болох ч өвөлдөө 60-70 см зузаан цас тогтдог манай улсад сузуки жимни машин замаас гараад л элгээрээ хэвтээд явахгүй л болов уу. Нэг үгээр бол “Дайран дээр давс нэмэх” гэгчийн үлгэр болох биз. Үүний оронд сум оронд нутагт өвс тэжээлийн агуулах, цас арилгах автомашин худалдан авч өгсөн бол илүү нүдээ онох байлаа. Гэтэл “Нүглийн нүдийг гурлаар хуурна” гэгчээр цас, зуданд хамаг малаа алчдчихсан малчин түмнээ доромжилж байгаа мэт орон нутгийн удирдлагуудад автомашин өгч сонгуулийн шоу хиймээргүй байна.

Тэртэй тэргүй орон нутгийн тамгын газарт туулах чадвар өндөртэй УАЗ-69, Уаз Пургон, ланд 80 гэх автомашинууд бий. Сузуки жимни машин эдгээр автомашинаас илүү байж чадна гэвэл харамсалтай нь үгүй.

              Энэхүү шийдвэрийг 2024 хоёрдугаар сарын 28-ны өдрийн хуралдаанаар сумдын Засаг даргын Тамгын газарт автомашин худалдан авахад шаардагдах 15 тэрбум төгрөгийг Засгийн газрын нөөц сангаас гаргахаар шийдсэн. Уг шийдвэрийн дагуу Төв, Дундговь, Дорноговь аймгийн өвөлжилт хүндэрсэн сумдад туулах чадвар сайтай автомашинуудыг гардуулаад эхэлсэн билээ. Тухайлбал, машинуудыг MSM групп, Хюундэй, Ниссан компаниас хөнгөлөлттэй үнээр худалдан авсан гэх мэдээлэл бий.  Машиныг сумдын Засаг дарга нарт гардуулах үеэр шадар сайд С.Амарсайхан "Өнөөдрийн байдлаар нийт гурван сая мал хорогдоод байна. Өмнө нь аймгуудад пургон, УАЗ машин нийлүүлэхэд жилийн дараа эвдэрч байсан. Иймд энэ удаад Форд, Ниссан брэндийн машинууд нийлүүлж байна. Засгийн газрын хүсэлтээр хөнгөлөлттэй үнээр 100 машин нийлүүлсэн ААН-д талархаж байна" гэсэн. Уг үйл явдлыг “Сонгуулийн шоу, зарагдахгүй байгаа автомашинуудаа шахсан зүйл боллоо” хэмээн хардах хүн олон байна.  

 

60-70 см зузаан цасан Сузуки жимни машин явахгүй нь мэдээж, үүнээс гадна энэ малчдад ямар тус хүргэж чадахгүй

Үүнээс гадна, дээрх компаниуд “Бүх машинд өвлийн дугуй, суудлын халаагчийг нэмэлтээр байрлуулжээ. Шинэ буюу 100 километрээс бага гүйлттэй, орон нутагт туршсан, хэрэглээнд нэвтэрсэн, өвөл, зуны есөөс доошгүй дугуйтай, баталгаат хугацаатай автомашинуудыг олгосон” хэмээн мэдээллээд буй. Гэтэл учир мэдэх хүмүүс “Шинэ машин өвөл зуны найман дугуйтай ирдэг” талаар ярьж байна.

              Манай улсын хувьд өвөл болгон шахуу л зуд болж, малчид хаа сайгүй отор нүүдэл хийдэг. Гэтэл малчдаа дэмжсэн шийдвэр гаргахаас илүүтэй сум орон нутагт нь зориулсан шийдвэр гаргах төдий болоод өнгөрдөг нь нууц биш. 60-70 см зузаан цасан Сузуки жимни машин явахгүй нь мэдээж, үүнээс гадна энэ малчдад ямар тус хүргэж чадахгүй. Харин сум орон нутгийн засаг дарга нарын унаа болоод л дуусна. Үүний оронд цас арилгах автомашин, цасны мотоцикл аваад малчдад тараавал яасан юм бэ, төрийн түшээд ээ.