Улстөрчид ард түмэндээ жигтэйхэн хайртай болдог Сар шинийн баяр дөхөж байна. Чуулган завсарлахтай уралдаад том жийп хөлөглөж, хурган дотортой дээл, их гарын хөөргөөр гангалсан гишүүд хөдөөг зорьж, гурил будаа, тэжээл хэвэгхэн тарааж, улс төрийн оноогоо цуглуулдаг уламжлалтай болоод удаж байна. Сайн малчин, алдарт уяач, аварга тариаланчийн тууз өнгө өнгөөр нь тарааж, ахмадуудыг ууттай чихэр, ул боов тараасан болж, сонгуулийг сурталддаг, найр тавьдаг тогтолцоо өнөөдрийг хүртэл үргэлжилж байна.

      Тэрбайтугай “Бадарчин явсан газар балагтай, батгана суусан газар өттэй гэгчээр” улстөрчидийн сайхан зан, ус болох нь бишгүй. Өөрөөр хэлбэл, УИХ-ын гишүүний уулзалт тараад дарагдаж, амиа алдсан ахмадын тухай мэдээлэл ч өнгөрсөн жил олны чихийг дэлсгэж байлаа. Хөдөөгийн малчид сум орж, уулзалтад суугаад хөлчүүрэхсэн үедээ хөлдсөн байж болзошгүй хэрэг ч саяхан гарсан.

       Хэдийгээр энэ жил томсгосон тойргоор сонгууль явуулах гэж байгаа ч тойрог услах улстөрчдийн ажил хэвээр үргэлжилж байна. Чуулганы хуралдаан дээр гишүүд “Сар шинийн баяраар хэдэн ахмаддаа бэлэг бэлгийн дээд бэлэн мөнгөө бариад золговол хууль зөрчсөн болох уу” гэх нүхээ малтаж байгаа нь ч харагдсан. Ингээд харахаар дөрвөн жилийн ирээдүйгээ ул боов, ууттай чихрээр сольдог ужгирсан тогтолцоо үргэлжилсээр байх нь.

      Ийн эхний ээлжинд улстөрчид тэр дундаа эрх баригч намынхан “Эрдэнэс Тавантолгой” ХК-ийн ногдол ашгаар ам хааж, нийгмэд дэгдээд буй дуулиант сэдвүүдийг мартагнуулах бололтой.

  Өнгөрсөн жил Үндсэн хуулийг сурталдах гэж үсээ зулгаахаас наагуур байсан гишүүд энэ жил 1072 хувьцааны ногдол ашиг “тараах” эрх өвөртлөөд маадгар гэгч нь очих нь. Өөрөөр хэлбэл, УИХ-ын чуулганы хуралдаан хаахаас өмнө Засгийн газраас өргөн мэдүүлсэн "Эрдэнэс-Тавантолгой" компанийн хувьцааны талаар авах арга хэмжээний тухай тогтоолыг төслийг хэлэлцүүлэн баталсан. Ингэснээр Монгол Улсын иргэн бүр тус компаний 1072 хувьцааг эзэмшихээр болж байгаа юм. Цаашлаад УИХ-ын ээлжит чуулганыг хуралдуулж, 1072 хувьцааны ногдол ашиг тараах асуудлыг хэлэлцүүлээр тогтсон. Угтаа бол 2022 оны “Эрдэнэс Тавантолгой” ХК-ийн ногдол ашгийг тараахаар тогтож, ногдол ашгийг хэдийд, хэдэн төгрөг тараах вэ гэдгээ тогтох юм.

       Эх сурвалжийн мэдээлж буйгаар хоёрдугаар сарын 1-нээс өмнө "Эрдэнэс Тавантолгой" ХК-ийн ТУЗ хуралдаж ноогдол ашиг тараах асуудлыг хэлэлцүүлнэ. Улмаар Засгийн газраас Баялагийн сангийн тухай хуулийн төслийг Их хуралд өргөн мэдүүлэх юм байна. 1072 хувьцааны ногдол ашиг тараах асуудлаар "Эрдэнэс Тавантолгой" ХК-ийн БЭТ Ж.Ганбат "Тогтоолын төсөл баталсантай холбоотой холбогдох өөрчлөлт, тооцоо судалгааг хийнэ. Үүний дараа ТУЗ-дөө танилцуулаад хувьцаа эзэмшигчээ танилцуулна. 2022 онд "Эрдэнэс Тавантолгой" ХК 1.3 их наяд төгрөгийн ашигтай ажилласан. 2022 оны ашгийг хувьцаа эзэмшигч нарт өгөөгүй байгаа. Үүнийг шийдвэрлэнэ. 2023 онд жилийн эцсийн байдлаар гурван их наядын ашигтай ажилласан. Үүний санхүүгийн тайлан хоёр сард гарч, аудит орож баталгаажуулсны дараа 2024 оны дөрөвдүгээр сард ногдол ашгийн тоо эцэслэн гарна. "Эрдэнэс Тавантолгой" ХК-ийн 27.5 хувийг иргэд эзэмшиж байгаа юм. 2022 оны жилийн эцсийн ашгийг тухайн үед хувьцаа эзэмшиж байсан иргэдэд өгөх юм уу, эсвэл нийт иргэдэд өгөх үү гэдгээ компани шийдэж, ТУЗ дээрээ хуралдаж шийдэх юм. Тэгэхээр 1.3 их наядаас 116 мянга гаруй төгрөг тооцохоор байна. 2022 оны ашгийг Сар шинийн өмнө олгох асуудлыг ярина. Гэхдээ ТУЗ дээрээ үүнийг ярих юм" гэх мэдээлэл өгч байлаа.

      Өмнөх жилүүдийн сонгуулиар бэлэг тараалтаараа тэргүүлсэн гишүүд “Шанага” Тэмүүлэн, “Бидон” Ганбат, “Данх” Билэгт, “Халуун сав” Учрал гэж хоч зүүх хүртлээ, ард түмэн тал засаж, гарын бэлэг гардуулсан. Түүгээр ч зогсохгүй тараасан бэлгээрээ “гангардаг”, гайхуулдаг үе ч байлаа.

     Сүүлийн үед цахим орчинд Сар шинийн бэлэг тараалт шүүмжлэл дагуулж, сошиалд гайхуулах “дон” эрхгүй багассан. Гэхдээ л хөдөөгийн малчдыг сүлжээ, интернэтгүйгээр нь далимдуулж, цаг тооны бичгээс эхлүүлээд мэр сэр гарын бэлэг сум захиргааны удирдлагуудаар нь далидуулж тарааж л байгаа сурагтай.

     Ингэж найр тавьж, хөл алдаж гүйснийхээ хариуд дөрвөн жилийнхээ ажлыг хялбархан тавиулчихдаг нь ч байдаг үзэгдэл мэт дасал болжээ. Уг нь өдийд настайчуудынхаа саналыг авсан улстөрчид ул боов тараахын оронд улс орныхоо хөгжил, иргэдийнхээ амьдрах орчныг нь сайжруулах ийм хуулийн төсөл санаачлаад, улс орныхоо төлөө хийсэн ажлын тань хариуд ийм тэтгэвэр тогтоох хууль боловсруулсан шүү гээд бодлого, төлөвлөлт яриад сууж байх байлаа. Гэвч одоогийн улстөрчдөөс манлайлал үзүүлэх гишүүн байхгүй гэдгийн баталгаа энэ байна даа.

        Ард түмэнд хайр зарлаж, найр тавьсан улстөрчдийн буухиа үргэлжилсээр байна