“Байранд коронавирусийн сэжигтэй тохиолдол илэрсэн тул иргэд гэрээсээ аль болох гарахгүй байна уу”. Энэ бол Баянзүрх дүүргийн 28/5 байрны оршин суугчдын фэйсбүүк группт арванхоёрдугаар сарын 30-ний өдөр нийтэлсэн зар. Энэ тухай мэдээллийг уншсан оршин суугчид “Аль орцных вэ. Иргэдээс шинжилгээ авах уу. Биднийг тусгаарлах уу” зэрэг сэтгэгдэл бичсээр хариу тайлбаргүй хоёр хоног өнгөрлөө. 

Нэгдүгээр сарын 1-ний 12:00 цаг боллоо. Дөрвөн цагдаа гэнэт л ирээд иргэдийг гэрээс нь гаргахгүй, байрны дэлгүүрийг хүртэл хааж, хөл хорив. Харин гаднаас бол иргэдийг чөлөөтэй нэвтрүүлж байлаа. Ингэхдээ тэд “Одоогийн байдлаар тодорхой мэдээлэл алга. Шинжилгээний хариу батлагдаагүй байгаа тул тайван бай” гэж хэлээд хэсэг хугацаанд байрны үүд сахив. Ингээд тэд 60 минутын дараа “Тусгаарла гэсэн чиг дээрээс ирээгүй” гээд яваад өглөө. Энэ бүх хугацаанд иргэд аль орцноос сэжигтэй тохиолдол бүртгэгдсэнийг хүртэл мэдэхгүй байсаар 15:00 цагтай золгов.

Төд удалгүй “ХӨСҮТ” гэсэн бичигтэй эмнэлгийн гурван машин ирээд тус байрны нэгдүгээр орцыг ариутгав. “Юу болсон бэ. Халдвар илэрсэн үү. Сэжигтэй тохиолдлынх нь шинжилгээний хариу гарсан уу” гэж асуусан ч мэдэх хүн алга. Хоёрхон орцтой байрны нэг орцыг ариутгасан болохоор “Нэгдүгээр орцноос сэжигтэй тохиолдол илэрсэн юм байна” гэдгийг арай чүү мэдлээ. “Ямар ч гэсэн батлагдсан тохиолдлын ойрын хавьтал нь манай байранд байдаг болоод ариутгал хийсэн байх. Бусдаар зүгээр юм шиг байна” гэж бодоод иргэд нэгдүгээр сарын 2-нтой золгоход нэг орцыг хааж, цагдаагийн хамгаалалтад авч, “Онцгой байдал” гэсэн бичигтэй эргүүлийн улаан чингэлэг байрны үүдэнд залрах нь тэр. Мөн энэ үед ч халдвар илэрсэн талаарх мэдээлэл огт өгсөнгүй. Иргэд оршин суугчдын цахим группт юу болж байгааг асуусаар 13:00 цаг хүргэв. 11:00 цагийн Эрүүл мэндийн яамны мэдээллээр ч манай энэ хавиас халдвар илэрсэн тухай мэдээлсэнгүй.

Харин СӨХ-ноос “Халдвар илэрсэн гэнэ. Одоогоор манай байрны нэгдүгээр орцыг ариутгаж, тусгаарлалтад аваад байна. Тус орцны иргэдээс шинжилгээ авна” гэх мэдээллийг өгөв. Дөрөв хоног халдвар, сэжигтэй тохиолдлын эрэлд гарсан иргэд ингэж нэг албаны эх сурвалжийн ганцхан өгүүлбэртэй боллоо. Өгүүлбэртэй болсон хэдий ч хэдийн тусгаарлалтад орсон байв.

Нэгдүгээр сарын 2-ны 15:00 цаг. Шинжилгээ авах багийнхан иргэдээс шинжилгээ аваад “24-48 цагийн дотор хариу нь гарна” гээд явлаа. Гэтэл одоог хүртэл буюу 48 цаг  болж байхад хүмүүсийн хариу гараагүй л байна. 28/5 байрны нэгдүгээр орцонд халдвар авсан хүн байвал хэдийн халдвар тараагаад орцоор нь сүйрүүлчих хугацаа өнгөрлөө. Иргэд хогоо орцны үүд хүргэх гэж, байрны дэлгүүрээс захисан хүнсээ авахын тулд нэг лифтээр зорчиж байгаа. Муугаар бодоход, халдвартай хүн байвал иргэд түүнтэй нэг лифтээр зорчиж байвал яах вэ. Агааржуулалтын нүхээр хүртэл халдвар тархах эрсдэлтэй гэж мэргэжлийн хүмүүс анхааруулаад байхад яагаад хариу гараагүй нэрийдлээр халдвартай байж болзошгүй хүнийг тусгаарлахгүй, хүмүүсийг хамтад нь хорьж байгаа юм бэ. Хайхрамжгүй, шуурхай биш, болхи байдлаас чинь болж иргэд хэзээ мөдгүй халдвар авахад ойрхон байна.

Хэрэв сэжигтэй тохиолдол илэрсэн өдөр буюу арванхоёрдугаар сарын 29-нд л халдвартай хүнээ тусгаарлачихсан бол иргэд өнөөг хүртэл тусгаарлагдахгүй, халдвар авчихаж магадгүй гэх айдасгүй, хүнсээ хэвийн цуглуулах боломжтой байлаа.

Энэ бол нэг л орцны иргэдэд тохиолдсон явдал. Өөр хэчнээн газар ийм байдалтай байгааг мэдэхгүй. Иргэд хэрхэх учраа олохгүй гэртээ хоригдож, хоол хүнс нь дуусвал яахаа мэдэхгүй, УОК-ын анхиагүй шийдвэрийг хүлээж байна. Ам яриагаар 14-21 хоног тусгаарлана гэсэн чигтэй. Гэтэл хажуухан талд нь залгаа амьдардаг хоёрдугаар орцны иргэд өнөөдрийг хүртэл чөлөөтэй гарч, орсоор байгаа нь хачирхалтай. Нэг дэлгүүрээр үйлчлүүлдэг тэд ч бас халдвар авсан байхыг үгүйсгэхгүй шүү дээ. Нэг орцны оршин суугчдаас нь шинжилгээ авч, ариутгал хийгээд, нөгөөхийг нь үнсэнд хаясан шалз аятай хаячихсан. Яагаад нэг байрны хоёр орцыг хоёуланг нь ариутгасангүй вэ. УОК, ЭМЯ, ХӨСҮТ шуурхай, хариуцлагатай ажилладаг бол өдийд эл байрны иргэдээс шинжилгээ аваад, хоёрдугаар орцыг нь эрүүл бүс болгоод зарлачих байлаа. Энэ янзаараа бол сэжигтэй тохиолдол, халдвар илэрсэн байрны иргэдийг мөн л ингэж мэдээлэлгүй хорьдог бололтой. Тусгаарлалт гэх нэрийдлээр тоглоом хийгээд байгаа юм уу, УОК-ын дарга аа, УОК-ын шуурхай штабын дарга аа.