Эрх баригч намд ард түмэн жинхэнэ дүнг нь тавьж эхэллээ. Сүүлийн найман жилийн хугацаанд төрийн эрхийг барьж байгаа МАН ээлжит УИХ-ын хаяанд ирж байгаа энэ үед бардам ая, шалдан гуянаас өөр юмгүй сууж байна. Угтаа бол өнгөрсөн найман жил төрийн эрхийг барихдаа ард түмэнд хийж өгөх ажил, хэлсэн, амласан нь олон байв ч дүнгээрээ тавиулах цаг нь ирэхээр юу юу ч үгүй хоосон сууж байгаа нь энэ. Тэгвэл эрх баригч намд сүүлийн найман жил төр гарч, төрийн эрх барихдаа ард түмэнд хийж өгөхөөр амлаж, ам бардаж гарч байсан ч эцэст нь гай ч үгүй, гавьяа ч үгүй ирэх сонгуультай золгуулж байгаа хоосон амлалтуудыг нь эргэн сануулъя.

-ГАЗРЫН ТОС БОЛОВСРУУЛАХ ҮЙЛДВЭР БАЙГУУЛАХ-

У.Хүрэлсүх Ерөнхий сайдын албан тушаал хашиж байхдаа Монголд газрын тос боловсруулах үйлдвэр барих ажил эхлүүлсэн. Тус ажлыг 2017 онд эхлүүлж, “Монгол газрын тос боловсруулах үйлдвэр” байгуулж, 70 гаруй инженер, техникийн ажилтантай, нийт ажилтны 50 гаруй хувь гаднын оронд боловсрол эзэмшсэн, мэргэжлийн хүмүүсийг гаргаж, ажиллуулж байв. У.Хүрэлсүх Ерөнхий сайд байхдаа ч түүний Засгийн газрын гишүүд ч Дорноговь аймгийн Алтанширээ суманд байгуулагдах газрын тос боловсруулах үйлдвэрийн хэд хэдэн удаа очиж, танилцсан, ам сайтай байсан үе олон. У.Хүрэлсүхийн Засгийн газар бүрэн бүрэлдэхүүнээрээ огцроход “Монгол газрын тос боловсруулах үйлдвэр”-ийн ажил үндсэн технологийн 12 байгууламж, дагалдах байгууламж, дагалдах байгууламж, дэд бүтэц, үйлдвэр хотхон зэргээс бүрдэх төслийн ажил идэвхтэй явагдаж, бүтээн байгуулалт эхэлсэн байв. Тийм ч учраас У.Хүрэлсүх Ерөнхий сайдын хувиар тус газарт очиж ажиллахдаа “Монгол газрын тос боловсруулах үйлдвэр” 2023 онд ашиглалтад орж, жилд 1.5 сая тонн газрын тос боловсруулахыг мэдэгдэж байлаа. 22 жил гацаанд байсан газрын тос боловсруулах үйлдвэр шаваа тавьсанаас хойш хоёр жилийн дотор “биежсэн” ч одоо Засгийн газрын үед бүтээн байгуулалт нь зогсож, энэ жил ашиглалтад орох хуваартай байсан ч хэзээ ашиглалтад орох нь тодорхойгүй хэвээр байна.

-АГААРЫН БОХИРДЛЫГ 80 ХУВЬ ХҮРТЭЛ БУУРУУЛНА-

"Утаа арилгана" гэсэн МАН-ынхны жүжиг 2010 оноос эхлэлтэй гэж болно. Тухайн үеийн Засгийн газар, Мянганы сорилтын сангийн "Цэвэр агаар" төсөлтэй хамтарч, "Утаа гаргадаггүй" гэх зуухыг сурталчилж, гэр хорооллын айлд аваачаад туршиж сүр болж байв. Дээр хэлсэнчлэн үнэхээр л анхных нь туршилт сайн болдог. Утаа гардаггүй. Утаа гарахгүй байгааг нь харахаар иргэд нааштай хандаж, санал болгосныг нь хүлээж авдаг. Түүнээс хойш эрчим хэмнэлттэй, бүрэн шаталттай буюу утаа гаргадаггүй зуух нийслэл бүү хэл орон даяар тархаж, айл өрх болгон "утаа гаргадаггүй" зуухтай болсон. Гэсэн ч утаа гаргадаггүй зуух нь "ид шид"-ээ үзүүлэлгүй Улаанбаатарын утаа арилах нь "үлгэр" болох нь тэр. Ингээд утаа гаргадаггүй зуухаар Улаанбаатарын утааг арилгах МАН-ын төлөвлөгөө үндсэндээ нурахад дахин нэг "заль" бодож олсон нь өнөөгийн иргэдийн өргөнөөр хэрэглэж байгаа сайжруулсан шахмал түлш.

                      2018 онд "Сайжруулсан түлш" төслийг хэрэгжүүлж, нийслэлийн төвийн дүүргүүдээс эхлээд түүхий нүүрс түлэхийг хориглосон тогтоол гаргаж,  ард түмэнд сайжруулсан шахмал түлшээ "шахаж" байв. Тухайн үедээ л сайжруулсан шахмал түлшнийхээ дээжээс БНХАУ, ОХУ, БНСУ, Япон Улс руу илгээчихсэн. Гаднын том том лабораториудаар шинжлүүлчихсэн байлаа. Тэгээд өнгөрсөн баасан гарагт болсон шиг түүхий нүүрсийг сайжруулсан шахмал түлштэйгээ харьцуулж, түлж үзүүлээд "Ингээд утааг арилгаж, утаанаас сална" гээд МАН-ынхан их л додигор сууцгааж байсныг мартаагүй хүн олон. Гэтэл хэрэглээнд нэвтрүүлээд тав дахь жилийнхээ нүүрийг үзэх гэж байгаа сайжруулсан шахмал түлшээ нь мөн л стандартын шаардлага хангахгүй, утаа их гаргадаг дээрээ тулаад МАН-аас коксжсон нүүрс хэрэглээнд нэвтрүүлнэ гээд сууж байгаа.

-ҮНДЭСНИЙ УРЛАГИЙН ИХ ТЕАТРЫН БҮТЭЭН БАЙГУУЛАЛТ-

У.Хүрэлсүх Засгийн газрын үед Үндэсний урлагийн их театрыг барих асуудлыг судлах Ажлыг хэсэг гаргаж, байгуулах захирамж ч гаргаж байв. Ажлын хэсгийг Барилга, хот байгуулалтын сайд асан Б.Мөнхбаатар, Соёлын сайд асан С.Чулуун нар ахалж, зураг төслийн ажилтай танилцсан байдаг. Зөвхөн Үндэсний урлагийн их театр барихаар төлөвлөж, 160 гаруй айлын газрыг чөлөөлсөн. Гэсэн ч орчин үеийн шаардлагад нийцсэн, шинэ техник, технологиор хангагдсан, үндэсний онцлог бүхий интерьер шийдэлтэй, урлаг, уран сайхны цогцолбор арга хэмжээ зохион байгуулах нөхцөл хангагдсан Үндэсний урлагийн их театрын бүтээн байгуулалт одоог хүртэл сураггүй.

-ТӨВ ЦЭВЭРЛЭХ БАЙГУУЛАМЖИЙГ ШИНЭЧЛЭХ АСУУДАЛ-

Нийслэл хотын иргэдийн амьдрах ахуй нөхцөлийг эрүүл, цэвэр болгох асуудалд МАН-аас ариутгал, шинэчлэлийн ажил хийхээр том амлацгаасан байдаг. Бүр прокурорын байгууллагаас муу дүн тавиад байсан Төв цэвэрлэх байгууламжид тухайн үеийнх нь Засгийн газар бүрэн бүрэлдэхүүнээ очиж, Засгийн газрын хуралдаанаар Улаанбаатар хотын Төв цэвэрлэх байгууламжийг шинэчлэх ажлыг эхлүүлсэн. Ажлын хэсгийг Барилга, хот байгуулалтын сайд асан Х.Баделханаар ахлуулж, Засгийн газар нь БНХАУ-ын “Экзим” банкнаас 300 сая ам.долларын зээл авч, бүтээн байгуулахаар яригдаж байв. Тэгвэл өдгөө бараг л “байгуулагдчихсан” Төв цэвэрлэх байгууламжийн сураг тасарчээ...