Ерөнхийлөгч БНХАУ-д “Бүс ба зам” санаачилгын 10 жилийн ойд зориулсан дээд хэмжээний уулзалтад оролцохдоо хоёр талын төрийн тэргүүнтэй албан уулзалт хийж, байгалийн хийн хоолойн бүтээн байгуулалтын ажлыг хурдасгах асуудлаар ярилцав. Өнгөрсөн хэдэн жилийн турш олон улсын анхаарлыг татаж, дэлхийн хэмжээнд яригдаж байсан гурван орны хамтарсан байгалийн хийн хоолой босох нь баттай болжээ. Улмаар урьдчилсан тооцооллоор 1000 орчим км урттай байгалийн хийн хоолой Монголын нутгийг хөндлөн гулд “хэрчиж”, хийн хоолойгоо, бүтээн байгуулалтыг хамгаалах нэрээр орос цэргүүд орж ирэх нь тодорхой боллоо.

-БАЙГАЛИЙН ХИЙН БҮТЭЭН БАЙГУУЛАЛТЫГ ОРОСЫН ЦЭРГҮҮД ХАМГААЛНА ГЭВ-

ОХУ, БНХАУ-ын хооронд байгалийн хий дамжуулах “Сибирийн хүч-2” хоолойг Монгол Улсын нутгаар дамжуулан барих ажил цар тахлын үеэс хойш идэвхтэй яригдсан. Урьдчилсан байдлаар жилд 50 тэрбум шоо метр хий тээвэрлэх хүчин чадалтай байгалийн хийн хоолой нь 976 км урттай байх бөгөөд Монголын зургаан аймаг, 23 сумын нутгаар дайран өнгөрөх тооцоо гарсан. Цаашлаад Монголд барих ажлыг эхлүүлж байхад БНХАУ-ын бодлого тодорхойлогчид цар тахал, “ковид тэг” бодлоготойгоороо холбоотойгоор хойшлуулж, хэд хэдэн шат давах болгосон байдаг. Улмаар өнгөрсөн 2022 оны арваннэгдүгээр сард “Сибирийн хүч-2” хоолойг БНХАУ-ын талаас албан ёсоор баталгаажуулсан.

Монголоор дамжиж, БНХАУ-д хүрэх байгалийн хийн хоолойгоор ОХУ зөвхөн Хятад ч бус бусад Азийн орон руу хийн нийлүүлэлтээ нэмж, Зүүн хойд Азийн эрчим хүчний аюулгүй байдлын динамикийг өөрчлөхөөрөө чухал ач холбогдолтой төсөл. Тиймдээ ч олон улс “Сибирийн хүч-2” хийн хоолойн төсөл хаашаа эргэж, юу болох тухайд сонирхон байв. Харин Бээжинд болсон “Бүс ба зам”-ын дээд хэмжээний уулзалт төслийн бүтээн байгуулалтыг эхлүүлэх сүүлчийн албан уулзалт болж байгаа бололтой.

Гурван тал “Сибирийн хүч-2” төслийн бүтээн байгуулалтыг хурдан эхлүүлэх асуудалд санал нэгдсэн учир албажиж хоолойг барих ажил тун удахгүй эхэлнэ. Харин хоёр талаас хөрөнгө оруулалтыг нь “цацаж” байгаа хийн төслийн ажил, бүтээн байгуулалтыг орос цэргүүд хамгаалах гэнэ. Улмаар хийн хоолойн төслийн бүтээн байгуулалт эхлэхэд Оросын талаас 976 км урт бүтээн байгуулалтыг хамгаалах томоохон цэргийн хүч орж ирэх юм байна.

-“СИБИРИЙН ХҮЧ-2” ТӨСЛИЙГ ДАГАЖ, ЭГИЙН ГОЛЫН УЦС-ЫН ТӨСӨЛ ХӨДӨЛЖ ЭХЭЛНЭ ГЭВ ҮҮ-

Бээжинд болсон “Бүс ба зам”-ын дээд хэмжээний уулзалтаар Ерөнхийлөгч У.Хүрэлсүх БНХАУ, ОХУ-ын төрийн тэргүүнтэй албан ёсны уулзалт хийхдээ хоёр УЦС-ын төслийн асуудлаар ярьжээ. Хоёр орны Ерөнхийлөгчтэй хийсэн уулзалт ч үр дүнгээ өгч, нэг УЦС-ын төсөл хэрэгжиж эхлэхээр болж, нөгөөг нь судлахаар болсон гэнэ.

                   Тухайлбал, Монгол, БНХАУ-ын тал Эрдэнэбүрэнгийн УЦС барих төслийн тусгайлсан зээлийн хэлэлцээр, Монгол Улсын Баянхонгор аймаг болон БНХАУ-ын Ганьсу муж хооронд найрсаг, хамтын ажиллагааны тухай хэлэлцээр, Монгол Улсын Баянхонгор аймгийн Баянхонгор сум, БНХАУ-ын Ганьсу мужийн Жючуань хот хооронд ах дүүгийн харилцаа тогтоох тухай хэлэлцээр зэрэг баримт бичигт гарын үсэг зурж, баталгаажуулснаар Эрдэнэбүрэнгийн УЦС-ын бүтээн байгуулалтын ажил албажиж байгаа юм. Мөн Ерөнхийлөгч ОХУ-ын төрийн тэргүүн В.Путинтэй хийсэн албан уулзалтаараа Эгийн голын УЦС-ын асуудлаар ярьж, хоёр тал зөвшилцөлд хүрчээ. ОХУ-ын талаас Монгол түлш, шатахуун тасралтгүй нийлүүлж, тогтвортой байлгахаа мэдэгдсэн бөгөөд Ерөнхийлөгч Владимир Путин эрчим хүчний хэрэгцээг хангахад чиглэсэн хамтын ажиллагааны хүрээнд Эгийн голын УЦС-ыг байгуулах асуудлыг нарийвчлан судлахаа мэдэгдсэн байна. Ингэснээр олон жилийн турш гацаанд ороод байсан Эгийн голын УЦС-ын ажил нэг шат урагшилж ирлээ.